ព័ត៌មានអន្ដរជាតិ

អ្នកជំនាញ៖ ក្រុមហ៊ុនតៃវ៉ាន់កំពុងផ្លាស់ប្តូរខ្សែសង្វាក់ផ្គត់ផ្គង់ទៅឥណ្ឌា ដោយងាកចេញពីចិន

បានផុស

២ years មុន

នៅ

ថ្ងៃពុធ ១៧ កក្កដា ២០២៤

ដោយ

ប្រធានក្រុមប្រឹក្សាអភិវឌ្ឍន៍ពាណិជ្ជកម្មនៅបរទេសរបស់តៃវ៉ាន់ លោក James Huang បាននិយាយថា ក្រុមហ៊ុនតៃវ៉ាន់កំពុងផ្លាស់ប្តូរខ្សែសង្វាក់ផ្គត់ផ្គង់របស់ខ្លួនទៅកាន់ឥណ្ឌា ដោយងាកចេញពីចិន ស្របពេលដែលក្រុងតៃប៉ិ និងញូវដេលីពង្រឹងទំនាក់ទំនងសេដ្ឋកិច្ចជាមួយគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់ទីភ្នាក់ងារសារព័ត៌មានរ៉យទ័រក្នុងបទសម្ភាសន៍កាលពីថ្ងៃចន្ទថា ជម្លោះពាណិជ្ជកម្មរវាងសហរដ្ឋអាមេរិក និងចិន បានជំរុញឱ្យក្រុមហ៊ុនតៃវ៉ាន់បង្កើនការដាក់ការវិនិយោគផ្ទាល់ពីបរទេស (FDI) នៅឥណ្ឌា ដល់ជាង ៦៦៥ លានដុល្លារ ក្នុងរយៈពេល ៥ ឆ្នាំ ត្រឹមឆ្នាំ ២០២៣។ ក្នុងទសវត្សរ៍ ២០០៦-២០១៧ FDI របស់តៃវ៉ាន់នៅឥណ្ឌា មានត្រឹមតែជិត ២៧៧ លានដុល្លារប៉ុណ្ណោះ។

លោក Huang បាននិយាយបន្ថែមថា៖ «វាជាភស្តុតាងដែលថាក្រុមហ៊ុនតៃវ៉ាន់កាន់តែច្រើន កំពុងផ្លាស់ប្តូរខ្សែសង្វាក់ផ្គត់ផ្គង់ចេញពីប្រទេសចិន ទៅឥណ្ឌាវិញ»។

គួរគូសបញ្ជាក់ថា ដូចប្រទេសភាគច្រើនដែរ ឥណ្ឌាមិនមានទំនាក់ទំនងផ្លូវការជាមួយតៃវ៉ាន់ ប៉ុន្តែប្រទេសទាំង២បានបង្កើតទំនាក់ទំនងពាណិជ្ជកម្មយ៉ាងជិតស្និទ្ធ ដោយឥណ្ឌាចាប់អារម្មណ៍លើការវិនិយោគបន្ថែមទៀតលើវិស័យផលិតបន្ទះឈីបដ៏សំខាន់ ដើម្បីជួយដល់កិច្ចខិតខំប្រឹងប្រែងរបស់ខ្លួនក្នុងការជំរុញផលិតកម្ម។

ចិនទាមទារតៃវ៉ាន់ថាជាផ្នែកមួយនៃទឹកដីរបស់ខ្លួន ប៉ុន្តែកោះនេះបដិសេធយ៉ាងម៉ឺងម៉ាត់។ លើសពីនេះ ឥណ្ឌាដែលជាប្រទេសជិតខាង ក៏មិនសូវចុះសម្រុងជាមួយចិន ពាក់ព័ន្ធនឹងជម្លោះព្រំដែនដែលបានបន្តអូសបន្លាយយ៉ាងរ៉ាំរៃ។

នៅឆ្នាំ ២០២៤ នេះ ក្រុមហ៊ុនបន្ទះឈីបតៃវ៉ាន់ Powerchip Semiconductor Manufacturing Corp បានចាប់ដៃគូជាមួយក្រុមហ៊ុន Tata Group របស់ឥណ្ឌា ដើម្បីសាងសង់រោងចក្រផលិតបន្ទះឈីបនៅរដ្ឋ Gujarat ដោយផ្អែកលើគម្រោងលើកទឹកចិត្តតម្លៃ ១០ ប៊ីលានដុល្លាររបស់រដ្ឋាភិបាលឥណ្ឌា ដែលមានបំណងទាក់ទាញក្រុមហ៊ុនផលិតបន្ទះឈីប។

លោក Huang បាននិយាយថា៖ «យើងមានកម្មវិធីដើម្បីនាំយកនិស្សិតឥណ្ឌាទៅបណ្តុះបណ្តាលនៅតៃវ៉ាន់ក្នុងវិស័យបន្ទះឈីប ដែលនឹងត្រួសត្រាយផ្លូវសម្រាប់កិច្ចសហប្រតិបត្តិការនាពេលអនាគតរបស់យើង»៕