សន្តិសុខសង្គម

ជនមិនស្គាល់មុខ លីបារី ១០៥ សុង ឆ្លងកាត់ច្រកអន្តរជាតិភ្នំដី ត្រូវកម្លាំងគយចាប់បាន

បានផុស

៤៧ វិនាទី មុន

នៅ

ថ្ងៃសៅរ៍ ១៩ កក្កដា ២០២៥

ដោយ

បារីបរទេសចំនួនជាង ២ ប៊ិច ត្រូវបានក្រុមឈ្មួញលីឆ្លងកាត់ឆៅៗ ទាំងកណ្ដាលថ្ងៃ ដោយបន្លំធ្វើជាទំនិញ តែត្រូវកម្លាំងគយ និងកម្លាំងអន្តោប្រវេសន៍ ដែលនៅប្រចាំការមាត់ច្រក ធ្វើការស្ទាក់ចាប់បាន។ ដោយឡែក ក្រុមឈ្មួញដែលលីបារីឆ្លងកាត់ បានទម្លាក់ទំនិញចោល ហើយរត់គេចខ្លួនបាត់ស្រមោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីមានមនុស្សលីបារីឆ្លងកាត់ច្រកអន្តរជាតិភ្នំដី ស្ថិតក្នុងស្រុកសំពៅលូននេះ បានប្រព្រឹត្តឡើងកាលពីវេលាម៉ោង ៣ រសៀល ថ្ងៃទី ១៨ ខែកក្កដា ឆ្នាំ ២០២៥ ដែលច្រកអន្តរជាតិនេះ ប្រឈមជាមួយនឹងស្រុកក្លងហាត ខេត្តស្រះកែវ ប្រទេសថៃ ដោយនៅពេលនោះដែរ គឺមានការសង្ស័យទៅលើយុវជនម្នាក់កំពុងលី និងស្ពាយវត្ថុអ្វីម្យ៉ាងក្នុងថង់ខ្មៅ ឃើញដូច្នេះ សមត្ថកិច្ច បានស្រែកឃាត់ដើម្បីត្រួតពិនិត្យ។ នៅពេលនោះដែរ យុវជនរូបនោះ បានទម្លាក់ថង់ខ្មៅចោល ហើយរត់គេចខ្លួនតែម្ដង។ បន្ទាប់ពីធ្វើការឆែកឆេរ សមត្ថកិច្ច បានរកឃើញបារីចំនួន ១០៥ សុង ស្មើនឹង ២ ប៊ិច ក្រោយពីបារីគេចពន្ធទាំងនេះបម្រុងនាំឆ្លងដែនចេញទៅប្រទេសថៃ។

បើតាមប្រភពក្រៅផ្លូវការមួយចំនួនបាននិយាយថា កន្លងមកបារីដែលមានម៉ាកតិចសាស oris និង ice ត្រូវបានគេនាំចេញតាមច្រករបៀងជាញឹកញាប់ ហើយពេលខ្លះក៏ត្រូវបានយោធាថៃចាប់បាននៅក្បែរបន្ទាត់ព្រំដែនផងដែរ។ បារីទាំងនេះ ភាគច្រើនចេញពីក្នុងស្រុកសំពៅលូនទាំងអស់ ព្រោះនៅទីនោះមានមេឃឈ្មួញធំៗ លក់បារីទាំងនេះ។ បើទោះបីជាបច្ចុប្បន្នមានការរឹតបន្តឹងតាមច្រកទាំងអស់ក៏ដោយ ក៏គេយល់ថា អាចមានចំណុចខ្លះត្រូវដងត្រូវផ្លែជាមួយសមត្ថកិច្ច ទើបបានជាទំនិញនេះឆ្លងកាត់បានដោយរលូន។ ជាក់ស្ដែង ក្រុមឈ្មួញអាចឲ្យអ្នកស៊ីឈ្នួលលីសែងចេញតាមច្រកអន្តរជាតិតែម្ដង ប៉ុន្តែពេលនេះមិនអាចគេចផុតពីក្រសែភ្នែក កម្លាំងគយ និងកម្លាំងអន្តោប្រវេសន៍ច្រកអន្តរជាតិភ្នំដីបានឡើយ៕

អត្ថបទ ៖ សោ និយមរ័ត្ន