ព័ត៌មានអន្ដរជាតិ

អានុទីន ថា មកពីរដ្ឋមន្ត្រីអត់ចេះអួតស្នាដៃលើហ្វេសប៊ុក ដូចលោក ទើបរដ្ឋាភិបាលធ្លាក់ប្រជាប្រិយភាព

បានផុស

១៧ វិនាទី មុន

នៅ

ថ្ងៃអង្គារ ៧ កក្កដា ២០២៦

ដោយ

Chheang

ក្រោយពីវិទ្យាស្ថានជាតិ NIDA បានទម្លាយការស្ទង់មតិថា ប្រជាប្រិយភាពរបស់រដ្ឋាភិបាលថៃបច្ចុប្បន្ន កំពុងតែដាំក្បាលចុះខ្លាំង លោកនាយករដ្ឋមន្ត្រី អានុទីន ឆានវីរៈគុល បានចេញមុខដោះសាប្រាប់អ្នកកាសែតថា ការស្ទង់មតិគ្រាន់តែជាកញ្ចក់ឆ្លុះមើលខ្លួនឯង ដើម្បីរកចំណុចខ្វះខាតប៉ុណ្ណោះ មិនមានអត្ថន័យអ្វីសំខាន់នោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសារព័ត៌មាន Khaosod ចុះផ្សាយថ្ងៃទី៧ ខែកក្កដា ឆ្នាំ២០២៦ លោក អានុទីន នៅតែអួតការពារខ្លួនលោកថា សំឡេងគាំទ្របច្ចុប្បន្ន គឺនៅតែខ្ពស់ជាងកាលពីពេលដែលលោកទើបចូលនយោបាយដំបូងៗ ដោយកាលណោះមានត្រឹមតែ ២% នោះទេ។

វិទ្យាស្ថាន NIDA បានឱ្យដឹងថា ការគាំទ្ររបស់លោក អានុទីន ធ្លាក់ចុះប្រមាណ ៥% ពោលគឺពី ២៦% មកនៅត្រឹម ២១,៦៨% តិចជាងបក្សប្រជាជន ដែលជាបក្សប្រឆាំង មានសំឡេងគាំទ្រ ២៦,០៨%។

ជំនួសឱ្យការទទួលខុសត្រូវរឿងធ្លាក់ចុះប្រជាប្រិយភាព លោក អានុទីន បែរជាបន្ទោសមន្ត្រីក្រោមឱវាទទៅវិញ។ លោកបានដេញឱ្យរដ្ឋមន្ត្រីទាំងអស់ ទៅពង្រឹងការផ្សព្វផ្សាយការងារតាមហ្វេសប៊ុក ដោយលោកយល់ថា កន្លងមកប្រជាជនមិនដឹង ព្រោះរដ្ឋមន្ត្រីមួយៗមិនចេះអួត មិនមែនមកពីរដ្ឋាភិបាលធ្វើការមិនកើតនោះទេ។

អ្វីដែលធ្វើឱ្យគេហួសចិត្តថែមទៀតនោះ គឺនៅពេលអ្នកកាសែតសួរថា តើលោកហត់ទេដែលចេញមុខឆ្លើយគ្រប់រឿងតែម្នាក់ឯង លោក អានុទីន បានប្រាប់ថា នេះក៏ព្រោះតែអ្នកកាសែតមួយចំនួន ចូលចិត្តមករកតែលោក មិនទៅរករដ្ឋមន្ត្រីផ្សេងៗទៀត។ លោក អានុទីន បានអួតទៀតថា នេះអាចមកពីលោកស្រឡាញ់អ្នកកាសែតដូចបងប្អូន ហើយមានតែលោកម្នាក់គត់ដែលចេះចុះទៅអង្គុយញ៉ាំអី ជជែកលេងជាមួយអ្នកកាសែតយ៉ាងស្និទ្ធស្នាល ទើបអ្នកកាសែតចោមរោមសួរតែលោក ហើយលោកនឹងដេញឱ្យរដ្ឋមន្ត្រីផ្សេងទៀតចេញមកធ្វើខ្លួនឱ្យស្និទ្ធស្នាលជាមួយអ្នកកាសែត ដូចរូបលោកដែរ។ លើសពីនេះទៅទៀត លោក អានុទីន ក៏រៀបរាប់ថា ពេលខ្លះលោកប្រញាប់ឡើងឡានមិនបានឆ្លើយសំនួរអ្នកកាសែត លុះចូលដល់ក្នុងឡាន ក៏លួចជូតទឹកភ្នែកម្នាក់ឯង ព្រោះស្តាយក្រោយដែលនិយាយសម្តីមិនសូវផ្អែមល្ហែមដាក់អ្នកកាសែត។

សូមជម្រាបថា ការធ្លាក់កូដរបស់រដ្ឋាភិបាល អានុទីន ត្រូវគេដឹងថា កើតចេញពីភាពអសមត្ថភាព ក្នុងការដោះស្រាយវិបត្តិសេដ្ឋកិច្ច ការកើនឡើងនៃតម្លៃទំនិញ និងអតិផរណាខ្ពស់ ដែលធ្វើឱ្យប៉ះពាល់ដល់ជីវភាពរស់នៅប្រចាំថ្ងៃ របស់ប្រជាពលរដ្ឋយ៉ាងធ្ងន់ធ្ងរ។ មួយវិញទៀត រដ្ឋាភិបាលលោក អានុទីន ក៏បានរងការរិះគន់មិនតិចនោះដែរ ជុំវិញរឿងអាស្រូវពុករលួយ ក្នុងការបន្លំពិន្ទុប្រឡងមន្ត្រីរាជការ និងការឆ្លើយតបមានភាពយឺតយ៉ាវ ចំពោះគ្រោះទឹកជំនន់ដ៏កាចសាហាវនៅភាគខាងត្បូងផងដែរ៕