បំណុលគ្រួសារ ថៃ​ កើនដល់កម្រិតខ្ពស់បំផុតមិនធ្លាប់មានក្នុងពេល ១៥ ឆ្នាំ

បំណុលគ្រួសារជាមធ្យមនៅក្នុងប្រទេសថៃ បានឈានដល់កម្រិតខ្ពស់បំផុតរយៈពេល ១៥ ឆ្នាំមកនេះ ដោយសារតែការងើបឡើងវិញនៃសេដ្ឋកិច្ចយឺតជាងការរំពឹងទុក និងតម្លៃរស់នៅខ្ពស់ ចំពេលមានភាពមិនច្បាស់លាស់លើការបង្កើតរដ្ឋាភិបាលថ្មី បន្ទាប់ពីការបោះឆ្នោតខែឧសភា ។

យោងតាមការស្ទង់មតិពីសកលវិទ្យាល័យសភាពាណិជ្ជកម្មថៃ (UTCC) បានឲ្យដឹងថា គ្រួសារនីមួយៗមានបំណុលជាមធ្យម ១៦,១៩១ ដុល្លារ​នៅឆ្នាំ ២០២៣ ហើយតម្រូវ​ឲ្យគ្រួសារនីមួយៗត្រូវ​បង់សងចំនួន ៤៨៤.៥៧ ដុល្លារក្នុងមួយខែ ដែលកើនឡើង ១១.៥ ភាគរយ បើប្រៀបធៀបនឹងឆ្នាំមុន ។

ពាក់ព័ន្ធជាមួយបញ្ហាបំណុលនេះដែរ មានប្រជាជនប្រហែលមួយភាគបីនៃប្រជាជនសរុប ជំពាក់ប្រាក់ចំនួន ៤៦២ ពាន់លានដុល្លារពីប្រាក់កម្ចីផ្លូវការ និង ១១៩.៤៦ ពាន់លានដុល្លារពីកម្ចីក្រៅផ្លូវការ ។

លើសពីនេះ សាកលវិទ្យាល័យសភាពាណិជ្ជកម្មថៃ (UTCC) បានព្យាករណ៍ទៀតថា បំណុលគ្រួសារនឹងបន្តកើនឡើងរហូតដល់ឆ្នាំក្រោយ មុនពេលធ្លាក់ចុះបន្តិចម្តងៗនៅឆ្នាំបន្តបន្ទាប់ទៀត ។

ស្របពេលជាមួយគ្នានេះ តាមរយៈធនាគារកណ្តាលថៃក៏បានគូសបញ្ជាក់ពីវិធានការដោះស្រាយជាបន្តបន្ទាប់ផងដែរ ដោយសង្ឃឹមថា នឹងធ្វើឲ្យសមាមាត្របំណុលគ្រួសារធ្លាក់ចុះដល់ ៨០ ​ភាគរយនៃផលិតផលក្នុងស្រុកសរុប (GDP) ៕​

ប្រែសម្រួល៖ នាង រតនៈ

ប្រភព៖ Bangkok Post

ចុចអាន ៖ ព្រះមហាក្សត្រ ថៃ មានព្រះបន្ទូលទៅកាន់ប្រជារាស្ត្រ ពាក់ព័ន្ធស្ថានភាពនយោបាយក្នុងប្រទេស