ក្រោយចប់អាណត្តិ អតីតអភិបាលខេត្តកោះកុង៣រូប ទទួលបានតួនាទីជារដ្ឋលេខាធិការ

អភិបាលរងខេត្ត លោកស្រី ឈី វ៉ា ត្រូវបានព្រះករុណាព្រះមហាក្សត្រនៃកម្ពុជា ត្រាស់បង្គាប់តែងតាំងជាអភិបាលខេត្តកោះកុងថ្មី ដើម្បីជំនួសមុខតំណែងលោកស្រី មិថុនា ភូថង ដែលចប់អាណត្តិការងារ។

លោកស្រី មិថុនា ភូថង ដែលទទួលបាននូវការតែងតាំងជាអភិបាលខេត្តកោះកុង កាលពីខែមិថុនា ឆ្នាំ២០១៧ សម្រាប់អាណត្តិទី១ និងបន្តសម្រាប់អាណត្តិទី២ កាលពីខែកុម្ភៈ ឆ្នាំ២០២១ ត្រូវចប់អាណត្តិរបស់ខ្លួនក្នុងខែសីហា ឆ្នាំ២០២៥។ តាមច្បាប់ស្ដីពីការគ្រប់គ្រងរដ្ឋបាលរាជធានីខេត្តក្រុង​ស្រុកខណ្ឌ គឺអភិបាល និងអភិបាលរងទាំងអស់មានអាណត្តិការងារមិនលើសពី៤ឆ្នាំ ក៏ប៉ុន្តែអាចត្រូវបានតែងតាំងបន្ថែម៤ឆ្នាំទៀតសម្រាប់អាណត្តិទី២ របស់ខ្លួនក្នុងដែនសមត្ថកិច្ចដដែល។ ដូច្នេះការផ្លាស់ប្ដូរតំណែងអភិបាលខេត្តរបស់លោកស្រី មិថុនា ភូថង គឺស្របតាមច្បាប់កំណត់។

បើទោះជាត្រូវចប់តួនាទីនៅរដ្ឋបាលថ្នាក់ក្រោមជាតិនេះក៏ពិតមែន ក៏ប៉ុន្តែលោកស្រី មិថុនា ភូថង ក៏ត្រូវបានតែងតាំងនូវតួនាទីថ្មី ជារដ្ឋលេខាធិការនៃក្រសួងកិច្ចការនារី ដែលជាមុខតំណែងនយោបាយនៅរដ្ឋបាលថ្នាក់ជាតិ។

លោកស្រី មិថុនា ភូ​ថង បាន​ក្លាយជា​អភិបាលខេត្ត​ស្ត្រី​ដំបូង​បំផុត​ក្នុង​ប្រវត្តិសាស្ត្រ​របស់​កម្ពុជា ដោយ​លោកស្រី​ត្រូវបាន​ព្រះមហាក្សត្រនៃកម្ពុជា ដំឡើង​តំណែង​ពី​អភិបាលរងខេត្ត មកជំនួសតំណែងរបស់​លោក ប៊ុន លើ​ត ជាអភិបាលខេត្តកោះកុង។

និយាយដល់ឈ្មោះលោក ប៊ុន លើត គឺជាអតីតអភិបាលខេត្តកោះកុងមួយរូប ដែលបានកាន់តំណែងនេះពីឆ្នាំ២០០៩ ដល់ឆ្នាំ២០១៧ ពោលគឺរយៈពេលពីរអាណត្តិ ៨ឆ្នាំដូចគ្នានឹងលោកស្រី មិថុនា ភូថង។ ក្រោយចប់អាណត្តិការងារនេះ លោក ប៊ុន លើត ត្រូវបានព្រះមហាក្សត្រត្រាស់បង្គាប់តែងតាំងជារដ្ឋលេខាធិការក្រសួងការពារជាតិ រហូតដល់បច្ចុប្បន្ននេះ ដែលមានឋានន្តរសក្តិនាយឧត្តមសេនីយ៍។

ក្រៅពីអតីតអភិបាលខេត្តកោះកុងទាំងពីរខាងលើ ក៏មានលោក យុទ្ធ ភូថង ម្នាក់ទៀតក្រោយបញ្ចប់មុខងារជាអភិបាលខេត្តកោះកុង ក៏ត្រូវបានទទួលការតែងតាំង ហើយបច្ចុប្បន្នកំពុងកាន់តួនាទីរដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ ផងដែរ។ លោក យុទ្ធ ភូថង កាន់ជាអភិបាលខេត្តកោះកុង ពីឆ្នាំ១៩៩៨ ដល់ឆ្នាំ២០០៩ បន្ទាប់ពីអភិបាលខេត្តដំបូងគេ រាប់ក្រោយឆ្នាំ១៩៧៩ គឺលោក រុង ផ្លាមកេសន។

លោក យុទ្ធ ​ភូ​ថង និងលោកស្រី មិថុនា ភូថង ត្រូវជាឪពុកកូននឹងគ្នា ហើយលោក គឺជាកូនប្រុសរបស់លោកព្រឹទ្ធាចារ្យ សាយ ភូថង  ដែលជា​អតីត​អនុប្រធាន​ក្រុមប្រឹក្សារដ្ឋ និង​សមាជិក​គណៈអចិន្ត្រៃយ៍​គ​ណ​បក្ស​ប្រជាជន​កម្ពុជា ប៉ុន្តែលោកព្រឹទ្ធាចារ្យ​បានទទួល​មរណភាពទៅហើយ៕

ដោយ៖ ធឿន វ៉ាន់សុង