កំណើនសេដ្ឋកិច្ចកម្ពុជារំពឹងសម្រេចបានក្នុងអត្រា ៦,៥% ក្នុងរយៈពេលខ្លី និងមធ្យម

រាជរដ្ឋាភិបាលកម្ពុជាមានសុទិដ្ឋិនិយមខ្ពស់ថា នៅក្នុងរយៈពេលខ្លី និងមធ្យមខាងមុខ​កំណើន​សេដ្ឋកិច្ច​​​កម្ពុជាអាចមានលទ្ធភាពសម្រេចបានក្នុងរង្វង់ ៦,៥% ជាមធ្យមប្រចាំឆ្នាំ ដែលជំរុញ​ដោយ​​ការនាំចេញ ដូចជាវិស័យកាត់ដេរ កម្មន្តសាល ទេសចរណ៍ និងកសិកម្ម។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍នៅក្នុង​ពិធីបើក​សន្និសីទ​ចក្ខុវិស័យប្រទេស​កម្ពុជា ឆ្នាំ២០២៥ ស្ដីពី «យុទ្ធសាស្ដ្រកំណើនថ្មីរបស់កម្ពុជា អាទិភាព​សម្រាប់ការអភិវឌ្ឍប្រកបដោយគុណភាព និងនិរន្ដរជាតិ» នៅព្រឹកថ្ងៃទី ០៤ ខែមីនា ឆ្នាំ ២០២៥ថា កំណើនសេដ្ឋកិច្ចនេះ នឹងមិនកើតឡើងដោយ​ឯកឯងនោះទេ ប៉ុន្តែទាមទារការ​ខិតខំប្រឹងប្រែងពីគ្រប់ភាគីពាក់ព័ន្ធ មិនត្រឹមតែពីសំណាក់​រាជរដ្ឋា​ភិ​​បាល​នោះឡើយនៅក្នុង​ការពង្រឹង​ការអនុ​វត្តគោលនយោបាយកែទម្រង់គន្លឹះៗ។

សម្តេចធិបតី បន្ថែមថា កម្ពុជាអាចសម្រេចបានកំណើនសេដ្ឋកិច្ចក្នុងរង្វង់ ៦,៥% នៅក្នុងទស្សវត្សរ៍​​ខាងមុខ ក្នុងករណីដែលមានការរៀបចំគោលនយោបាយជាក់លាក់ចំៗ និងជាក់ស្ដែង​និយម អមជាមួយនឹងការអនុវត្តប្រកបដោយប្រសិទ្ធិភាព។

បើតាមសម្ដេចនាយករដ្ឋមន្ត្រី បើទោះបីជាសេដ្ឋកិច្ចកម្ពុជាបានវិលទៅរកកំណើន​សក្ដានុពលក៏ពិតមែន ប៉ុន្តែវិបត្តិជំងឺ​កូវីដ១៩ បានបន្សល់ស្លាកស្នាម និងបន្ទុចបង្អាក់ ដល់ល្បឿននៃការអភិវឌ្ឍន៍របស់សង្គមជាតិ។

ម្យ៉ាងទៀត សេដ្ឋកិច្ចសកល និងតំបន់ នៅបន្តស្ថិតនៅអន្តរកាលពហុវិបត្តិ ក្នុងន័យថា វិបត្តិមួយមិនទាន់ចប់ផងវិបត្តិមួយទៀតបានកើតឡើង, សង្គ្រាមមួយមិនទាន់បិទបញ្ចប់ផង សង្គ្រាមមួយទៀតបានកើតឡើង ក្នុងនោះហានិភ័យ និងភាពមិនប្រាកដប្រជាកើតមានឡើងកាន់តែច្រើនឡើងៗរួមមាន ទី១ ការកើនឡើងនូវគោលនយោបាយគាំពាសង្គម និងសង្គ្រាមពាណិជ្ជកម្ម ដែលកំពុងតែកើតមាន។ ទី២ ភាពតានតឹងនៃកត្តាភូមិស្ត្រសេដ្ឋកិច្ច ដែលអាចបន្ទុចបង្អាក់ដល់ចង្វាក់ផ្គត់ផ្គង់សាកល និងនាំដល់ការកើនឡើងនៃថ្លៃទំនិញជាអន្តរជាតិ។ ទី៣ ការបែកខ្ញែកភូមិសាស្ត្រសេដ្ឋកិច្ច និងពាណិជ្ជកម្ម។ ទី៤ ផលប៉ះពាល់កាន់តែធ្ងន់ធ្ងរនៃការប្រែប្រួលអាកាសធាតុ និងគ្រោះធម្មជាតិ។

សម្ដេចធិបតីអះអាងថា អន្តរកាលនៃពហុវិបត្តិនេះ បានធ្វើឱ្យស្ថានភាពសេដ្ឋកិច្ចសកល និងតំបន់មានការផ្លាស់ប្ដូរយ៉ាងឆាប់រហ័ស និងមិនអាចរំពឹងទុកជាមុនបាន ហើយនឹងបង្ករ​ជាកម្មវិបាកទាំងវិជ្ជមាន និងអវិជ្ជមាន ទាំងផ្ទាល់ និងប្រយោដល់សេដ្ឋកិច្ច និងសង្គម​កម្ពុជា​ផងដែរ៊។

កាលពីចុងខែមករា​ ស្ថាប័នមូលនិធិរូបិយវត្ថុអន្តរជាតិ (IMF) បានចេញការវាយតម្លៃកំណើនសេដ្ឋកិច្ចរបស់កម្ពុជាក្នុងឆ្នាំ២០២៤កន្លងមកនេះសម្រេចបានសម្រេចបានក្នុងអត្រា៥,៥ ភាគរយនៅឆ្នាំ ២០២៤ និងកើនដល់ ៥,៨ ភាគរយនៅឆ្នាំ២០២៥ ខណៈអតិផរណានឹងកើនឡើងពី ០,៥ ភាគរយនៅឆ្នាំ ២០២៤ ដល់ ២ ភាគរយនៅឆ្នាំ ២០២៥។

IMF ថា ៖«សេដ្ឋកិច្ច​កម្ពុជា​បាន​បន្ត​ស្ទុះ​ងើប​ឡើង​វិញ បើ​ទោះ​បី​ជា​មាន​ល្បឿន​តិចតួច​ក៏​ដោយ។ យើងព្យាករណ៍ថាកំណើនសេដ្ឋកិច្ច​(GDP) ពិតប្រាកដសម្រេចបានក្នុងអត្រា៥,៥ ភាគរយនៅឆ្នាំ ២០២៤ និងកើនដល់ ៥,៨ ភាគរយនៅឆ្នាំ២០២៥ ខណៈអតិផរណានឹងកើនឡើងពី ០,៥ ភាគរយនៅឆ្នាំ ២០២៤ ដល់ ២ ភាគរយនៅឆ្នាំ ២០២៥»​។

ទោះជាយ៉ាងណាក៏ដោយ IMF ថា៖«ហានិភ័យចំពោះទស្សនវិស័យនេះមានទំនោរធ្លាក់ចុះដោយសារតែពីកត្តាខាងក្រៅ និងភាពងាយរងគ្រោះក្នុងស្រុក រួមទាំងពីការផ្លាស់ប្តូរគោលនយោបាយដោយដៃគូពាណិជ្ជកម្មសំខាន់ៗ ការបែងចែកភូមិសាស្ត្រសេដ្ឋកិច្ច​ និងភាពទន់ខ្សោយបន្តនៅក្នុងវិស័យសំណង់ និងអចលនទ្រព្យ»៕

អត្ថបទ៖ ឡេង ដេត