បុត្រីរបស់ស្តេចថៃ ប្រឈួនធ្ងន់

រាជវាំងថៃប្រកាសថា ព្រះនាង Bajrakitiyabha ដែលជាបុត្រីស្តេច Maha Vajiralongkorn (រាមាទី១០) កំពុងប្រឈួនធ្ងន់ព្រោះឆ្លងមេរោគក្នុងសរសៃឈាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Thai Enquirer ផ្សាយនៅថ្ងៃសុក្រទី១៥ខែសីហាឆ្នាំ២០២៥ ព្រះនាងកំពុងមានព្រះអាការៈធ្ងន់ធ្ងរ ហើយកំពុងសង្គ្រោះបន្ទាន់នៅមន្ទីរពេទ្យ Chulalongkorn។

ក្រុមគ្រូពេទ្យបានឲ្យដឹងថា ព្រះនាងបានទទួលថ្នាំជាបន្តបន្ទាប់ និងការថែទាំសួតនិងតម្រងនោម ហើយការឆ្លងមេរោគតាមកាលកំណត់ ក៏ត្រូវបានព្យាបាលដោយថ្នាំផ្សះផងដែរ។

តាមពិតទៅ ព្រះនាងធ្លាប់បានសន្លប់ដោយសារជំងឺបេះដូង កាលពីថ្ងៃទី ១៥ ខែធ្នូ ឆ្នាំ ២០២២ ម្តងរួចមកហើយ ប៉ុន្តេពេលនេះ អាការៈរឹតតែធ្ងន់ដែលតម្រូវឲ្យសង្គ្រោះបន្ទាន់ ខណៈក្រុមគ្រូពេទ្យកំពុងតាមដានជំងឺ។

សូមជម្រាបថា ព្រះនាង Bajrakitiyabha គឺជាបុត្រីច្បងរបស់ស្តេច Maha Vajiralongkorn និងអតីតព្រះមហេសីរបស់ព្រះអង្គ គឺព្រះនាង Soamsawali។

ព្រះនាង Bajrakitiyabha ធ្លាប់បំពេញេព្រះរាជកិច្ចជាឯកអគ្គរាជទូតថៃប្រចាំនៅប្រទេសអូទ្រីស ពីឆ្នាំ ២០០៨ ដល់ ២០១១ ហើយព្រះនាងក៏ធ្លាប់ជាអ្នកតំណាងរបស់ថៃ ប្រចាំគណៈកម្មការឧក្រិដ្ឋកម្ម និងគ្រឿងញៀនរបស់អង្គការសហប្រជាជាតិនៅក្រុងវីយែន ផងដែរ។

មិនត្រឹមប៉ុណ្ណឹង ព្រះនាងថែមទាំងមានឋានៈជាឧត្តមសេនីយ៍នៅក្នុងកងទ័ពថៃផងដែរ៕

អត្ថបទ៖ សុខ សុវណ្ណ