សេដ្ឋកិច្ច

តម្លៃមាសបំបែកកំណត់ត្រាថ្មី ហក់ឡើងជាង ៤៧០០ ដុល្លារ មួយតម្លឹង

បានផុស

៨ ខែ មុន

នៅ

ថ្ងៃចន្ទ ៦ តុលា ២០២៥

ដោយ

តម្លៃហាងឆេងមាសបន្តបំបែកកំណត់ត្រាថ្មីខ្ពស់បំផុតក្នុងប្រវត្តិសាស្ត្រមិនធ្លាប់មាន ដោយបានហក់ឡើងដល់ជាង ៤ ៧១៦ ដុល្លារ ក្នុងមួយតម្លឹង នៅថ្ងៃច័ន្ទនេះ ដោយសារអាមេរិកត្រៀមកាត់បន្ថយអត្រាការប្រាក់បន្ថែមទៀត នៅដំណាច់ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ហាងឆេងមាសនៅរាជធានីភ្នំពេញ នៅថ្ងៃទី ០៦ ខែតុលា ឆ្នាំ ២០២៥ លក់ចេញក្នុងតម្លៃ ៤៧០ ដុល្លារ ក្នុងមួយជី។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន PP Link securities ប្រាប់កម្ពុជាថ្មីថា តម្លៃមាសនៅតែបន្តកើនឡើង ដោយសារស្ថានភាពគោលនយោបាយដឹកនាំរបស់លោក ដូណាល់ ត្រាំ។

លោក ឡុង សំណាង យល់ឃើញថា៖ «គេមិនទាន់សន្មត់ថា អាមេរិកនឹងកាត់បន្ថយអត្រាការប្រាក់បន្ថែមទៀត ឬយ៉ាងណានោះទេ ដោយសារតែអត្រាអតិផរណាកើនឡើង គ្រាន់តែស្ដាប់ប៉ុណ្ណឹងយើងកំពុងគិតថា វាអត់ល្អបាត់ទៅហើយ សំដៅទៅលើសេដ្ឋកិច្ចអាមេរិកតែម្ដង អញ្ចឹងអត្រាការប្រាក់អត់ទម្លាក់ក៏ដោយ ក៏មាសនៅតែឡើងដែរ ទោះបីជាគាត់ដំឡើងក៏ដោយ មាសក៏នៅតែឡើង ដោយសារតែការដំឡើងអត្រាការប្រាក់របស់គាត់ គឺជាការដំឡើងគ្រាន់តែទប់ហានិភ័យនៃការកើនឡើងអតិផរណាប៉ុណ្ណោះ មិនមែនដំឡើងអត្រាការប្រាក់ដើម្បីឱ្យលុយដុល្លារល្អនោះទេ»។

លោក ឡុង សំណាង បន្ថែមថា ភូមិសាស្ត្រនយោបាយមិនល្អ ប្រទេសនីមួយៗ ចង់តែធ្វើសង្គ្រាម មិនចង់ផ្ដល់សេវាផ្ទេរផលិតផលជាមួយគ្នា ដែលធ្វើឱ្យសេដ្ឋកិច្ចមិនល្អ។

ប្រព័ន្ធផ្សព្វផ្សាយអាមេរិករាយការណ៍ថា លទ្ធភាពដែលទិន្នន័យការងារអាមេរិកមិនសូវល្អ អាចជួយជំរុញឱ្យធនាគារកណ្ដាលសហព័ន្ធអាមេរិក (Fed) កាត់បន្ថយអត្រាការប្រាក់ជាថ្មីនៅក្នុងខែតុលានេះ ដែលជាកត្តារុញតម្លៃមាសផងដែរ។

ក្រៅពីនេះ កត្តាផ្សេងៗទៀតរួមទាំងឯករាជ្យភាពរបស់ Fed ជុំវិញសម្ពាធឱ្យបន្ថែមការកាត់អត្រាការប្រាក់ពីលោក ត្រាំ និងរដ្ឋបាលរបស់លោក៕

អត្ថបទ៖ឡេង ដេត