សេដ្ឋកិច្ច

កម្ពុជាឈានមុខគេក្នុងការអនុវត្ត eTrade Readiness Assessment របស់អង្គការសហប្រជាជាតិ (UNCTAD)

បានផុស

២ years មុន

នៅ

ថ្ងៃអង្គារ ៧ ឧសភា ២០២៤

ដោយ

រដ្ឋមន្រ្តីក្រសួងពាណិជ្ជកម្មបានលើកឡើងថា កម្ពុជាជាប្រទេសឈានមុខគេក្នុងការអនុវត្ត ការវាយតម្លៃភាពរួចរាល់នៃការធ្វើពាណិជ្ជកម្មតាមប្រព័ន្ធអេឡិចត្រូនិក (eTrade Readiness Assessment) ពាណិជ្ជកម្ម និងការអភិវឌ្ឍន៍របស់អង្គការសហប្រជាជាតិ (UNCTAD) ដោយសម្រេចបាននូវអត្រាអនុវត្តខ្ពស់គួរឱ្យកត់សម្គាល់ប្រមាណ៩២%។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ដែលបានចូលរួមជាវាគ្មិនក្នុងកិច្ចពិភាក្សាថ្នាក់រដ្ឋមន្ត្រី ក្រោមប្រធានបទស្តីពី «ការដោះស្រាយបញ្ហាប្រឈមសម្រាប់ការត្រៀមលក្ខណៈឌីជីថលនៅក្នុងប្រទេសកំពុងអភិវឌ្ឍន៍»ដែលជាកិច្ចពិភាក្សាដ៏សំខាន់មួយថ្នាក់រដ្ឋមន្ត្រីនៅក្នុងកិច្ចប្រជុំលើកទី៧ ស្តីពី “UNCTAD Intergovernmental Group of Experts (IGE) on E-Commerce and the Digital Economy” កាលពីថ្ងៃចន្ទ ទី៦ ខែឧសភា ឆ្នាំ២០២៤ នៅទីស្នាក់ការអង្គការសហប្រជាជាតិប្រចាំទីក្រុងហ្សឺណែវ សហព័ន្ធស្វីស

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ចម និម្មលបានគូសបញ្ជាក់ថា៖« កម្ពុជាជាប្រទេសឈានមុខគេក្នុងការអនុវត្ត eTrade Readiness Assessment ដោយសម្រេចបាននូវអត្រាអនុវត្តខ្ពស់គួរឱ្យកត់សម្គាល់ប្រមាណ៩២%»។

ក្រសួងពាណិជ្ជកម្មកម្ពុជា បានអនុវត្ត eTrade Readiness Assessment ប្រកបដោយប្រសិទ្ធភាព ដើម្បីជំរុញគំនិតផ្តួចផ្តើមនានារបស់រាជរដ្ឋាភិបាលកម្ពុជា ក្នុងគោលបំណងលើកកម្ពស់ប្រព័ន្ធអេកូឡូហ្ស៊ីនៃពាណិជ្ជកម្មតាមប្រព័ន្ធអេឡិចត្រូនិក។

«កម្ពុជា ប្តេជ្ញាចិត្តក្នុងការពង្រួមគម្លាតឌីជីថល និងជំរុញកិច្ចសហប្រតិបត្តិការពាក់ព័ន្ធនឹងវិស័យនេះ និងបានយល់ពីសារៈសំខាន់នៃសហគ្រាសមីក្រូ ធុនតូច និងមធ្យម ព្រមទាំងបាននិងកំពុងខិតខំប្រឹងប្រែងដើម្បីធានានូវកំណើនសហគ្រាសមីក្រូ ធុនតូច និងមធ្យម ឱ្យកាន់តែច្រើនឡើង និងអាចទទួលបាននូវសេវាសាធារណៈ និងធានាបាននូវហិរញ្ញប្បទានដែលពួកគេត្រូវការដើម្បីបន្តភាពរីកចម្រើនបន្ថែមទៀត»។ នេះបើយោងតាមក្រសួងពាណិជ្ជកម្ម។

ប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក(E-Commerce) បានជួយឱ្យរដ្ឋាភិបាលកម្ពុជារកចំណូលពន្ធបានប្រមាណជាង ៧៥លានដុល្លារកាលពី ឆ្នាំ២០២៣ ខណៈការប្រមូលចំណូលពន្ធប្រភេទនេះបានចាប់ផ្តើមអនុវត្តដំបូងកាលពីដើមត្រីមាស ទី២ ឆ្នាំ២០២២។ នេះបើតាមអគ្គនាយកដ្ឋានពន្ធដារ(GDT)។

សេចក្តីប្រកាសព័ត៌មានរបស់ GDT ឱ្យដឹងថា ចន្លោះពីខែមករា ដល់ខែធ្នូ ឆ្នាំ២០២៣ អគ្គនាយកដ្ឋានពន្ធដារប្រមូលចំណូលពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក បានចំនួន ៣០៥,៨៣ពាន់លានរៀល ស្មើនឹង ៧៥,៥២លានដុល្លារ ក្នុងនោះចំណូលប្រមូលបានពីអនិវាសនជនដែលបានចុះបញ្ជីអាករលើតម្លៃបន្ថែមសាមញ្ញ(Simplified VAT Registration) មានចំនួន ៦៤,៩៦ពាន់លានរៀល ស្មើនឹង ២០,៩៨លានដុល្លារ និងចំណូលប្រមូលបានពីនិវាសនជនតាមវិធីសាស្រ្តគិតអាករជំនួស(VAT Reverse Charge)មានចំនួន ២២០,៨៧ពាន់លានរៀល ស្មើនឹង ៥៤,៥៤លានដុល្លារ។

GDT បានបញ្ជាក់ថា៖«ក្នុងបដិវត្តឧស្សាហកម្ម ៤.០ សេដ្ឋកិច្ចឌីជីថលកំពុងមានការរីកលូតលាស់ឥតឈប់ឈរពីមួយឆ្នាំទៅមួយឆ្នាំ ក្នុងនោះការធ្វើពាណិជ្ជកម្មតាមប្រព័ន្ធអេឡិចត្រូនិកក៏មានការកើនឡើងគួរឱ្យកត់សម្គាល់ផងដែរ ពិសេសការធ្វើប្រតិបត្តិការពាណិជ្ជកម្ម រួមទាំងប្រតិបត្តិករថ្នាលអេឡិចត្រូនិក(Electronic platform Operator) ចូលមកក្នុងព្រះរាជាណាចក្រកម្ពុជា»។

បើយោងតាម GDT ការប្រមូលអាករលើតម្លៃបន្ថែមពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិកត្រូវបានចាប់អនុវត្តចាប់តាំងពីខែមេសា ឆ្នាំ២០២២ ដោយចំណូលដែលទទួលបានក្នុងឆ្នាំ២០២២ មានប្រមាណ ៣៧,៦២លានដុល្លារ។

គិតរហូតមកដល់កុម្ភៈ ឆ្នាំ២០២៤ មានក្រុមហ៊ុនចំនួន ៨៤ បានចុះបញ្ជីអាករលើតម្លៃបន្ថែមសាមញ្ញ ដែលមានជាអាទិ៍ Meta, Google, Youtube, Tik Tok, Netflix ជាដើម។ នេះបើយោងតាម GDT៕

Related Topics: