ក្រុមហ៊ុននៅឥណ្ឌូណេស៊ីប្រឈមមុខនឹង​កង្វះការផ្គត់ផ្គង់ឧស្ម័នធម្មជាតិ​

អាជីវកម្មនៅទូទាំងកោះជ្វា និងកោះស៊ូម៉ាត្រា នៃប្រទេសឥណ្ឌូណេស៊ី កំពុងបន្តប្រឈមមុខ​នឹង​កង្វះការផ្គត់ផ្គង់ឧស្ម័នធម្មជាតិដ៏អូសបន្លាយ បើទោះបីជាមានការធានាពីក្រុមហ៊ុន​ចែកចាយរបស់រដ្ឋ PT Perusahaan Gas Negara (PGN) ថា ស្ថានភាព​កំពុងមានស្ថិរភាពបន្តិចម្តងៗក៏ដោយ​។

រោងចក្រជាច្រើនបានរាយការណ៍ពីភាពប្រសើរឡើងនៃការផ្គត់ផ្គង់ឧស្ម័ន បន្ទាប់ពីខ្វះខាត​ជាច្រើនសប្តាហ៍ ដែលបានបង្ខំឱ្យពួកគេផ្អាកផលិតកម្ម ប៉ុន្តែក៏មាន​រោងចក្រច្រើនផងដែរ ដែល​និយាយថា ​ការផ្គត់ផ្គង់នៅតែមិននឹងន។ ​

ជុំវិញបញ្ហានេះ អ្នកតំណាងវិស័យឧស្សាហកម្មបានកត់សម្គាល់ថា វិស័យជាច្រើនត្រូវបានបង្ខំឱ្យប្តូរទៅប្រេងស្រាល ឧស្ម័នធម្មជាតិបង្ហាប់ (CNG) ឬសូម្បីតែធ្យូងថ្ម ដោយសារតែការចំណាយខ្ពស់ និងការធ្លាក់ចុះការផ្គត់ផ្គង់។

ការខ្វះខាតបានចាប់ផ្តើមនៅថ្ងៃទី ១៣ ខែសីហា ដោយ​ការជួសជុលប្រតិបត្តិការថែទាំដោយ​មិនគ្រោង​ទុក​របស់​ក្រុមហ៊ុន​ចែកចាយ។ ចាប់តាំងពីពេលនោះមក ក្រុមហ៊ុនប្រើប្រាស់ក្នុងវិស័យឧស្សាហកម្ម បានទទួលតែ ៤៨ ភាគរយ នៃការចែកចាយដែលពួកគេគួរទទួលបាន​ប៉ុណ្ណោះ។ ការប្រើប្រាស់លើសពីកម្រិតនេះ ធ្វើឱ្យមានការគិតថ្លៃបន្ថែមរហូតដល់ ១២០ ភាគរយ នៃតម្លៃធម្មតា។

យោងតាមក្រសួងឧស្សាហកម្មរបស់ឥណ្ឌូណេស៊ី ស្ថានភាពបច្ចុប្បន្ន​បានគំរាមកំហែងការងារប្រហែល ១៣៥ ០០០ កន្លែង ក្នុងវិស័យដែលពឹងផ្អែកលើគម្រោងតម្លៃឧស្ម័នពិសេស (HGBT) រួមទាំងសេរ៉ាមិច ជី និងកែច្នៃអាហារ។ អ្នកវិភាគបានព្រមានថា ប្រសិនបើការខ្វះខាតនៅតែបន្តកើតមាន រោងចក្រជាច្រើនអាចនឹងត្រូវបង្ខំចិត្តកាត់បន្ថយផលិតកម្ម​ កាត់បន្ថយបុគ្គលិក និងប្រឈមមុខនឹងការធ្លាក់ចុះនៃការប្រកួតប្រជែង៕