ព័ត៌មានអន្ដរជាតិ

រដ្ឋមន្ត្រីក្រសួងថាមពលថៃ ប្រាប់ពលរដ្ឋកុំជ្រួលច្របល់ បើសង្គ្រាមផ្ទុះឡើង អ្នកខាតធំគឺខ្លួនឯង

បានផុស

១២ ខែ មុន

នៅ

ថ្ងៃពុធ ១៦ កក្កដា ២០២៥

ដោយ

ទីប្រឹក្សាឧបនាយករដ្ឋមន្ត្រី និងជារដ្ឋមន្ត្រីក្រសួងថាមពល លោក Pirapan Salirathavibhanga និងជាប្រធានគណបក្ស Ruam Thai Sang Chart បានបង្ហោះសារលើហ្វេសប៊ុករបស់លោក ជុំវិញករណីអតីតយោធាស្ម័គ្រចិត្តដែលបានដាល់ទាហានខ្មែរចំមុខ ដោយនិយាយថា «ស្រឡាញ់ប្រទេសជាតិតែកុំជ្រួលច្របល់ពេក ត្រូវចេះទប់អារម្មណ៍ ចេះអត់ធ្មត់ខ្លះ បើសង្គ្រាមផ្ទុះឡើង ថៃខ្លួនឯងគឺជាអ្នករងគ្រោះខ្លាំងជាងគេ»។

លោក Pirapan Salirathavibhaga ថ្លែងទៅកាន់ហ្វូងមនុស្សនៅឯឧទ្យាន Benjakitti ទីក្រុងបាងកក(រូបភាព៖United Thai Nation Party)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដូចបានរាយការណ៍ក្នុងព័ត៌មានថា ជនកំសាក Sommai Srisukranan ដែលបានដាល់ទាហានខ្មែរនៅតំបន់ប្រាសាទតាមាន់ធំ ត្រូវបានកងទ័ពជើងគោកថៃ អះអាងថា ជាអតីតយោធាស្ម័គ្រចិត្ត ដែលបច្ចុប្បន្នកាន់តំណែងជាប្រធានក្លឹបយោធាស្ម័គ្រចិត្ត Pak Thong Chai និងជាប្រធានបណ្តាញអតីតយុទ្ធជនខេត្ត សាមុតសាខន។

ក្រោយហេតុការណ៍នេះកើតឡើង ទាំងជនជាតិថៃនិងកម្ពុជា បានសម្រុកចូលការបញ្ចេញមតិខុសៗគ្នាជាច្រើន។ ប៉ុន្តែលោក Pirapan បានពន្យល់យ៉ាងក្បោះក្បាយតាមរយៈឃ្លិបដែលបានកើតឡើងថា ពេលដែលបានចុះផ្សាយការវិនិច្ឆ័យពីសំលៀកបំពាក់ជនល្មើស ធ្វើឲ្យគេឃើញយល់ថាជនល្មើសជាទាហាន។ ជាពិសេសកាយវិការដែលមើលទៅ គាត់កំពុងចាប់ដៃជាមួយទាហានខ្មែរ ហើយទាហានខ្មែរក៏មិនបានបង្ហាញកាយវិការគំរាមកំហែងអ្វីឡើយ។ ប៉ុន្តែត្រូវបានគេដាល់ ពេលឈោងទៅចាប់ដៃ។ នៅក្នុងរូបភាពនេះ លោកគិតថា ថៃកំពុងមានគុណវិបត្តិនៅក្នុងក្រសែភ្នែករបស់ពិភពលោក ខណៈដែលប្រព័ន្ធផ្សព្វផ្សាយពិភពលោកផ្សាយថា យោធាថៃគឺជាអ្នកឈ្លានពានកម្ពុជាមុន។ ជាពិសេស រូបភាពនៃព្រឹត្តិការណ៍នេះ រួមទាំងការស្លៀកពាក់របស់ជនល្មើស នឹងធ្វើឲ្យការចោទប្រកាន់ មានភាពជឿជាក់កាន់តែខ្លាំងឡើង។

អ្វីដែលពិភពលោកអារម្មណ៍ចាប់ធំជាងគេ ពោលគឺ ជនល្មើសបានរត់គេចខ្លួនយ៉ាងលឿនទៅខាងភាគីថៃ។ តាមដែលលោកអាចមើលឃើញបង្ហាញថា បង្កហេតុរួចបែរជាគេចបាត់ស្រមោល ដោយទុកឲ្យទាហានថៃនិងខ្មែរប្រឈមមុខដាក់គ្នា ដែលនោះកាន់តែមានបញ្ហាក្ដៅក្រហាយលើសមុន ចូរគិតថា តើវាមានតម្លៃដែរឬទេ?

ចំពោះបញ្ហាព្រំដែនកម្ពុជា-ថៃ លោកបានផ្តល់យោបល់ថា ថៃគួរអត់ធ្មត់ និងអធ្យាស្រ័យឲ្យគ្នាទៅវិញទៅមក។ ក្នុងករណីបែបនេះ ព្រោះបើមានសង្គ្រាមឬសមរភូមិកើតឡើង នោះនឹងមានការខូចខាតទាំងសងខាង។ ជាពិសេសប្រទេសថៃ ដែលបច្ចុប្បន្នមានមូលដ្ឋានសេដ្ឋកិច្ចនិងចំណូលគួរសម។ បើមានសង្គ្រាម តម្លៃនៃការខូចខាតសេដ្ឋកិច្ចរបស់យើង វានឹងកើនឡើងតាមធម្មជាតិ។ លោកក៏ចង់ចង្អុលបង្ហាញទៅកាន់ស្ថានការណ៍ដែលមានការផ្លាស់ប្តូរនាពេលបច្ចុប្បន្ន ដែលមិនបានផ្តល់ផលប្រយោជន៍ដល់ថៃ ពីការធ្វើសង្រ្គាមទាល់តែសោះ។

រដ្ឋមន្ត្រីក្រសួងថាមពលរូបនេះក៏បានបញ្ចាក់បន្ថែមទៀតថា បើទោះបីជាថៃឈ្នះលើសមរភូមិនេះក៏ពិតមែន តែថៃនឹងបាត់បង់កម្លាំងពលកម្ម និងធនធានហិរញ្ញវត្ថុ បូកផ្សំជាមួយនឹងសេដ្ឋកិច្ចជាតិក៏អន់ថយ ហើយក៏គ្មានផលចំណេញអីត្រឹមរបស់អស់ហ្នឹងដែរ! ដរាបណាថៃខ្លួនឯងអាចរក្សារបស់ដែលមានស្រាប់ នោះគឺគ្រប់គ្រាន់ហើយ! មិនបាច់បន្ថែមដោយការសង្គ្រាមជាមួយគ្នាទេ។

ទោះជាយ៉ាងណាក៏ដោយ ការលើកឡើងរបស់ប្រធានគណបក្ស Ruam Thai Sang Chart ស្របពេលដែល កាលថ្ងៃទី១៥ ខែកក្កដា ស្រាប់តែមានប៉ះទង្គិចគ្នានូវពាក្យសម្ដីរវាងស្រ្តីខ្មែរដ៏ក្លាហានម្នាក់បានស្រែក និងចង្អុលដាក់ទាហានខ្មាំងថៃថា «នេះជាប្រាសាទខ្មែរ ហើយនៅលើដីខ្មែរ» ដោយនាំឲ្យភាគីជនជាតិថៃរត់ប្រសាចគ្នា នៅឯតំបន់ប្រសាទតាមាន់ធំដូចជាមានរឿងធំកើតឡើង។

ជាងនេះទៅទៀត ប្រព័ន្ធផ្សព្វផ្សាយក្នុងប្រទេសថៃជាច្រើន បានព្យាយាមចុះផ្សាយបំប៉ោងព័ត៌មានហួសពីការពិត ដែលចោទមកកម្ពុជាថា ជាអ្នកបង្ករឿងមុន ទាំងដែលភាគីខ្លួនបានគំរាមកំហែង និងស្រែកសម្លុតមិនឲ្យប្រជាជាជនកម្ពុជាឡើងប្រសាទតាមាន់ធំឡើយ៕