សេដ្ឋកិច្ច

លោក គិត សុវណ្ណារិទ្ធ៖ វិស័យឯកជន ជាតួអង្គសំខាន់ដឹកនាំអនុវត្តនូវយុទ្ធសាស្រ្តផែនទីបង្ហាញផ្លូវក្នុងវិស័យហិរញ្ញវត្ថុបម្រើពលរដ្ឋ

បានផុស

១០ ខែ មុន

នៅ

ថ្ងៃសុក្រ ២២ សីហា ២០២៥

ដោយ

លោក គិត សុវណ្ណារិទ្ធ ឧបការីទេសាភិបាល និងជាអគ្គនាយកត្រួតពិនិត្យនៃធនាគារជាតិ នៃកម្ពុជា មានប្រសាសន៍ថា វិស័យឯកជន ជាតួអង្គមានសារៈសំខាន់ក្នុងការដឹកនាំអនុវត្តនូវយុទ្ធសាស្ត្រផែនទីបង្ហាញផ្លូវក្នុងវិស័យ ហិរញ្ញវត្ថុដើម្បីបម្រើដល់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងសន្និសីទធនាគារនៅកម្ពុជាលើកទី៤ ក្រោមប្រធានបទ «ការលើកកម្ពស់កំណើនប្រកបដោយបរិយាបន្ន៖ នវានុវត្តន៍ឌីជីថល និងនិរន្តរភាព» លោក គិត សុវណ្ណរិទ្ធ បានលើកឡើងថា ការជំរុញ និងលើកកម្ពស់កំណើនប្រកបដោយបរិយាបន្ន និងនិរន្តរភាព ត្រូវមានលើសពីគោលនយោបាយ បច្ចេកវិទ្យា និងយុទ្ធសាស្រ្ត ដែលតម្រូវឱ្យមានកិច្ចសហប្រតិបត្តិការយ៉ាងសកម្មពីគ្រប់ភាគីរួមមាន រាជរដ្ឋាភិបាល វិស័យឯកជន សង្គមស៊ីវិល និងដៃគូអន្តរជាតិ។

លោក បានសង្កត់ធ្ងន់ថា «យុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជា ផ្តល់ឱ្យយើងនូវផែនទីបង្ហាញផ្លូវថ្នាក់ជាតិ ស្របពេលដែលធនាគារជាតិ នៃកម្ពុជា ផ្តល់នូវផែនទីបង្ហាញផ្លូវក្នុងវិស័យ និងការគាំទ្រផ្នែកបទប្បញ្ញត្តិ ដើម្បីជំរុញនវានុវត្តន៍ហិរញ្ញវត្ថុ។ ជាមួយគ្នានេះ វិស័យឯកជនមានសារៈសំខាន់ក្នុងការដឹកនាំអនុវត្តនូវយុទ្ធសាស្រ្តទាំងនេះដើម្បីបម្រើដល់ប្រជាពលរដ្ឋ»។

ក្នុងឱកាសនោះដែរ លោក រ័ត្ន សោភ័ណ ប្រធានសមាគមធនាគារនៅកម្ពុជា មានប្រសាសន៍ថា ប្រព័ន្ធហិរញ្ញវត្ថុសព្វថ្ងៃកាន់តែមានភាពស្មុគស្មាញ និងតែងតែផ្លាស់ប្តូរ រួមមានដូចជា បច្ចេកវិទ្យាហិរញ្ញវត្ថុ រូបិយប័ណ្ណឌីជីថល ហិរញ្ញវត្ថុវិមជ្ឍការ ព្រមទាំងបរិស្ថាន សង្គម និងអភិបាលកិច្ច។

លោកប្រធានសមាគមធនាគារនៅកម្ពុជា មានប្រសាសន៍បញ្ជាក់ថា សន្និសីទធនាគារនៅកម្ពុជាក្នុងឆ្នាំនេះបានគូសបញ្ជាក់ពីរបៀបដែលវិស័យធនាគារ និងហិរញ្ញវត្ថុ ប្រើប្រាស់បច្ចេកវិទ្យាហិរញ្ញវត្ថុប្រកបដោយចីរភាពក្នុងការជំរុញ និងលើកកម្ពស់កំណើនសេដ្ឋកិច្ចប្រកបដោយនិរន្តរភាព។

សូមជម្រាបថា សន្និសីទធនាគារនៅកម្ពុជាប្រចាំឆ្នាំ២០២៥ មានអ្នកចូលរួមប្រមាណជាង ៨០០នាក់។ ក្នុងនោះអ្នកចូលរួមដោយផ្ទាល់មានប្រមាណជាង ៥០០នាក់ និងអ្នកចូលរួមតាមប្រព័ន្ធអនឡាញប្រមាណជាង ៣០០
នាក់។ ក្នុងនោះវត្តមានភ្ញៀវដែលបានអញ្ជើញចូលរួម មកពីតំណាងរាជរដ្ឋាភិបាល បណ្តាសមាជិកប្រទេសអាស៊ាន តំណាងប្រតិបត្តិករក្នុងវិស័យទូរគមនាគមន៍ វិស័យធនាគារ និងហិរញ្ញវត្ថុ និងអ្នករៀបចំគោលនយោបាយជាច្រើនរូប។

បន្ថែមលើនេះ វាគ្មិនកិត្តិយសអញ្ជើញមកពីធនាគារពិភពលោក ធនាគារអភិវឌ្ឍន៍អាស៊ី អង្គការពលកម្មអន្តរជាតិ និងអង្គការ World Women Bankingដើម្បីចូលរួមចែករំលែកចំណេះដឹង និងផ្តល់ដំណោះស្រាយទៅលើនិន្នាការសំខាន់ៗកើតឡើងក្នុងវិស័យធនាគារនៅកម្ពុជា៕