សហរដ្ឋអាមេរិក ចែកវ៉ាក់សាំងកូវីដដែលអនុម័តហើយ ចំនួន២០លានដូសទៅក្រៅប្រទេសជាលើកដំបូង

លោកប្រធានាធិបតី Joe Biden នឹងបញ្ជូនវ៉ាក់សាំងកូវីដ-១៩យ៉ាងតិច ២០លានដូសបន្ថែមទៀតទៅបរទេសនៅត្រឹមចុងខែមិថុនា។ នេះជាលើកដំបូងហើយ ដែលសហរដ្ឋអាមេរិកចែកចាយវ៉ាក់សាំងដែលត្រូវបានអនុញ្ញាតសម្រាប់ការប្រើប្រាស់ក្នុងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចែកចាយនេះ បានកត់សម្គាល់អំពីយុទ្ធសាស្រ្តរបស់សេតវិមាន ស្របពេលរដ្ឋបាលសហរដ្ឋអាមេរិកព្យាយាមប្រើប្រាស់ការផ្គត់ផ្គង់វ៉ាក់សាំងរបស់ប្រទេស ជាឧបករណ៍ការទូត។

លោក Biden បានប្រកាសកាលពីថ្ងៃចន្ទទី១៧ខែឧសភាថា រដ្ឋបាលរបស់លោក នឹងបញ្ជូនវ៉ាក់សាំង Pfizer-BioNTech, Moderna និង Johnson & Johnson បន្ថែមពីលើវ៉ាក់សាំង AstraZeneca ចំនួន៦០លានដូស ដែលលោកគ្រោងនឹងផ្តល់ទៅឲ្យប្រទេសផ្សេងទៀត។

ទោះបីជាយ៉ាងណាក៏ដោយ មិនដូចវ៉ាក់សាំងដទៃទៀតទេ វ៉ាក់សាំង AstraZeneca មិនទាន់ត្រូវបានអនុញ្ញាតឲ្យប្រើប្រាស់នៅសហរដ្ឋអាមេរិក នៅឡើយទេ។

លោក Biden បាននិយាយថា “ដូចនៅក្នុងសង្គ្រាមលោកលើកទី២អញ្ចឹង អាមេរិកគឺជាឃ្លាំងនៃលទ្ធិប្រជាធិបតេយ្យ។ នៅក្នុងការប្រយុទ្ធប្រឆាំងនឹងជំងឺរាតត្បាតកូវីដ-១៩ ប្រទេសរបស់យើងនឹងក្លាយជាឃ្លាំងនៃវ៉ាក់សាំង”។

លោក Biden បានកត់សម្គាល់ថា គ្មានប្រទេសណាផ្សេងទៀត នឹងបញ្ជូនវ៉ាក់សាំងទៅបរទេសច្រើនជាងសហរដ្ឋអាមេរិកឡើយ។ រហូតមកដល់ពេលនេះអាមេរិក បានបញ្ជូនវ៉ាក់សាំង AstraZeneca ពីរបីលានដូសទៅហើយ ទៅឲ្យប្រទេសកាណាដានិងម៉ិកស៊ិក។

សេតវិមានមិនបានផ្តល់ព័ត៌មានលម្អិតអំពីថាតើប្រទេសណា នឹងទទួលបានវ៉ាក់សាំងទាំងនេះទេ។ លោក Biden និយាយថា លោក Jeff Zients ដែលជាប្រធានកិច្ចខិតខំប្រឹងប្រែងវ៉ាក់សាំងរបស់សហរដ្ឋអាមេរិក ឥឡូវនេះនឹងដឹកនាំការជំរុញផ្តល់ថ្នាំបង្ការជាសកល៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ លោក ចូ បៃដិន បង្ហាញ ការគាំទ្រ បទ ឈប់ បាញ់ គ្នា នៅហ្គាហ្សា តែ ការ ពារ សិទ្ធិ អ៉ីស្រាអែល