នាយ វ៉ាង ដេត ប្រាប់អ្នកស្គាល់លោកឲ្យប្រុងប្រយ័ត្ន ព្រោះគណនីហ្វេសប៊ុកត្រូវគេលួច Hack ចូលប្រើ

តារាកំប្លែងដែលកំពុងទទួលបានការគាំទ្រ និងចាប់អារម្មណ៍ពីទស្សនិកជននាយ វ៉ាង ដេត បានបង្ហាញការហួសចិត្តជាខ្លាំងបន្ទាប់ពីគណនីហ្វេសប៊ុករបស់ខ្លួន ត្រូវបានជនខិលខូចលួច Hack ចូលប្រើប្រាស់បង្កការយល់ច្រឡំមកលើរូបលោក។

ជាមួយគ្នានេះដែរ តារាកំប្លែងនាយ វ៉ាង ដេត បានប្រកាសប្រាប់ឲ្យអ្នកគាំទ្រ និងមហាជនមានការប្រុងប្រយ័ត្នផងដែរក្រែងជនអនាមិករូបនោះ ក្លែងបន្លំប្រើប្រាស់ដើម្បីបោកប្រាស់ក្នុងករណីណាមួយ។ នាយ វ៉ាង ដេត បានបង្ហោះខ្លឹមសារកាលពីយប់ថ្ងៃទី១២ ខែវិច្ឆិកាថា “សួស្តីបាទ មានគេហេកឣាខោនខ្ញុំ បើមានរឿងឣ្វីខ្ញុំឣត់ទទួលខុសត្រូវទេ“។

នាយ វ៉ាង ដេត បានអំពាវនាវឲ្យមានការប្រុងប្រយ័ត្ន បើសិនជាមានករណីគណនីហ្វេសប៊ុកឈ្មោះ យិន ភីដេត (ត្រូវគេ Hack) ឆាតទៅខ្លីលុយឬករណីអ្វីផ្សេង កុំចាញ់បោកឲ្យសោះ ព្រោះគណនីនេះត្រូវគេលួចប្រើហើយ។

គួរជម្រាបថា នាយ វ៉ាង ដេត គឺជាកូនប្រុសតែមួយរួមដំណក់ឈាមរបស់តារាកំប្លែងជើងចាស់នាយ វ៉ាងដឺ ខណ:ដែលបច្ចុប្បន្នលោកក៏កំពុងតែសាងប្រជាប្រិយភាព និងកេរ្តិ៍ឈ្មោះលើវិស័យកំប្លែង ដើរតាមគន្លងរបស់ឪពុកនិងជីតារបស់លោកផងដែរ។

បច្ចុប្បន្នទេពកោសល្យសម្តែង​បែប​កំប្លែង​របស់​លោក យិន ភីដេត ហៅនាយ វ៉ាង ដេត ក៏កំពុងកាន់តែ​ជិត​ដូច​ឪពុក​របស់​លោកគឺតារាកំប្លែងជើងចាស់ល្បីឈ្មោះនាយ វ៉ាង ដឺ ។ កន្លងមក វ៉ាងដេត ធ្លាប់បង្ហាញឆន្ទ:ចង់​ក្លាយជា​តារា​កំប្លែងល្បីល្បាញដូចឪពុក​របស់​ខ្លួន​។

ជាការកត់សម្គាល់ បន្ទាប់ពីបង្ហាញវត្តមានត្រឹមរយ:ពេលខ្លី នាយ វ៉ាង ដេ​ត អាច​ឆ​ក់​យកចិត្ត​អ្នក​ទស្សនា​រាប់​ម៉ឺន​នាក់តាម​រយៈ​ការ​សម្តែង​ឈុត​កំប្លែង​ខ្លី​ៗ​បង្ហោះតាម​បណ្តាញ​សង្គម ខណ:បច្ចុប្បន្នតារា​កំប្លែង​រូបនេះ បានព្យាយាម​ហាត់​ពុត​លុត​ដុំ ពី​របៀបការ​សម្តែង​ឲ្យ​ដូច​ទៅ​នឹង​ឪពុក​របស់​ខ្លួន៕ អត្ថបទ៖ ចាន់រ៉ា