អ៊ីរ៉ង់ប្រកាសវាយសងសឹក «ឱ្យហ្មត់» ប្រឆាំងអ៊ីស្រាអែល

ទីភ្នាក់ងារសារព័ត៌មាន​រ៉យទ័របាន​រាយការណ៍នៅម៉ោង ២ រសៀល (ម៉ោងនៅទីក្រុងភ្នំពេញ) ថ្ងៃសៅរ៍នេះ​ថា សហរដ្ឋអាមេរិក​បាន​ចាប់ផ្ដើមបើកការវាយប្រហារតាមផ្លូវអាកាសប្រឆាំងអ៊ីរ៉ង់ ដោយ​ចូលដៃគ្នាជាមួយ​សម្ព័ន្ធមិត្តអ៊ីស្រាអែល ខណៈមន្រ្តីអ៊ីរ៉ង់ត្រៀមវាយបកឱ្យចាស់ដៃទៅវិញ​។

មន្រ្តីអាមេរិក​បាន​បញ្ជាក់ថា ការវាយប្រហាររបស់អាមេរិកកំពុង​ធ្វើឡើងទាំងតាមផ្លូវទឹក និងផ្លូវអាកាស។ ការបញ្ជាក់យ៉ាងដូច្នេះ ធ្វើឡើងបន្ទាប់ពីអ៊ីស្រាអែលបាន​បើកការវាយប្រហារទុកមុនប្រឆាំងអ៊ីរ៉ង់នៅថ្ងៃសៅរ៍នេះ ដែលបង្កសម្លេងផ្ទុះទ្រលាន់ឡើងនៅទីក្រុងតេអេរ៉ង់។

មាន​សេចក្ដីរាយការណ៍ផ្សេងៗ​គ្នា​បាន​និយាយថា មេបញ្ជាការអ៊ីរ៉ង់ជាច្រើននាក់ត្រូវបានសម្លាប់ ខណៈអាមេរិក និងអ៊ីស្រាអែលកំណត់គោលដៅលើ​ទីស្នាក់ការកណ្តាលនុយក្លេអ៊ែរ ការពារជាតិ ស៊ើបការណ៍សម្ងាត់ និងមេដឹកនាំកំពូលរបស់អ៊ីរ៉ង់។

ដោយឡែកអ៊ីរ៉ង់ឯណោះវិញ បាន​និយាយថា ខ្លួនកំពុងត្រៀមខ្លួនវាយបក ហើយការវាយបកនោះមាន​លក្ខណៈខ្លាំងក្លា «ធ្វើឱ្យ​ហ្មត់» តែម្ដង។ នេះបើតាមរ៉យទ័រ។

ការវាយប្រហារលើកនេះ កំពុងបង្កើនភាពតានតឹងថ្មីយ៉ាងខ្លាំងនៅមជ្ឈិមបូព៌ា និងកើតឡើងក្រោយ​អាមេរិក និងអ៊ីរ៉ង់បើកការចរចាឡើងវិញអំពីកម្មវិធីនុយក្លេអ៊ែរ៕