សមាគមទុរេនវៀតណាម ស្នើឱ្យរដ្ឋាភិបាលកំណត់ចម្ការទុរេនដែលប្រើថ្នាំ ជាតំបន់ប្រយ័ត្នខ្ពស់

ចំពេលដែលចិនរឹតត្បឹតការត្រួតពិនិត្យទុរេននាំចូលពីប្រទេសវៀតណាមជុំវិញការប្រើប្រាស់ថ្នាំគីមី សមាគម​ធុរេន​វៀតណាម​នៅខេត្ត ដាក ឡាក់ ​បានស្នើឱ្យរដ្ឋាភិបាលកំណត់​ចម្ការដែលប្រើប្រាស់សារធាតុគីមីហាមឃាត់ជា «តំបន់ត្រូវប្រុងប្រយ័ត្នក្រហម»។ នេះបើតាមការចុះផ្សាយរបស់កាសែត VnExpress។

ប្រធានសមាគមលោក Vu Duc Con បាននិយាយ​ក្នុងលិខិតមួយផ្ញើទៅកាន់ក្រសួងកសិកម្ម និងបរិស្ថានវៀតណាម ថា ការពិនិត្យ​យ៉ាងម៉ត់ចត់លើតំបន់ដាំដុះទុរេន និងកន្លែងវេចខ្ចប់ គឺតម្រូវការចាំបាច់ដើម្បីកំណត់អត្តសញ្ញាណ​កន្លែងដែលប្រើប្រាស់សារធាតុហាមឃាត់។

លិខិតបាន​និយាយទៀតថា ​កន្លែង​ដែលបានរកឃើញថាបំពានលើពិធីសារ គួរតែ​ដាក់ផ្លាក «ប្រយ័ត្នពណ៌ក្រហម» ​ហើយបន្ទាប់មក​ រដ្ឋាភិបាលចាំបាច់ត្រូវបង្កើតដំណើរការស្តារឡើងវិញ ដើម្បីធានាថាពួកគេទទួលយកការអនុវត្តកសិកម្មប្រកបដោយសុវត្ថិភាព និងនិរន្តរភាព។

សំណើ​ចុងក្រោយនេះ ធ្វើឡើង​ក្រោយមាន​ការព្រមានម្តងហើយម្តងទៀតពីគយចិនចាប់តាំងពីចុងឆ្នាំ ២០២៤ អំពីទុរេនវៀតណាម ដែលមានផ្ទុកសារធាតុ កាដមីញ៉ូម (Cadmium) ដែលជាសារធាតុលោហៈពុល។ សំណាកទុរេនខ្លះ ក៏មានផ្ទុកសារធាតុ អារ៉ាមីន អូ  (Auramine O) ដែលជាសារធាតុគីមីហាមឃាត់បង្កជំងឺមហារីក។

គួរគូស​បញ្ជាក់ថា ការរឹតបន្តឹង និងការព្រមានរបស់ចិន បាន​ធ្វើឱ្យវៀតណាមជួបឧបសគ្គក្នុងការនាំចេញទុរេនទៅចិន ដែលជាទីផ្សារទុរេនដ៏ធំបំផុតតែមួយគត់របស់​ខ្លួន។ ការណ៍នេះ ធ្វើឱ្យនាំចេញទុរេនវៀតណាមធ្លាក់ចុះជាគំហុក និងចាល់សម្រាប់តម្រូវការក្នុងស្រុក ជាហេតុធ្វើឱ្យ​តម្លៃទុរេនធ្លាក់ចុះខ្លាំងដូចគ្នា។

យោងតាមក្រសួងកសិកម្ម​ ការនាំចេញទុរេនរបស់វៀតណាមទៅកាន់ប្រទេសចិនក្នុងរយៈពេល ៤ ខែដំបូងនៃឆ្នាំ ២០២៥ បានធ្លាក់ចុះ ៧៤ ភាគរយ ធៀបនឹងរយៈដូចគ្នាកាលពីឆ្នាំមុន មកត្រឹម ១៣០ លា​នដុល្លារ។ ​

បើតាមមន្រ្តីវៀតណាម ​ប្រទេសនេះមានចម្ការទុរេនលើផ្ទៃដីជាង ១៥០ ០០០ ហិកតា ប៉ុន្តែក្នុងចំណោមនោះ មាន​ត្រឹមតែ ២០ ភាគរយ ប៉ុណ្ណោះ ដែល​មាន​ការបញ្ជាក់ត្រឹមត្រូវសម្រាប់ការនាំចេញ។ ចម្ការភាគច្រើន មិនបានបំពេញតាមបទប្បញ្ញត្តិបច្ចេកទេស និងស្ដីពីការប្រើប្រាស់ថ្នាំសម្លាប់សត្វល្អិត៕ ​