អ្នកជំនាញអះអាង តម្លៃមាសក្នុងស្រុក នឹងហក់ឡើងដល់ ៣ ៥០០ ទៅ ៣ ៧០០ ដុល្លារ ក្នុងមួយតម្លឹង

អ្នកជំនាញនៅក្នុងវិស័យហិរញ្ញវត្ថុបានអះអាងថា តម្លៃហាងឆេងមាសមាននិន្នាការកើនឡើង បន្ទាប់​​ពីការកាន់តំណែងរបស់លោក ដូណាល់ ត្រាំ ប្រធានាធិបតីសហរដ្ឋអាមេរិក។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities​ ប្រាប់​​កម្ពុជាថ្មីនៅថ្ងៃទី ៣១ ខែមករា ឆ្នាំ ២០២៥ នេះថា តម្លៃហាងឆេងមាស​នឹងបន្ត​ហក់​ឡើងដល់ ៣ ០០០ ដុល្លារ ក្នុងមួយអោន ឬស្មើនឹង ៣ ៥០០ ទៅ ៣៧០០ ដុល្លារ នៅកម្ពុជា។

ហាងឆេងមាសកំពុងជួញដូរនៅថ្ងៃទី ៣១ ខែមករា ឆ្នាំ ២០២៥នេះក្នុងតម្លៃ ២ ៧៩០ ដុល្លារ ក្នុងមួយអោន នៅក្នុងទីផ្សារអន្តរ​ជាតិ ឬស្មើនឹង ៣ ៣៦១ ដុល្លារ ក្នុងមួយតម្លឹងនៅកម្ពុជា។ សម្រាប់តម្លៃមាសនៅតាមបណ្ដាហាងនានាក្នុងរាជធានីភ្នំពេញលក់ចេញក្នុងតម្លៃ ៣៣២ ដុល្លារ ក្នុងមួយជី។

បើតាមលោក ឡុង សំណាង តម្លៃមាសនឹងបន្តកើនឡើងទៀត ដោយសារភាពមិន​ច្បាស់លាស់​ក្នុងការផ្លាស់ប្ដូរថ្នាក់ដឹកនាំរដ្ឋាភិបាលសហរដ្ឋអាមេរិក ក្រោមការចាត់ចែងរបស់ប្រធានាធិបតីថ្មី លោក ដូណាល់ ត្រាំ។

ម្យ៉ាងទៀត ការដាក់សម្ពាធ​ពន្ធ​របស់​​លោក ដូណាល់ ត្រាំ ទៅលើប្រទេស ក៏ដូចជាវិនិ​យោគិន​ធំៗ​មួយចំនួន ដែលនាំចូល​ទៅអា​មេរិក កត្តានេះនាំឱ្យថ្លៃទំនិញ និងអតិផរណាកើន​ឡើងផង​ដែរ។

លោក ឡុង សំណាង បញ្ជាក់ថា៖ «គោលនយោបាយហិរញ្ញវត្ថុធនាគារកណ្ដាលអាមេរិក កំពុង​ស្ថិតក្នុងអត្រាការប្រាក់មួយខ្ពស់ ២០២៥ នេះ ធនាគារកណ្ដាលអាមេរិក ក៏នឹងអាច​បន្ធូរ​បន្ថយ​នូវ​អត្រាការប្រាក់បន្ថែមតៀត ដែលរុញច្រានឱ្យរូបិយបណ្ណដុល្លារធ្លាក់ចុះ ហើយតម្លៃហាងឆេង​មាសនឹងកើនឡើងដោយស្វ័យប្រវត្តិ»។

លោក ឡុង សំណាង បានបន្ថែមថា ភាពមិនច្បាស់លាស់នៃភូមិសាស្ត្រនយោបាយ សង្គ្រាម ឬវិវាទ​របស់​ប្រទេសមួយចំនួន អាចនឹងកើតឡើងនៅក្នុងឆ្នាំ ២០២៥ បន្តទៀត ដែលរុញច្រាន​ឱ្យ​មាស​កើន​ឡើងដែរ៕

អត្ថបទ៖ ឡេង ដេត