Connect with us

ជីវិតកម្សាន្ដ

រងការសើចចំអក ! ពេជ្រ ថៃ បានត្រឹមលួចអង្គុយយំម្នាក់ឯងក្នុងបន្ទប់ទឹក ឬ បន្ទប់គេង

បានផុស

នៅ

អ្នកគាំទ្រ និង​មហាជន ផ្ទុះ​ការ​ចាប់​អារម្មណ៍​ជាថ្មី បន្ទាប់ពី​មាន​ការ​បង្ហោះ និង​ចែករំលែក​រូបភាព​ខ្លឹម​សារ​របស់​តារា​ចម្រៀង​វ័យក្មេង​ដែល​ជា​ម្ចាស់​ជ័យលាភី The Voice Kid Cambodia រដូវ​កាល​ទី ១ ពេជ្រ ថៃ ដោយ​លើក​ឡើង​ថា ជារឿយៗ រូបគេ​តែងតែ​ទៅ​លួច​អង្គុយ​យំ​ម្នាក់​ឯង​ក្នុង​បន្ទប់ទឹក ឬ​បន្ទប់​គេង ក្រោយ​រង​ការ​រិះគន់​សើចចំអក​ពី​មនុស្ស​មួយ​ចំនួន​ថា​នៅតែ​មិន​ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈ​ខ្លឹមសារ​ដែល​ត្រូវ​បាន​ពិធី​ការិនី​អ្នកនាង កែវ ចាន់​និមល បង្ហោះ​ភ្ជាប់​ពាក្យ​សម្តី​អំឡុង​ពេល​ឆ្លើយ​ឆ្លង​ឆាត​ជាមួយ​តារា​ចម្រៀង ពេជ្រ ថៃ គឺ​អ្នកនាង​បាន​លើកទឹកចិត្ត​កុំ​ឲ្យ​តារា​ចម្រៀង​វ័យក្មេង​រូប​នេះ​បាក់​ទឹកចិត្ត។ ក្នុង​នោះ​អ្នកនាង​លើក​ឡើង​ថា «ខ្ញុំ​សុំ​ចែក​រំលែក​ក្តី​ស្រលាញ់​មួយ​នេះ​ទៅកាន់​ក្មេង​ប្រុស​ម្នាក់ ដែល​តែងតែ​ញញឹម​ព្យាយាម​ឲ្យ​គេ​សប្បាយ​ទាំង​ដែល​ខ្លួនឯង​កំពុង​មាន​ទុក្ខ រឹងមាំ​ហើយ​បន្ត​ដំណើរ​ជីវិត​ដោយ​ភាព​រីករាយ​ណា​កូន Pech Thai»។

ដោយឡែក​ចំពោះ​សំណេរ​ដែល ពេជ្រ ថៃ ឆ្លើយឆ្លង​ជាមួយ​អ្នកនាង កែវ ចាន់​និមល បាន​រៀបរាប់​ថា «កូន​រឹងមាំ​រយៈពេល ៦ ឆ្នាំ ហើយ​ម៉ាក់​មីង ហើយ​ពាក្យ​ទាំងនោះ កូន​តែងតែ​បៀម​ទុក​ម្នាក់ឯង មិន​ឲ្យ​ប៉ា​ម៉ាក់​ដឹង​ទេ។ ជា​ញឹកញាប់ កូន​តែងតែ​ទៅ​យំ​ម្នាក់ឯង​ក្នុង​បន្ទប់ទឹក និង​បន្ទប់​គេង យំ​ឲ្យ​ឆ្អែត ហើយ​ចេញ​មក​វិញ​សើច​សប្បាយ​គ្រួសារ​ជា​ធម្មតា កូន​តែងតែ​សួរ​ខ្លួនឯង​ក្នុង​កញ្ចក់ តើ​កូន​ខុស​អី»។

គួរ​រម្លឹក​ថា កាលពី​ថ្មីៗ កន្លងទៅ ពេជ្រ ថៃ ក៏បាន​បង្ហោះ​នៅ​លើ​ទំព័រ​ហ្វេស​ប៊ុក​របស់​ខ្លួន​ថា «ពេលនេះ ខ្ញុំ​ជឿ​ហើយ​ពុក​ម៉ែ​បងប្អូន​ខ្មែរ​មួយ​ចំនួន តើ​ខ្ញុំ​បោក​អី​គេ​ម៉េច​ដឹង​ច្បាស់​ម្ល៉េះ ហើយ​ខ្ញុំ​បាន​និយាយ​ធ្វើ​អី​ប៉ះពាល់​ដល់​ពុក​ម៉ែ​បងប្អូន​ណា​ម្នាក់​ទេ? ហេតុ​អី​បាន​និយាយ​បែប​នឹង ឫ​ក៏​ខ្ញុំ​បាន​ធ្វើ​អី​ប៉ះពាល់​ដល់​សង្គម​អត់?»។

តារា​ចម្រៀង ពេជ្រ ថៃ បាន​បន្ថែម​ថា «តើ​ហេតុ​អី​បាន​បំបាក់​ទឹកចិត្ត​ខ្ញុំ​បែបនេះ​? ឬ​ក៏​ចង់​ឲ្យ​ខ្ញុំ​ចាក​ផុត​ពី​លោក​នេះ តាំងពី​ប្រឡង​មកដល់ពេលនេះ​ខ្ញុំ​មិនដែល​តបត ឈ្លើយ មិន​គោរព​ចាស់ទុំ​ឡើយ តែ​ខ្ញុំ​គឺ​នៅតែ​ទទួល​នូវ​ពាក្យ​បែបនេះ​ជានិច្ច​….​ចាំ​ឲ្យ​ច្បាស់ ខ្ញុំ​មិន​ចុះចាញ់​ឡើយ ខ្ញុំ​នៅតែ​បន្ត​ការងារ​ដែល​ខ្ញុំ​ស្រឡាញ់​នេះ​រហូត»៕

អត្ថបទ ៖ ចាន់រ៉ា

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម