ជីវិតកម្សាន្ដ

គណនីតារាចិន Luhan ត្រូវរឹតបន្តឹង ក្រោយបំពានច្បាប់ផឹកស្រា និងប្រមាថអ្នកដទៃ

បានផុស

៣ ខែ មុន

នៅ

ថ្ងៃព្រហស្បតិ៍ ៩ មករា ២០២៥

ដោយ

យោងតាមកាសែត The Straits Times អ្នកប្រើប្រាស់ដែលព្យាយាមតាមដានប្រវត្តិរូបរបស់គាត់នៅលើវេទិកាដ៏ពេញនិយមរបស់ចិន Weibo, Xiaohongshu និង Douyin កាលពីថ្ងៃចន្ទបានជួបប្រទះសារដែលបង្ហាញថាគណនីរបស់ Luhan បានបំពានច្បាប់ និងបទប្បញ្ញត្តិ ឬបទដ្ឋានសហគមន៍។

ការដាក់កំហិតពីបណ្ដាញសង្គមទាំងប៉ុន្មាននេះ ត្រូវបានគេជឿថា កើតចេញពីការផ្សាយផ្ទាល់កាលពីខែវិច្ឆិកាឆ្នាំមុន ដែលតារាប្រុសវ័យ៣៤ឆ្នាំបានបង្ហាញសកម្មភាពផឹកស្រា និងធ្វើកាយវិការដោយប្រើម្រាមដៃកណ្តាលរបស់គាត់ឆ្ពោះទៅរកអ្នកបង្ខូចកេរ្តិ៍ឈ្មោះនិងអ្នកនិយមរិះគន់កន្លងមក។

បន្ទាប់មក Luhan បានចេញសារសុំទោសតាមរយៈក្រុមហ៊ុនគ្រប់គ្រង ដោយនៅក្នុងសេចក្តីថ្លែងការណ៍ លោកបានសម្តែងការសោកស្ដាយចំពោះទង្វើរបស់ខ្លួន ដោយបញ្ជាក់ថា «ខ្ញុំសូមអភ័យទោសដោយស្មោះចំពោះការធ្វើជាគំរូមិនល្អអំឡុងពេលការផ្សាយផ្ទាល់។ ខ្ញុំនឹងកែតម្រូវផលអវិជ្ជមានសង្គម និងទទួលខុសត្រូវក្នុងនាមជាអ្នកសិល្បៈ នៅពេលអនាគត ខ្ញុំនឹងរឹតបន្តឹងចំពោះការប្រព្រឹត្តរបស់ខ្ញុំ»។

ឧបទ្ទវហេតុនេះ ក៏បានបង្កឲ្យមានការពិភាក្សាយ៉ាងសំខាន់លើអ៊ីនធឺណិត ដោយមានអ្នកលេងអ៊ីនធឺណិតមួយចំនួនគាំទ្រសកម្មភាពរបស់ Luhan ប្រឆាំងនឹងអ្នករិះគន់របស់គាត់ ខណៈពេលដែលអ្នកផ្សេងទៀតបានថ្កោលទោសអាកប្បកិរិយារបស់គាត់ថា មិនស័ក្តិសមសម្រាប់បុគ្គលសាធារណៈ នេះបើយោងតាមរបាយការណ៍របស់កាសែត Global Times ដែលដកស្រង់សម្តី Jimu News ។

តារាចិន Luhan ពីដើមឡើយលោកទទួលបានកិត្តិនាមជាសមាជិកនៃក្រុមចម្រៀងកូរ៉េខាងត្បូង EXO និងក្រុមរងរបស់ខ្លួន EXO-M ដែលគាត់បានចាកចេញនៅខែតុលា ឆ្នាំ ២០១៤។ ក្នុងឆ្នាំ ២០១៧ ទស្សនាវដ្ដី Forbes បានដាក់ឈ្មោះគាត់ជាតារាដែលរកចំណូលបានច្រើនជាងគេទីពីរនៅក្នុងប្រទេសចិន ក្នុងបញ្ជី China Celebrity 100 បន្ទាប់ពីតារាសម្តែងចិន Fan Bingbing ៕