សម្តេចតេជោ កោតសរសើរយុវតីម្នាក់ច្រៀងបទដែលជាស្នាដៃនិពន្ធដោយសម្ដេចផ្ទាល់បានយ៉ាងពិរោះ

សម្តេចតេជោ ហ៊ុន សែន អតីតនាយករដ្ឋម ន្រ្តីនៃប្រទេសកម្ពុជា បានថ្លែងការកោតសរសើរចំពោះយុវតីម្នាក់ដែលបានលើកយកបទ”ស្ពានសាងស្នេហ៍” ដែលជាចម្រៀងនិពន្ធដោយសម្តេចផ្ទាល់ទាក់ទងនឹងជីវិតសម្តេចទាំងទ្វេ។

នៅលើទំព័រហ្វេសប៊ុករបស់សម្តេចតេជោ ហ៊ុន សែន កាលពីយប់ថ្ងៃទី១៧ ខែកក្កដា ឆ្នាំ២០២៤ សម្តេចបានសរសើរសមត្ថភាពច្រៀងបានពិរោះ និងចង់ដឹងពីឈ្មោះ និងសាលារៀនរបស់យុវតីដែលច្រៀងបទស្នាដៃនិពន្ធរបស់សម្តេច “ស្ពានសាងស្នេហ៍” ផងដែរ ។

សម្តេចតេជោមានប្រសាសន៍ថា“ចៅស្រីតាមិនទាន់ដឹងថា ចៅឈ្មោះអ្វី? នៅភូមិ ឃុំ ស្រុកខេត្តណា ? រៀននៅសាលាណា? តែចៅច្រៀងបទដែលតានិពន្ធទាក់ទងនឹងជីវិតតាយាយបានពិរោះណាស់។ តាយាយសូមអរគុណចំពោះចៅ”។

ដោយឡែកបើតាមការបញ្ជាក់ពីអ្នកប្រើប្រាស់បណ្តាញសង្គមបានឲ្យដឹងថា យុវតីរូបនេះមានឈ្មោះ សាយ សុីណា រៀននៅថ្នាក់ទី១០H នៃវិទ្យាល័យព្រៃព្នៅ ស្ថិតក្នុងភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង។ ជាមួយគ្នានេះក៏មានការចែករំលែកវីដេអូច្រើនសរសើរសមត្ថភាពយុវតីខាងលើច្រៀងបានពិរោះដាកមនោសញ្ចេតនាបានល្អ៕

អត្ថបទ៖ ចាន់រ៉ា