សេដ្ឋកិច្ច

ការនាំចេញពីតំបន់សេដ្ឋកិច្ចពិសេស រ៉ូយ៉ាល់ ភ្នំពេញ សម្រេចបានជាង ៨០០ លានដុល្លារ កើនឡើងជិត ៤០%

បានផុស

២ ខែ មុន

នៅ

ថ្ងៃសុក្រ ២២ ឧសភា ២០២៦

ដោយ

ការនាំចេញទំនិញពីតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ ) និង រ៉ូយ៉ាល់ គ្រុប កណ្តាល (RGKSEZ) សម្រេចបាននូវទំហំទឹកប្រាក់ជាង ៨០៩ លានដុល្លារ នៅក្នុងរយៈពេល ៤ ខែ (មករា-មេសា) ២០២៦ កើនឡើងជិត ៥៨០ លានដុល្លារ ស្មើនឹង ៣៩,៥% ប្រៀបធៀបនឹងរយៈពេលដូចគ្នានៅក្នុងឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កំណើននេះឆ្លុះបញ្ចាំងពីទំនុកចិត្ត របស់អ្នកវិនិយោគមកលើប្រទេសកម្ពុជា និងការពង្រីកប្រតិបត្តិការនៃសហគ្រាសនានា នៅក្នុងតំបន់ សេដ្ឋកិច្ចពិសេសទាំងពីរនេះ។

អ្នកឧកញ្ញ៉ា គិត ម៉េង ប្រធានក្រុមប្រឹក្សាភិបាលនៃ ក្រុមហ៊ុន រ៉ូយ៉ាល់ គ្រុប ភ្នំពេញ មានប្រសាសន៍ថា៖ «កំណើនជាបន្តបន្ទាប់នៃតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ និងរ៉ូយ៉ាល់ គ្រុប កណ្តាល ឆ្លុះបញ្ចាំងពីទំនុកចិត្តរបស់វិនិយោគិន ចំពោះអនាគតសេដ្ឋកិច្ចរបស់កម្ពុជា និងការប្តេជ្ញាចិត្តរបស់ភាគីពាក់ព័ន្ធទាំងអស់ ក្នុងការធ្វើការរួមគ្នា ដើម្បីពង្រឹងប្រព័ន្ធអេកូឡូស៊ីឧស្សាហកម្ម»។

ការនាំចេញរបស់តំបន់សេដ្ឋកិច្ចពិសេសទាំងពីរ នៅតែបន្តបង្ហាញពីសន្ទុះកំណើន ដ៏ខ្លាំងក្លា ដោយបានរួមចំណែកដល់ការអភិវឌ្ឍវិស័យឧស្សាហកម្ម ការបង្កើតការងារ និងបង្កើនការនាំចេញរបស់ប្រទេសកម្ពុជា។

គិតត្រឹមខែមេសា ឆ្នាំ២០២៦ ចំនួនបុគ្គលិកកម្មករសរុបដែលកំពុងបម្រើការងារនៅក្នុងតំបន់ទាំងពីរ RGPPSEZ និង RGKSEZ បានកើនឡើងដល់ ៥៨,៥៣២ នាក់ ដែលតំណាងឱ្យការកើនឡើងប្រមាណ ១៥.៣% បើធៀបនឹងចំនួនបុគ្គលិកកម្មករ ៥០,៧៤៦ នាក់ ដែលបានកត់ត្រាក្នុងខែមេសា ឆ្នាំ២០២៥ កន្លងទៅ។

នៅក្នុងឆ្នាំ ២០២៥ ការនាំចេញទំនិញពីតំបន់សេដ្ឋកិច្ចពិសេស រ៉ូយ៉ាល់ ភ្នំពេញ (RGPPSEZ ) សម្រេចបាននូវទំហំទឹកប្រាក់ ២,១៥ ពាន់លានដុល្លារ តំណាងឱ្យ ៧% នៃតម្លៃនាំចេញសរុបរបស់កម្ពជា៕