ចិន ពេញចិត្តចំពោះ អាមេរិក ដែលចែកចាយវ៉ាក់សាំងកូវីដទៅក្រៅប្រទេសជាលើកដំបូង

អ្នកនាំពាក្យក្រសួងការបរទេសចិន លោក Zhao Lijian បាននិយាយនៅថ្ងៃអង្គារនេះថា ប្រទេសចិនស្វាគមន៍សហរដ្ឋអាមេរិក ដែលបានបំពេញតាមការសន្យារបស់ខ្លួន ក្នុងការចែកចាយវ៉ាក់សាំងការពារជំងឺកូវីដ ១៩ ជាមួយពិភពលោក ។

ប្រធានាធិបតីអាមេរិកលោក Joe Biden បាននិយាយថា ប្រទេសរបស់លោក នឹងចែកចាយនូវវ៉ាក់សាំងចំនួន ៨០ លានដូសជាមួយប្រទេសដទៃទៀត ហើយបានកត់សម្គាល់ថា ចំនួននេះគឺច្រើនជាងប្រទេសរុស្ស៊ី និងចិនទៅទៀត ។

ទន្ទឹមនោះ យោងតាមការចុះផ្សាយ របស់សារព័ត៌មាន CNA នៅថ្ងៃអង្គារនេះ បានឲ្យដឹងថា លោក Joe Biden ក៏បានបញ្ជាក់ផងដែរថា អាមេរិកនឹងបញ្ជូនវ៉ាក់សាំងកូវីដ ១៩ យ៉ាងតិច ២០ លានដូសដំបូងទៅបរទេស នៅត្រឹមចុងខែមិថុនា ។ នេះជាលើកដំបូងហើយ ដែលសហរដ្ឋអាមេរិក ចែកចាយវ៉ាក់សាំងដែលត្រូវបានអនុញ្ញាត សម្រាប់ការប្រើប្រាស់ក្នុងប្រទេស ។

លោក Zhao បាននិយាយថា “វ៉ាក់សាំងគឺជាឧបករណ៍សំខាន់ ដើម្បីជួយសង្គ្រោះជីវិត ហើយយើងត្រូវទទួលការចាក់វ៉ាក់សាំង ឲ្យបានពេញលេញ ខណៈវាមិនមែនជាការកេងចំណេញ ខាងនយោបាយណាមួយឡើយ” ។

លោកបន្ថែមថា ប្រទេសចិនមិនមែនប្រើប្រាស់ វ៉ាក់សាំងដើម្បីដឹកនាំពិភពលោក ឬទទួលបានការអនុគ្រោះពីប្រទេសដទៃទៀតណាមួយឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ សហរដ្ឋអាមេរិក ចែកវ៉ាក់សាំងកូវីដដែលអនុម័តហើយ ចំនួន២០លានដូសទៅក្រៅប្រទេសជាលើកដំបូង