ការនាំចេញទំនិញពីតំបន់សេដ្ឋកិច្ចពិសេសភ្នំពេញ មានទំហំជាង ៤០០ លានដុល្លារ ក្នុង​ត្រីមាសទី១

នៅក្នុងត្រីមាសទី១ ឆ្នាំ ២០២៥ ការនាំចេញទំនិញពីតំបន់សេដ្ឋកិច្ចពិសេស រ៉ូយ៉ាល់ ភ្នំពេញ សម្រេចបាននូវទំហំទឹកប្រាក់ ៤៣១ លានដុល្លារ កើនឡើង ៨.៦% ពីទំហំ ៣៩៧ លានដុល្លារ ក្នុងរយៈពេល​ដូចគ្នា​កាលពីឆ្នាំមុន។

លោក ហាក់ សិរី ប្រធានជាន់ខ្ពស់ផ្នែកទីផ្សារ និងទំនាក់ទំនងសាធារណៈក្រុមហ៊ុន​តំបន់សេដ្ឋកិច្ច​ពិសេស​រ៉ូយ៉ាល់ភ្នំពេញ​បានលើកឡើងថា រោងចក្រដែលចូលមក​វិនិយោគនៅក្នុងតំបន់សេដ្ឋកិច្ច​ពិសេសរ៉ូយ៉ាល់​ភ្នំពេញ សុទ្ធសឹងជាក្រុមហ៊ុនមានបទពិសោធន៍យូរឆ្នាំ ដែលអាចផ្ដល់ចំណេះ​ជំនាញ​​ដល់ពលករកម្ពុជា។

មិនត្រឹមតែផ្ដល់ចំណេះដឹង ក្រុម​ហ៊ុនបាននាំយកនូវការងារ ដែលជាប្រភពចំណូលដល់ពលករ​មាន​លក្ខណៈ​សមរម្យ និងបរិយា​កាស​ការងារល្អ ក្នុងឧស្សាហូបនីយកម្មកម្ពុជា។

បច្ចុប្បន្នតំបន់សេដ្ឋកិច្ចពិសេសភ្នំពេញ មានបុគ្គលិកកម្មករ សរុបប្រមាណ ៥ ម៉ឺននាក់ កំពុង​បម្រើ​ការ​ងារក្នុង តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ និងតំបន់សេដ្ឋកិច្ចពិសេស រ៉ូយ៉ាល់ គ្រុប ខេត្តកណ្តាល។

គិតត្រឹមខែមេសា ឆ្នាំ២០២៥នេះ តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ បានទទួល​បុគ្គលិក​កម្មករឲ្យចូលបម្រើការងារចំនួន ៤៨,៧៣០រូប រីឯខាងតំបន់សេដ្ឋកិច្ចពិសេស រ៉ូយ៉ាល់ គ្រុប ខេត្តកណ្តាល ដែលជាបុត្រ​សម្ព័ន្ធនៃក្រុមហ៊ុន រ៉ូយ៉ាល់ គ្រុប ភ្នំពេញ កំពុង​ទទួល កម្មករ​ចំនួន ២,០១៦រូប សរុបទាំងអស់គឺចំនួន ៥០,៧៤៦នាក់។

លើសពីនេះទៅទៀត មានបុគ្គលិក​ជំនាញ​ជាជនជាតិបរទេស ៨០២ នាក់ ផ្សេងទៀត ដែលមក​ពី​បណ្តា​​ប្រទេសចំនួន១៣។

អ្នកឧកញ៉ា គិត ម៉េង ប្រធានក្រុមប្រឹក្សាភិបាល នៃក្រុមហ៊ុន រ៉ូយ៉ាល់ គ្រុប មានប្រសាសន៍ថា តួលេខនេះ ឆ្លុះបញ្ចាំងពីវត្តមានដ៏សំខាន់របស់តំបន់សេដ្ឋកិច្ចពិសេសទាំងនៅលើឆាកអន្តរជាតិ និងការប្រមូលផ្តុំនូវចំណេះជំនាញពីគ្រប់ទិសទី ចូលរួមចំណែកដល់ការអភិវឌ្ឍ របស់តំបន់ទាំង​ពីរនេះផងដែរ។

ម្យ៉ាងទៀត កំណើននៃការនាំចេញ​ក៏បានបង្ហាញពីការរីកចម្រើន​របស់តំបន់​សេដ្ឋកិច្ចពិ​សេស​ទាំងពីរក្នុងនាមជា គោលដៅ វិនិយោគឈានមុខគេនៅកម្ពុជា។

បច្ចុប្បន្ននេះ តំបន់ទាំងពីរទទួលបានការវិនិយោគពីសំណាក់ ១១៧ក្រុមហ៊ុន មកពី ១៤ប្រទេស​ជុំវិញពិភពលោក ដែលបានពាំនាំនូវការវិនិយោគលើវិស័យផលិតកម្ម មានដូចជា ការតម្លើង​រថ​យន្ត និងផលិតគ្រឿង បន្លាស់នានា គ្រឿងអគ្គិសនី និងអេឡិកត្រូនិក សម្លៀកបំពាក់ ចំណី​អា​ហារ​និងភេសជ្ជៈ និងឧបករណ៍សម្ភារៈប្រើប្រាស់ក្នុងផ្ទះ។

អ្នកឧកញ៉ា គិត ម៉េង រីករាយដែលបានចូលរួមចំណែក​អភិវឌ្ឍប្រទេសជាតិ ដែលនាំឲ្យជីវភាពរស់នៅរបស់បងប្អូនកម្មករ កម្មការិនី និងក្រុម គ្រួសារពួក​គាត់មានភាពល្អប្រសើរឡើង និងនាំឲ្យវិស័យឧស្សាហកម្មកាន់តែមានពិពិធកម្ម​ថែមមួយ​កម្រិត​ទៀត​។

នៅក្នុងឆ្នាំ ២០២៤ ការនាំចេញទំនិញពីតំបន់សេដ្ឋកិច្ចពិសេស រ៉ូយ៉ាល់ ភ្នំពេញ មានទំ​ហំ​ទឹក​ប្រាក់​ជិត ២ ពាន់លានដុល្លារ (១,៩) ដែលជាកំណត់ត្រាខ្ពស់មិនធ្លាប់មាន។

វិស័យឧស្សាហកម្មត្រូវបានព្យាករណ៍ថា នឹងបន្តនិន្នាការកើនឡើងក្នុងរង្វង់ ៨,៦% ក្នុងឆ្នាំ ២០​២៥ ដោយគាំទ្រដោយការរក្សាបានតុល្យភាពនៃអនុវិស័យកាត់ដេរ និងអនុវិស័យកម្មន្តសាល​មិន​មែនកាត់ដេរ៕

អត្ថបទ៖ ឡេង ដេត