ជីវិតកម្សាន្ដ

ដើរតាមគន្លងឪពុក! លោក សុះ ម៉ាច ផ្តើមនិពន្ធបទចម្រៀងថ្មីៗបន្សល់ទុកជាស្នាដៃក្មេងជំនាន់ក្រោយ

បានផុស

៣ ថ្ងៃ មុន

នៅ

ថ្ងៃចន្ទ ២៧ ឧសភា ២០២៤

ដោយ

លោក សុះ ម៉ាច ដែលជាអតីតប្រធានសមាគមសិល្បករខ្មែរ ២អាណត្តិបានបញ្ជាក់ឲ្យដឹងថា ដោយការស្រលាញ់ និងដើម្បីបន្សល់ទុកស្នាដៃចម្រៀងដល់ក្មេងជំនាន់ក្រោយ ពេលនេះលោកបានចាប់ផ្តើមបន្ថែមស្នាដៃនិពន្ធបទចម្រៀងថ្មីៗដើរតាមគន្លងឪពុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុះ ម៉ាច បាននិយាយថា រៀនដើរតាមគន្លងលោកឪពុកដោយនិពន្ធទំនុកច្រៀង និងបទភ្លេងដោយខ្លួនឯងដើម្បីទុកជាមរតកដល់កូនៗទៅថៃ្ងមុខ។ កន្លងមកនិពន្ធទំនុកច្រៀងបានច្រើនដែរតែមិនចេះនិពន្ធបទភ្លេងទើបតែថ្មីៗនេះលោកផ្តើមនិពន្ធបទភ្លេងបាន ៥បទមកហើយដែរ។ សម្រាប់បទ(សម្រស់ក្រុងថ្មីដីអរិយក្សត្រ) គឺលោកទើបតែនិពន្ធ និងច្រៀងប៉ុន្មានថ្ងៃនេះប៉ុណ្ណោះ។

លោកក៏បានបញ្ជាក់ទៀតថា «ខ្ញុំក៏បាននិពន្ធបទចម្រៀង និងបទភ្លេងរួចហើយ បទ” ពលករខកស្នេហ៍ ” តាមការស្រមើស្រមៃរបស់ខ្ញុំ ខ្ញុំនឹងព្យាយាមផលិតឲ្យបាននៅពេលមានធនធានគ្រប់គ្រាន់ប៉ុន្តែបើមានអ្នកឧបត្ថម្ភបទនេះនឹងចេញឆាប់ៗ ហើយម្ចាស់ឧបត្ថម្ភគឺលោក អ្នកហើយ”។

តារាជើងចាស់លោកសុះ ម៉ាច បាននិយាយថា «លោកចាប់ផ្តើមដុសខាត់សំឡេង និងចូលប្រឡូកវិស័យសិល្បៈចម្រៀងជាថ្មីវិញដោយច្រៀង និងនិពន្ធបទថ្មីតែប៉ុណ្ណោះ។ សូមជួយគាំទ្រ និងផ្តល់មតិយោបល់ផងណា៎សំណព្វចិត្តទាំងអស់គ្នា»។

ជាមួយគ្នានោះ លោកក៏បានបំផុសដែរថា គួរតែនាំគ្នាបង្កើតបទថ្មីៗដោយបញ្ឈប់យកបទមរតកដើមមកកែរទំនុកតទៅទៀតទៅទើបវិស័យចម្រៀងយើងមានការរីកចម្រើន។

គួរបញ្ជាក់ថា លោក សុះ ម៉ាច កន្លងមកគឺជាអតតីប្រធានសមាគមសិល្បករខ្មែរ ២អាណត្តិ និងជាតារាចម្រៀងជើងចាស់ដ៏មានប្រជាប្រិយភាពរហូតមកដល់ពេលបច្ចុប្បន្ន។ លោក សុះ ម៉ាច បានជាប់ឈាមជ័រជាអ្នកសិល្បៈ ព្រោះលោកគឺត្រូវជាកូនប្រុសបង្កើតរបស់លោកតា សុះ ម៉ាត់ តារាចម្រៀងល្បី និងសម្បូរស្នេហ៍ក្នុងទសវត្សរ៍ឆ្នាំ៦០-៧០៕

អត្ថបទ៖ ចាន់រ៉ា