លោក សុះ ម៉ាច ស្នើប្រជាជាតិខ្មែរគ្រប់និន្នាការនយោបាយ រួមគ្នាការពារបូរណភាពទឹកដី

តារាចម្រៀងជើងចាស់ល្បីឈ្មោះ លោក សុះ ម៉ាច បានធ្វើការអំពាវនាវ និងស្នើសូមជាតិខ្មែរគ្រប់និន្នាការនយោបាយគ្រប់ស្រទាប់វណ្ណ:គ្រប់បណ្តាប្រទេសនានា រួមគ្នាការពារបូរណភាពទឹកដីយើងកុំឱ្យប្រទេសដទៃគេបំពានតទៅទៀត ព្រោះបើយើងបែកបាក់គេប្រមាថហើយ។

ការចេញមុខអំពាវនាវពីសំណាក់តារាចម្រៀង លោក សុះ ម៉ាច ធ្វើឡើង ខណ:ដែលថ្មីៗនេះមានការប៉ះទង្គិចគ្នារវាងកងទ័ពកម្ពុជា-ថៃបណ្តាលឱ្យទាហានខ្មែរម្នាក់ស្លាប់។ លោក សុះ ម៉ាច បានរៀបរាប់ថា ពិតមែនតែខ្ញុំជាអ្នកសិល្ប:មានភារ:ថែរក្សាសិល្ប:វប្បធម៌ជាតិ តែខ្ញុំក៏តែងតែឈឺឆ្អាលរឿងជាតិទឹកដី។

តារាចម្រៀង សុះ ម៉ាច បានបន្តថា លោកតែងតែគោរពសរសើរវីរភាពរបស់កងកម្លាំងខ្មែរយើងគ្រប់ប្រភេទ ដែលបានឈរជើងពើងទ្រូងដាក់សត្រូវឈ្លានពានកន្លងមកនិងឥឡូវដើម្បីការពារទឹកដី។

លោក សុះ ម៉ាច និយាយទៀតថា ដូចដែលពលទាហានខ្មែរម្នាក់គឺលោក សួន រោន អាយុ៤៨ឆ្នាំ ដែលបានពលីជីវិតក្នុងបុព្វហេតុការពារទឹកដីសម្បត្តិវប្បធម៌កេរ្តិ៍ដូនតា និងបានសម្តែងការសោកស្តាយ ចូលរួមរំលែកជាមួយនូវមរណៈទុក្ខដ៏ក្រៀមក្រំបំផុតជាមួយគ្រួសារសពផងដែរ។

បន្ថែមពីនេះ តារាជើងចាស់ល្បីឈ្មោះរូបនេះបានលើកឡើងដែរថា “ខ្មែរយើងតែងតែទុកអ្នកជិតខាងជាមិត្តដ៏ល្អ ប៉ុន្តែពួកគេវិញមិនដូច្នោះទេគួរតែប្រយ័ត្នប្រសើរជាងនូវដានប្រវត្តិសាស្ត្រ”៕ អត្ថបទ៖ ចាន់រ៉ា