រដ្ឋបាលខេត្តកោះកុង រៀបចំកន្លែងស្នាក់នៅឥតគិតថ្លៃជូនបេក្ខជនប្រឡងបាក់ឌុប ដែលខ្វះខាត

រដ្ឋបាលខេត្តកោះកុង និងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត សហការគ្នារៀបចំផ្តល់កន្លែងស្នាក់នៅឥតគិតថ្លៃដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ ស្ថិតនៅក្នុងក្រុងខេមរភូមិន្ទ។ កន្លែងស្នាក់នៅនេះមានទីតាំងស្ថិតក្នុងបរិវេណមន្ទីរសង្គមកិច្ចខេត្ត មាន ៤បន្ទប់ធំៗ ស្មើនឹង៤០គ្រែ និងមានបន្ទប់ទឹកស្អាតទៀតផង។

លោកស្រី ស៊ឹម សុជា អនុប្រធាមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តកោះកុង បានប្រាប់កម្ពុជាថ្មីថា ការផ្តល់ជាកន្លែងស្នាក់នៅដោយគិតថ្លៃជូនដល់បេក្ខជន និងអាណាព្យាបាលសិស្សានុសិស្សនេះ ដើម្បីសម្រួលការចំណាយនានាអំឡុងពេលដំណើរការប្រឡងរយៈពេល២ថ្ងៃ ចាប់ពីថ្ងៃទី២៨ ដល់២៩ សីហា។ លោកស្រីបញ្ជាក់ថា៖« ឆ្នាំនេះជាឆ្នាំដំបូងហើយដែលមន្ទីរអប់រំ សហការជាមួយរដ្ឋបាលខេត្តកោះកុង ផ្តល់ជាកន្លែងស្នាក់នៅសម្រាប់បេក្ខជនប្រឡង និងអាណាព្យាបាលរបស់ពួកគេ តបនឹងការជូនដំណឹងរបស់លោកស្រី មិថុនា ភូថង (អតីតភិបាលខេត្តកោះកុង)។

លោកស្រីអនុប្រធានមន្ទីរសង្គមកិច្ច ក៏អំពាវនាវដល់អាណាព្យាបាល និងបេក្ខជនប្រឡងក្រីក្រ ខ្វះខាតដែលមានបំណងចង់មកស្នាក់នៅសូមអញ្ជើញទាក់ទងតាមរយៈលេខទូរស័ព្ទ 088 96 48 999/096 95 66 693  ដើម្បីទទួលបានកន្លែងស្នាកនៅទាន់ពេលវេលា។

លោក សេង ធី ជាអាណាព្យាបាល របស់បេក្ខជនត្រៀមប្រឡង ឈ្មោះ ផេង ភិរុន មកពីស្រុកស្រែអំបិល ថ្លែងថា ការផ្តល់កន្លែងស្នាក់នៅនេះ ជាការរួមចំណែកមួយកាត់បន្ថយការចំណាយបានច្រើនអំឡុងពេលមកប្រឡងនៅទីរួមខេត្ត កោះកុង។ ជាមួយគ្នានេះ លោកសូមអរគុណច្រើនដល់រដ្ឋបាលខេត្ត និងមន្ទីរសង្គមកិច្ចដែលបានយកចិត្តទុកដាក់ពីសុខទុក្ខរបស់ពលរដ្ឋ ជាពិសេសបេក្ខជនប្រឡងមកពីបណ្តាស្រុកដទៃទៀត។

ក្នុងនាមអាណាព្យាបាលដែលជូនកូនមកប្រឡង បានលើកឡើងថា៖« អរគុណអាជ្ញាធរដែលបានជួយសម្របសម្រួល ណាមួយដោយសារផ្ទះសំណាក់ មានការកក់ស្នាក់នៅពេញស្ទើរគ្រប់កន្លែងទើបពួកគាត់មកសុំកន្លែងស្នាក់នៅក្នុងមន្ទីរសង្គមកិច្ចតែម្តង៕

អត្ថបទ៖ សិរីវឌ្ឍនៈ