ហាងឆេងមាសក្នុងស្រុកលក់ចេញ ៤០០ ដុល្លារ មួយជី ថ្ងៃនេះ

តម្លៃហាងឆេងមាសក្នុងស្រុកបានធ្លាក់ចុះបន្តិចនៅថ្ងៃទី ០៩ ខែកក្កដានេះ ពោលគឺលក់ចេញក្នុងតម្លៃ ៤០០ ដុល្លារក្នុងមួយជី ធ្លាក់ចុះ ៣ ដុល្លារ ធៀបនឹងម្សិលមិញ។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities ប្រាប់​កម្ពុជាថ្មីថា គិតត្រឹមម៉ោង ៨ ព្រឹកថ្ងៃទី ០៩ ខែកក្កដា មាសជួញដូរក្នុងតម្លៃ ៣៩៨៧ ដុល្លារ ក្នុងមួយតម្លឹង ពោលគឺមានការធ្លាក់ចុះ។

លោក ឡុង សំណាង បានឱ្យដឹងថា ថ្នាក់ដឹកនាំជាន់ខ្ពស់អាមេរិក​បានទៅប្រជុំ​ជាមួយ​សហភាព​អឺរ៉ុបពាក់ព័ន្ធនឹងការបន្ថែម​ទៅលើការចំណាយថវិកាលើយោធាក្នុង​ការការពារអឺរ៉ុប​ទាំង​មូល​ ខណៈ​សមាជិកអឺរ៉ុបភាគច្រើនបានឯកភាពទៅ​លើគម្រោងខាងលើ។

លោក ឡុង សំណាង យល់ថា៖ «ពាក់ព័ន្ធជាមួយនឹងពន្ធរបស់អាមេរិក លោក ដូណាល់ ត្រាំ បាននិយាយថា​ ប្រ​សិន​​បើប្រទេសដែលបានចរចាជាមួយអាមេរិក​ ដែលសម្ពាធពន្ធបាន​ធ្លាក់​ចុះ ហ្នឹង​គឺល្អប្រសើរហើយ ប៉ុន្តែប្រទេសមួយចំនួន ដែល​មិនទាន់បានចរចា ឬក៏ព្រម​ព្រៀងធ្វើកិច្ច​សន្យាជាមួយអាមេរិកទេ ពន្ធរបស់ពួកគាត់ នឹងចូលជាធរមាននៅថ្ងៃទី ០១ ខែសីហា ដូច​កាល​ពី​ខែមេសា ដែលបានប្រកាស»។

បើតាមលោក ឡុង សំណាង ព័ត៌មានទាំងពីរខាងលើ ធ្វើឱ្យសេដ្ឋកិច្ចអាមេរិកមានភាពល្អប្រសើរ នៅ​ពេល​ដែលមានការ​ឯក​ភាព​ពីសហភាពអឺរ៉ុប និងការបន្ធូរបន្ថយពន្ធនៅក្នុង​ពាណិជ្ជកម្ម​អន្តរ​ជាតិ​​ជា​មួយអាមេរិក ខណៈសន្ទុះលុយដុល្លារអាមេរិកបាន​កើនឡើងនៅថ្ងៃនេះ បានធ្វើឱ្យ​ហាង​ឆេង​មាស​ធ្លាក់​ចុះ៕

អត្ថបទ៖ ឡេង ដេត