ព័ត៌មានអន្ដរជាតិ

វៀតណាមគ្រោងប្ដូរទៅប្រើឥន្ធនៈលាយអេតាណុល ដើម្បីជំរុញការនាំចូលពីអាមេរិក

បានផុស

១០ ខែ មុន

នៅ

ថ្ងៃពុធ ២៧ សីហា ២០២៥

ដោយ

ប្រទេសវៀតណាមគ្រោងនឹងផ្លាស់ប្ដូរទៅប្រើប្រាស់ «ឥន្ធនៈលាយអេតាណុល» ទាំងស្រុង ចាប់ពីឆ្នាំក្រោយទៅ ដើម្បីជាផ្នែកមួយនៃការបង្កើនការនាំចូលអាតាណុល និងពោតពីសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងឧស្សាហកម្ម និងពាណិជ្ជកម្មវៀតណាម បានដាក់សំណើទៅរដ្ឋាភិបាល ដើម្បីប្តូរទៅប្រើឥន្ធនៈលាយអេតាណុល E10 (ប្រេងសាំងដែលមានល្បាយអេតាណុល ១០ ភាគរយ)។ នេះបើតាមឯកសារដែលរ៉យទ័របានឃើញ ខណៈបច្ចុប្បន្ន វៀតណាមប្រើប្រេងសាំង RON95 (សាំងកម្រិតអុកតាន ៩៥) និង RON92។

ការបោះជំហានយ៉ាងដូច្នេះរបស់វៀតណាម នឹងត្រួសត្រាយផ្លូវសម្រាប់ឱ្យប្រទេសបង្កើនការនាំចូលអាតាណុល និងពោត (ដែលគេប្រើដើម្បីផលិតអាតាណុលផងដែរនោះ) ពីសហរដ្ឋអាមេរិក ដែលជាទីផ្សារដ៏ធំរបស់វៀតណាម។

ក្រសួងបានបន្តថា៖ «នេះគឺជាដំណោះស្រាយមួយក្នុងចំណោមដំណោះស្រាយរហ័ស និងមានប្រសិទ្ធភាព ដើម្បីបង្កើនការនាំចូលទំនិញពីសហរដ្ឋអាមេរិក ហើយកាត់បន្ថយអតិរេកពាណិជ្ជកម្ម» ដែលកើនដល់ ជាង ១២៣ ប៊ីលានដុល្លារ កាលពីឆ្នាំមុន។

កាលពីខែមីនា វៀតណាមបានកាត់បន្ថយពន្ធនាំចូលលើអេតាណុលមកត្រឹម ៥ ភាគរយ ពីអត្រាចាស់ ១០ ភាគរយ ខណៈការបង្កើនការនាំចូលទំនិញអាមេរិក គឺជាផ្នែកមួយនៃការចរចាពាពិជ្ជកម្មនាពេលមក រហូតដល់អាមេរិកព្រមទម្លាក់ពន្ធលើវៀតណាមពី ៤៦ ភាគរយ មកត្រឹម ២០ ភាគរយ។ នៅខែមុន លោក ត្រាំ បាននិយាយថា វៀតណាមបានយល់ព្រមមិនយកពន្ធលើទំនិញពីអាមេរិក។

គួរគូសបញ្ជាក់ថា វៀតណាមប្រើប្រាស់ផលិតផលប្រេងសរុបក្រោម ៣០ លានតោន/ឆ្នាំ។ ប្រទេសនេះមានរោងចក្រអេតាណុលចំនួន៦ ដែលផលិតបាន ៦០០ ០០០ គូប/ឆ្នាំ ដែលគ្រប់គ្រាន់ដើម្បីបំពេញតម្រូវការប្រហែល ៤០ ភាគរយ នៃតម្រូវការប្រេងប្រភេទ E10 ។ មែនទែនទៅ ការប្តូរទៅប្រើ E10 នឹងជួយកាត់បន្ថយការបំភាយកាបូន និងជួយវៀតណាមឱ្យសម្រេចបានគោលដៅអាកាសធាតុរបស់ខ្លួន៕