តម្លៃមាសក្នុងស្រុកធ្លាក់ចុះមកនៅ ៣៦៤ ដុល្លារ ក្នុងមួយជី

តម្លៃមាសក្នុងស្រុកបានបន្តធ្លាក់ចុះនៅរយៈពេល ៣ ថ្ងៃ ជាប់ៗគ្នា មកនៅត្រឹម ៣៦៤ ដុល្លារ ក្នុងមួយជី នៅថ្ងៃទី ០៨ ខែមេសា ឆ្នាំ ២០២៥។

តម្លៃហាងឆេងមាសបានបានបើកទីផ្សារនៅព្រឹកថ្ងៃទី ០៨ ខែមេសា ឆ្នាំ ២០២៥ ក្នុងតម្លៃ ២៩៨២ ដុល្លារ ក្នុងមួយអោន នៅលើទីផ្សារអន្តរជាតិ ឬស្មើនឹង ៣៥៩២ ដុល្លារ ក្នុងមួយតម្លឹងនៅក្នុងប្រទេសកម្ពុជា។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities​ បាន​លើកឡើងថា ក្រោយពីការប្រកាសរបស់លោក ដូណាល់ ត្រាំ ប្រធានាធិបតី​សហរដ្ឋអាមេរិក​ពីការ​ដំឡើងពន្ធជាមួយបណ្ដាប្រទេសផ្សេងៗ មាសបានស្ទុះឡើង​ដល់តម្លៃខ្ពស់​មែន ប៉ុន្តែមាសបានដាំ​ក្បាល​ចុះមកវិញជាង ១០០ ដុល្លារ ក្នុងមួយតម្លឹង។

លោក ឡុង សំណាង បញ្ជាក់ថា៖ «ការធ្លាក់ចុះនេះ គឺខ្លាំងមែនទែន គឺពាក់ព័ន្ធជាមួយនឹង វិនិ​យោគិន​ធំៗ ជាធម្មតា ការជួញដូរ​តម្លៃហាងឆេងមាស ពេលដែលយើងមានមាសច្រើន អ្នកវិនិ​យោគធំៗ ឬក៏ធនាគារធំៗ ដែលគេវិនិយោគទៅលើតម្លៃហាងឆេងមាស អញ្ចឹងពេល​ដែលតម្លៃហាង​ឆេងមាសឡើង​ដល់ខ្ពស់ហើយ វិនិយោគិនធំ គេកាត់ចំណេញ​ អញ្ចឹងចំនួន​អ្នកទិញនឹងថយចុះ តម្លៃហាងឆេងមាសនៅសល់តែអ្នកលក់ មាសក៏ចាប់ផ្ដើមធ្លាក់ចុះវិញ»។

លោកបារម្ភខ្លាចបងប្អូនប្រជាពលរដ្ឋខ្មែរ ជួញដូរទៅលើឧបករណ៍​និស្សន្ទ​ ឬគង​តម្លៃ​​ទីផ្សារខាងក្រៅទិញមាសគីឡូ គាត់ឃើញតែ​ឡើងគាត់បុកទិញដល់ពេល វិនិយោគិន​ធំៗ គេលក់មាស​យកចំណេញ គាត់អត់បានដឹងគាត់នឹងខាត៕

អត្ថបទ៖ ឡេង ដេត