លោក លៀក លីដា ស្នើអ្នកសិល្បៈចូលរួមកំចាត់ជនខិលខូច កុំឱ្យបន្តធ្វើស្រែលើខ្នងអ្នកសិល្បៈ

លោក លៀក លីដា ស្នើអ្នកសិល្បៈចូលរួមកំចាត់ជនខិលខូច ដែលចូលចិត្តកេងប្រវ័ញ្ចផលប្រយោជន៍ពីសមិទ្ធផលផ្សេងៗរបស់អ្នកសិល្បៈ ឬលួចចម្លងស្នាដៃជាដើម កុំឱ្យធ្វើស្រែលើខ្នងអ្នកសិល្បៈជាបន្តទៀត។

ការស្នើនេះ គឺបន្ទាប់ពីម្ចាស់ YouTube Channel “LB Gaming Sports” បានលួចយកវីដេអូខ្សែភាពយន្តរឿង “ប្រវត្តិស្នេហ៍នាងនាថ” ពី Angkor DC App ទៅចែករំលែកក្នុង Channel YouTube របស់ខ្លួនកាលពីថ្ងៃទី៩ ខែមករា ឆ្នាំ២០២៥ ដោយគ្មានការអនុញ្ញាតពីក្រុមហ៊ុន។

ជុំវិញរឿងរ៉ាវនេះ ក្រុមហ៊ុន Angkor DC និងផលិតកម្ម LD Entertainment ក៏បានកោះអញ្ជើញម្ចាស់លេខទូរសព្ទ ០៦៧ ៧៩ ៦០ ១០ (ម្ចាស់ Youtube Channel : LB Gaming Sports) បុគ្គលដែលបានលួចវីដេអូភាពយន្តខ្នាតធំរបស់ខ្លួនដោយគ្មានការអនុញ្ញាត ទៅជួបក្រុមហ៊ុនដើម្បីដោះស្រាយ។

ក្រុមហ៊ុនសង្កត់ធ្ងន់ទៀតថា បើសិនជាម្ចាស់ ម្ចាស់ Youtube Channel ខាងលើ មិនមកជួបដោះស្រាយដោយសន្តិវិធីទេ ក្រុមហ៊ុននឹងបន្តនិតិវិធីតាមផ្លូវច្បាប់។

ទន្ទឹមនឹងការប្រកាសនេះ លោក លៀក លីដា ក៏បានបង្ហាញការខឹងសម្បារ ដោយសរសេររៀបរាប់ថា “លេខទូរស័ព្ទមានលេខ account មានសូមចូលខ្លួនដោះស្រាយ, ហើយក៏សូមសួរទៅបងប៉ូលីសសមត្ថកិច្ចខាងផ្នែក copyright ប៉ូលិសសេដ្ឋកិច្ច បើសិនជាខ្ញុំមានភស្តុតាងមានលេខទូរស័ព្ទ មានលេខ account ប៉ុណ្ណឹងតើអាចប្ដឹងចាប់បានឬអត់?”

លោកបន្ថែមទៀតថា “សូមអ្នកសិល្បៈទាំងតស៊ូដើម្បីតំលៃពួកយើង កំចាត់ជនខិលខូចមិនចេះអៀនខ្មាស កុំឱ្យធ្វើស្រែលើខ្នងអ្នកសិល្បដូចជាពួកយើង” ៕