តម្លៃហាងឆេងមាស បន្តហក់ឡើងសាជាថ្មី

ហាងឆេងមាសនៅក្នុងសប្ដាហ៍នេះ បានហក់ឡើងទៅតម្លៃខ្ពស់សាជាថ្មី ដោយជួញដូរក្នុងតម្លៃ ២៩៤០ ដុល្លារក្នុងមួយអោននៅក្នុងទីផ្សារអន្តរជាតិ ឬស្មើនឹង ៣ ៥៤២ ដុល្លារក្នុងមួយតម្លឹង​នៅក្នុង​ប្រទេស​កម្ពុជា ស្របពេលស្ថានភាពសង្រ្គាមពាណិជ្ជកម្មរវាងប្រទេសមហាអំណាចកាន់តែតានតឹង។

នៅតាមបណ្ដា​ហាងនានានៅរាជធានីភ្នពេញលក់ចេញក្នុងតម្លៃ ៣៥៥  ដុល្លារ ក្នុងមួយជី នៅថ្ងៃទី ១៣ ខែមីនា ឆ្នាំ ២០២៥។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities ប្រាប់​​​កម្ពុជាថ្មីថា ដោយសារការដាក់សម្ពាធ​ពន្ធ​របស់​​លោក ដូណាល់ ត្រាំ ទៅ​លើបណ្ដាប្រទេស​មួយចំនួន បានធ្វើឱ្យតម្លៃមាសនៅតែមាននិន្នា​កាកើនឡើង។

លោក ឡុង សំណាង យល់ឃើញថា៖ «ការកើនឡើង​តម្លៃមាស​គឺពាក់ព័ន្ធនឹងសង្គ្រាម​ពាណិជ្ជកម្ម ជាពិ​សេស​​​គឺការដាក់ពន្ធរបស់លោក ដូណាល់ ត្រាំ ពេលដែលគាត់ដាក់ពន្ធ វាធ្វើឱ្យតម្លៃផលិត​ផល​​ដែល​នាំចូលឡើងថ្លៃ ធ្វើឱ្យរូបិយបណ្ណធ្លាក់ចុះ នាំឱ្យមានអតិផរណា ពេលហ្នឹងលុយដុល្លារចុះ​ថោក ដែលរុញច្រានឱ្យតម្លៃមាសកើនឡើង»។

លោក ឡុង សំណាងអះអាងថា ប្រសិនបើសហរដ្ឋអាមេរិក មិនទាន់មានលំនឹងសេដ្ឋកិច្ចក្នុងការ​ដឹក​​នាំ​ពិភពលោក ឬពាណិជ្ជកម្មរវាងប្រទេស នឹងប្រទេស តម្លៃហាងឆេងមាសអាច​នឹងកើនឡើងដល់ជាង ៤០០០ ដុល្លារ ក្នុងមួយតម្លឹង។

អាជីវករលក់មាសនៅផ្សារធំថ្មី បានបញ្ជាក់ឱ្យដឹងថា ហាងឆេងមាសហក់ឡើងខ្ពស់ សកម្មភាពទិញ-លក់ស្ងប់ស្ងាត់ ដោយសារទំនុកចិត្តអតិថិជន។ យោងតាមអាជីវករ ការកើនឡើងឆាប់រហ័សនេះ ពាក់ព័ន្ធនឹងទីផ្សារអន្តរជាតិ៕

អត្ថបទ៖ ឡេង ដេត