សេដ្ឋកិច្ច

អ្នកជំនាញអះអាង តម្លៃហាងឆេងមាសមាននិន្នាការធ្លាក់ចុះ

បានផុស

១ year មុន

នៅ

ថ្ងៃអង្គារ ២៩ មេសា ២០២៥

ដោយ

តម្លៃហាងឆេងមាសក្នុងស្រុកតាមបណ្ដាហាងនានាក្នុងរាជធានីភ្នំពេញនៅថ្ងៃទី ២៩ ខែមេសា ឆ្នាំ ២០២៥ មានតម្លៃ ៤០៥ ដុល្លារ ក្នុងមួយជី ខណៈអ្នកជំនាញអះអាងថា មាសមាននិន្នាការធ្លាក់ចុះ បន្ទាប់ពីអាមេរិកបន្ទន់ជំហរដាក់ចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities ប្រាប់កម្ពុជាថ្មីនៅថ្ងៃអង្គារ៍នេះថា បច្ចុប្បន្នមិនទាន់មានព័ត៌មានណាមួយដែលរុញច្រានឱ្យតម្លៃមាសប្រែប្រួលខ្លាំងនោះទេ បន្ទាប់ពីបញ្ចប់ពាក្យសម្ដីរបស់លោក ដូ ណាល់ត្រាំ ដែលរិះគន់លើលោក Powell ប្រធានធនាគារកណ្ដាលអាមេរិក និងការបន្ទន់ជំហររបស់លោក ត្រាំជាមួយចិន ព្រមទាំងព័ត៌មានបទឈប់បាញ់មួយចំនួន។

លោក ឡុង សំណាង បន្ថែមថា ព័ត៌មានខាងលើ សុទ្ធតែគាំទ្រឱ្យតម្លៃហាងឆេងមាសធ្លាក់ចុះក្រោម ៤ ពាន់ដុល្លារ (៣៩៣៨) ក្នុងមួយតម្លឹង។

លោក ឡុង សំណាង បន្ថែមថា៖ «រាល់ថ្ងៃនេះ ឱ្យតែលោក ដូណាល់ ត្រាំ និយាយ ឬធ្វើសកម្មភាពអ្វីមួយ សុទ្ធតែជះឥទ្ធិពលដល់តម្លៃហាងឆេងមាសទាំងអស់ ព្រោះដោយសារវាពាក់ព័ន្ធជាមួយសេដ្ឋកិច្ចអាមេរិក ពាក់ព័ន្ធប្រាក់ដុល្លារអាមេរិក ហើយតម្លៃហាងនៅលើទីផ្សារអន្តរជាតិ គឺបានផ្គូរផ្គងជាមួយប្រាក់ដុល្លារ ដូច្នេះ នៅពេលដែលគាត់និយាយអ្វីមួយដែលជះឥទ្ធិពលទៅដល់សេដ្ឋកិច្ច ឬលុយរបស់គាត់ បើឥទ្ធិពលហ្នឹងល្អសម្រាប់អាមេរិក ឬលុយដុល្លារ តម្លៃហាងឆេងមាសនឹងបន្តធ្លាក់ទៀត ប៉ុន្តែបើសិនបើគាត់និយាយទៅអាចប៉ះពាល់ដល់សេដ្ឋកិច្ចអាមេរិក ឬសេដ្ឋកិច្ចពិភពលោក ឬវិនិយោគិនធំៗ នឹងធ្វើឱ្យមាសកើនឡើង ព្រោះវាជះឥទ្ធិពលដល់លុយដុល្លារ»។

បើតាមលោក ឡុង សំណាង គោលដៅទៅខាងមុខ ដុល្លារនឹងធ្លាក់ថ្លៃ ដោយសារតែគ្រោងនឹងកាត់អត្រាការប្រាក់ពីលោក ដូណាល់ ត្រាំ ព្រោះអ្នកដែលគិតពីសេដ្ឋកិច្ច ភាគច្រើនគេមិនឱ្យប្រាក់ដុល្លារក្នុងប្រទេសគេថ្លៃទេ ដើម្បីបង្កើនការនាំចេញ។

មាស ដែលគេរាប់ថាជាទ្រព្យសម្បត្តិសុវត្ថិភាពពេលមានភាពមិនប្រាកដប្រជាផ្នែកនយោបាយ និងហិរញ្ញវត្ថុ បានកើនឡើងច្រើនជាង ២៦ ភាគរយ ចាប់តាំងពីដើមឆ្នាំ ២០២៥ ដែលត្រូវបានជំរុញដោយការទិញរបស់បណ្ដាធនាគារកណ្តាល ការភ័យខ្លាចសង្គ្រាមពន្ធ និងតម្រូវការវិនិយោគខ្លាំង៕