ចម្រៀងប្រវត្តិស្នេហ៍របស់សម្តេចតេជោ ឆ្លុះបញ្ចាំងយ៉ាងច្បាស់នូវការរៀបការដ៏កម្សត់នៃយុវជនយុវនារី ក្នុងរបបយ៉ង់ឃ្នង

កម្រងអាល់ប៊ុមចម្រៀងដកស្រង់ពីជីវិតពិតរបស់សម្តេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ទទួលបានការចាប់អារម្មណ៍ខ្លាំងពីមហាជន។ ខណៈចំណងអាពាហ៍ពិពាហ៍ដ៏កម្សត់របស់សម្តេចទាំងពីរ មិនត្រឹមបង្ហាញភក្តីស្នេហ៍នោះទេ តែក៏បានឆ្លុះបញ្ចាំងនូវតថភាពសង្គមផ្តាច់ការមួយ ដែលមនុស្សគ្រប់រូបគ្មានសិទ្ធសម្រេចលើជោគវាសនាខ្លួន គ្មានឱកាសជួបជុំ និងសូម្បីតែជ្រើសយកដៃគូជីវិត។

បើក្រឡេកមើលជ្រុងមួយនៃរបបដែលហៅខ្លួនថាអង្គការនេះ គឺការចាប់គូឱ្យរៀបការ ខណៈគ្មានមេបា គ្មានសាច់ញាតិដឹងឮ គ្មានប្រពៃណី បានត្រឹមតែឈរផ្ទឹមពោលពាក្យប្តេជ្ញាតាមគេតម្រូវ ក្នុងសម្លៀកបំពាក់ឈុតខ្មៅ បង់កក្រមាប៉ុណ្ណោះ។ រូបភាពនៃអាពាហ៍ពិពាហ៍បែបនេះ ជាភាពខ្លោចផ្សារបំផុតសម្រាប់កំលោះក្រមុំ ដែលរស់ក្នុងរបបដែលគេហៅថា “គុកឥតជញ្ជាំង” ។

ដោយឡែក បើងាកមកមើលពីជីវិតគូរបស់សម្តេចតេជោ និងសម្តេចកិត្តិព្រឹទ្ធឯណេះវិញ ក៏ជួបឧបសគ្គមិនធម្មតាដែរ។ តួយ៉ាង តាមរយៈចម្រៀងប៉ុន្មានបទ បានបង្ហាញថា ដើម្បីបានមិត្តនារីដែលមានងារជាសម្ដេចកិត្តិព្រឹទ្ធបណ្ឌិតបច្ចុប្បន្ន សម្តេចតេជោ បានឆ្លងកាត់ឧបសគ្គច្រើនក្រៃ និងស្នើរៀបការច្រើនលើក រហូតធ្លាប់ត្រូវគេចោទប្រឆាំងនឹងអង្គការទៀត ទម្រាំបានក្លាយជាប្រពន្ធប្តីតាមការរៀបចំ។ ក្នុងនោះមានដូចជា បទ“ស្នើសុំរៀបការនិងម៉ារ៉ានី” “មិនដឹងថ្ងៃត្រូវរៀបការ” និង “បងបានស្នើសុំរៀបការជាថ្មី” ជាដើម។ល។

គួរជម្រាបថា ផលិតកម្ម ហ្គាឡាក់ស៊ី ណាវ៉ាត្រា ទទួលបានសិទ្ធិពីសម្តេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងការផលិតអាល់ប៊ុមកម្រងចម្រៀងដកស្រង់ចេញពីសាច់រឿង “កូនប្រុសក្រោមពន្លឺព្រះចន្ទពេញបូណ៌មី” ដែលជារឿងប្រវត្តិសាស្ត្រ និងឆ្លុះបញ្ចាំងពីជីវិតតស៊ូរបស់សម្ដេចទាំងទ្វេ ក្នុងបុព្វហេតុជាតិមាតុភូមិ។

បើតាមរបារាយការណ៍ស្តីពីការរៀបចំផលិតកម្រងចម្រៀងដកស្រង់ចេញពីសាច់រឿងនេះ ឯកឧត្តម ជា លីសែ ទីប្រឹក្សាផលិតកម្ម Galaxy Navatra បញ្ជាក់ថា ជាជំហានដំបូង ក្នុងការផលិតចម្រៀងផ្លូវការនៃខ្សែជីវិតពិតរបស់សម្តេចទាំងពីរ ១អាល់ប៊ុម នឹងមានប្រហែលចន្លោះពី ៨ Vol ទៅ ១០Vol ដែលក្នុង Vol នីមួយៗ នឹងមាន ១០បទ សរុបប្រហែលចន្លោះពី ៨០ បទទៅ ១០០បទ ក្នុងមួយ Album។ ជារួមសរុបទាំង ២អាល់ប៊ុម ទាំងបទលំនាំបទដើម និងមេឡូឌីថ្មី ប្រហែលជាជិត ២០០បទ៕