Connect with us

សេដ្ឋកិច្ច

អ្នកស្រី ម៉ោង ស្រីពៅ បង្កើតម៉ាកយីហោខ្មែរ​កែច្នៃសាច់ និងស៊ុតទា​ទៅជាផលិតផលច្រើនមុខផ្គត់ផ្គង់ទីផ្សារ​ក្នុងស្រុក

បានផុស

នៅ

អ្នកស្រី ម៉ោង ស្រីពៅ គឺជាស្ត្រីខ្មែរមួយរូប ដែលបានរួមចំណែកលើកស្ទួយផលិតផលក្នុងស្រុកតាមរយៈបង្កើត​ម៉ាកយីហោខ្មែរ​កែច្នៃសាច់ និងស៊ុតទា ទៅជាផលិតផលសម្រេចជាច្រើនមុខ ផ្គត់ផ្គង់លើទីផ្សារកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់សិប្បកម្មភូមិពងទាខ្មែរ អ្នកស្រី ម៉ោង ស្រីពៅ បានប្រាប់កម្ពុជាថ្មីថា សព្វថ្ងៃសិប្បកម្មបានប្រមូលទិញ​ពងទា​ពីកសិករ​​នៅក្នុងសហគមន៍មួយចំនួនតាមខេត្ត មានដូចជា សហគមន៍កសិករចិញ្ចឹមទានៅខេត្តតាកែវ ព្រៃវែង កំពង់ឆ្នាំង និងបាត់ដំបងជាដើម។

អ្នកស្រីបានបញ្ជាក់ថា សិប្បកម្មមានសមត្ថភាពអាចបំពេញតម្រូវការទីផ្សារក្នុងស្រុកសម្រាប់ស៊ុតទា បានរាប់ម៉ឺនគ្រាប់ ក្នុងមួយថ្ងៃៗ។

លើសពីនេះទៀត សិប្បកម្មអ្នកស្រី បានកែច្នៃស៊ុតទៅជាផលិតផលសម្រេច មានដូចជា កែច្នៃធ្វើពងទាប្រៃ ចែកចាយ​បណ្តូលពងទាប្រៃ ទៅតាមបណ្តាហាងធ្វើនំ អាហារដ្ឋាន តាមតម្រូវការផ្សេងៗ កែច្នៃពងទាជាមួយដំឡូង​ធ្វើជាមីពងទា ជាដើម។ ដោយឡែក សម្បកកិនកែច្នៃធ្វើជាជីកំប៉ុសសម្រាប់កសិករយកទៅប្រើប្រាស់សម្រាប់ដំណាំផ្សេងៗទៀត។

ជាមួយគ្នានេះ ម្ចាស់សិប្បកម្មភូមិពងទាខ្មែរ គ្រោងបង្កើតកិច្ចសហការវិនិយោគលើសាច់ទា ដោយបំបែកជាបំណែក ដូចជា សាច់ដោយសាច់ ជើង សាច់ទ្រូង ក គ្រឿងក្នុង បែងចែកដាច់ពីគ្នា ដើម្បីបំពេញតម្រូវការទីផ្សារបន្ថែម។

អ្នកស្រី បានអះអាងថា ពងទាទាំងអស់គឺជាផលិតផលក្នុងស្រុករបស់កសិករខ្មែរ ដោយសិប្បកម្មបានផ្តល់​តម្លៃសមរម្យជូន​កសិករក្នុងសហគមន៍។

អ្នកស្រី ម៉ោង ស្រីពៅ បានឱ្យដឹងដូច្នេះថា« សព្វថ្ងៃនេះ យើងមានសហគមន៍នៅព្រៃវែង ២០គ្រួសារ, កំពង់ឆ្នាំង ៥គ្រួសារ, សហគមន៍ខេត្តតាកែវ និងបាត់ដំបង សរុបជិត ១០០គ្រួសារ»។

ក្រៅពីជួយរកទីផ្សារសម្រាប់កសិករ អ្នកស្រី ម៉ោង ស្រីពៅ បានគូសបញ្ជាក់ថា សិប្បកម្មក៏បានជួយផ្តល់ឱកាសកាងារ និងបណ្តុះបណ្តាលចំណេះដឹងមួយចំនួនដល់សិស្សនិស្សិតដែលមានជីវភាពខ្វះខាតត្រូវការហិរញ្ញវត្ថុបន្ថែម ដើម្បីបន្តការ​សិក្សានៅភ្នំពេញផងដែរ។ សិប្បកម្មភូមិពងទាខ្មែរ មានទីតាំងនៅសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

សូមបញ្ជាក់ថា សិប្បកម្មនេះ បានជួយផ្តល់ការងារ និងប្រាក់ចំណូលដល់សហគមន៍កសិករជាច្រើន ដែលពាក់ព័ន្ធ ផ្តល់ការងារដល់សិស្សនិស្សិតមានជីវភាពខ្វះខាត ជាពិសេសជួយលើកស្ទួយផលិតផលខ្មែរ និងកែច្នៃសំណល់ រួមចំណែកសម្អាតបរិស្ថានជាដើម។

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម