តម្លៃមាសក្នុងស្រុកធ្លាក់ចុះក្រោម ៤ ពាន់ដុល្លារ មួយតម្លឹង

អ្នកជំនាញនៅក្នុងវិស័យហិរញ្ញវត្ថុបានប្រាប់ឱ្យដឹងថា ហាងឆេងមាសបានបើកផ្សារនៅក្នុងតម្លៃ ៣៩៥០ ដុល្លារ ក្នុងមួយតម្លឹង នៅព្រឹកថ្ងៃច័ន្ទនេះ បន្ទាប់​​​ពីបានធ្លាក់ចុះជាបន្តបន្ទាប់កាលពីសប្ដាហ៍មុន។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បាន​ឱ្យ​ដឹងនៅថ្ងៃច័ន្ទទី ៣០ ខែមិថុនា ឆ្នាំ​ ២០២៥ នេះថា ទំនោរតម្លៃ​ហាងឆេងមាសបានធ្លាក់ចុះក្រោម ៤ ពាន់ដុល្លារ​ ក្នុងមួយតម្លឹង កាល​ពី​​សប្ដាហ៍មុន បន្ទាប់ពីពីធនាគារកណ្ដាលសហរដ្ឋអា​មេរិក ​សម្រេច​​រក្សា​អត្រាការប្រាក់ ៤,៥​% ដដែល ទោះបីលោកដូណាល់ ត្រាំ ចង់ឱ្យទម្លាក់​អត្រា​ការ​ប្រាក់​។

ទោះយ៉ាងណា លោក ឡុង សំណាង យល់ថា តម្លៃមាសនៅតែស្ថិតក្នុងតម្លៃខ្ពស់ដដែល ហើយ​អាច​​នឹងហក់ឡើងវិញ ប្រសិនបើសង្គ្រាមអ៊ីស្រាអែល និងអ៊ីរ៉ង់នៅតែបន្តអូសបន្លាយ។

ទោះជាយ៉ាងណា លោក ឡុង សំណាង យល់ថា៖ «នៅក្នុងឆ្នាំ ២០២៥ ខ្ញុំមើលឃើញ​កត្តាមួយចំនួន ដែលអាច​ធ្វើឱ្យតម្លៃហាងឆេងមាសបន្តកើនឡើង ទី១ អត្រាការប្រាក់នៅខ្ពស់ គេអាចនឹងកាត់​បន្ថយអត្រា​ការ​ប្រាក់ លុយដុល្លារអាមេរិកនឹងធ្លាក់ចុះ»។

សម្ពាធពន្ធហាក់បីដូចជាស្ងាត់បន្តិច ប៉ុន្តែវាមិនទាន់ចប់សព្វគ្រប់ និងកំណត់ពន្ធបានត្រឹម​ត្រូវនៅឡើយទេ ដរាបណាមានលោក ដូណាល់ ត្រាំ​ ជាប្រធានាធិបតី​អាមេរិក តម្លៃមាស​នៅតែកើនឡើង។

សង្គ្រាមរុស្ស៊ី-អ៊ុយក្រែន មិនទាន់មានសញ្ញាបញ្ជាក់ថា សន្តិភាព ព្រមទាំង​បណ្ដាប្រទេស​មួយចំ​នួន​ទៀត ដូចជាអ៊ីរ៉ង់-អ៊ីស្រាអែល ដែលសុទ្ធតែជាកត្តាធ្វឱ្យមាសកើនឡើង។

គិតត្រឹមម៉ោង ១០ ថ្ងៃទី ៣០ ខែមិថុនា ឆ្នាំ ២០២៥ តម្លៃហាងឆេងមាសកំពុងជួញដូរ ៣៩៥១ ដុល្លារ ក្នុងមួយតម្លឹង។ សម្រាប់​ហាងលក់មាសនៅក្នុងរាជធានីភ្នំពេញ លក់ចេញ​ក្នុង​តម្លៃ ៣៩៩៨ ដុល្លារ ក្នុង​មួយជី៕

អត្ថបទ៖ ឡេង ដេត