រួបរឹត​ដោយ​ជំងឺ​ច្រើន​មុខ នាយ ក្តិប ប្រកាសលក់ផ្ទះ ​ដើម្បី​យក​លុយដោះបំណុល​គេ

ខណ:កំពុងតែមានជំងឺដេកដួលនៅលើកន្ទេល តារាកំប្លែងនាយ ក្តិ​ប ថ្មីៗនេះបាន​សម្រេចចិត្តប្រកាស​លក់​ផ្ទះ​បន្ទាន់ដើម្បី​យក​ប្រាក់​សងបំណុល​គេក្នុង​ពេល​ដែល​ជំងឺ​របស់​នាយបន្តយាយីអស់រយ:ពេលជាច្រើនឆ្នាំកន្លងទៅ។

ដំណឹងនៃការប្រកាសដាក់លក់ផ្ទះរបស់តារាកំប្លែងជើងចាស់នាយ ក្តិប យ៉ាងប្រញ៉ាប់បែបនេះ ស្របពេលដែលលោកនិងក្រុមគ្រួសារជួបការលំបាក ហើយខ្វះខាតប្រាក់ដើម្បីដោះបំណុលគេក្នុងទំហំទឹកប្រាក់រាប់ម៉ឺនដុល្លារ។ ម្យ៉ាងទៀតបើនាយមិនលក់ផ្ទះនេះទេ អាច​ធានា​នឹង​រឹបអូស​លក់​ផ្ទះឡៃ​ឡុ​ង​ជា​មិន​ខាន​។

បើយោងតាមការបញ្ជាក់ពីលោក អ៊ឹម ជីវ៉ា គ្រាដែលបាននាំយកថវិកាចំនួន២លានរៀលរបស់សប្បុរសជនទៅឧបត្ថម្ភដល់នាយ ក្តិប ដែល​កំពុងមានជំងឺស្លាប់មួយចំហៀងខ្លួននោះ លោកក៏បានបង្ហាញពីទិដ្ឋភាពដោយក្តីអាណិតអាសូរដល់នាយ ក្តិប ដែលកំពុងជួបការខ្វះខាតផងដែរ។

លោក អ៊ឹម ជីវ៉ា សុំ​សំណូមពរ​ដល់​ពុក​ម៉ែបងប្អូនជួយទិញផ្ទះគាត់ផង ដើម្បី​​បាន​លុយ​មក​សងបំណុល​គេ បើ​មិន​អ៊ីចឹ​ង​ទេគេ​មក​រឹបអូស​ផ្ទះ​លក់ឡៃឡុងហើយ។ បើ​បងប្អូន​ចង់​ទិញ​ផ្ទះ​នាយ​ ក្តិប គឺ​នៅ​ខាងជើងវត្តខ្ទខណ្ឌ​ជ្រោយចង្វាររាជធានី​ភ្នំពេញ​។

តារាកំប្លែងនាយ​ ក្តិប បាន​បាត់បង់សមត្ថភាពសម្តែង និងបញ្ចប់អាជីពជាតារាកំប្លែងទាំងស្រុង បន្ទាប់ពីមានជំងឺប្រចាំកាយស្លា​ប់មួយចំហៀង​បណ្តាល​មក​ពី​ជំងឺ​លើស​ឈា​ម ព្រមទាំងជំងឺទឹកដក់ក្នុងសួត ទឹកនោមផ្អែម ដាច់សរសៃ ឈាម​ខួរក្បាលនិង​ខ្វះ​ឈា​មក្នុងបេះដូងជាដើម៕

អត្ថបទ៖ ចាន់រ៉ា