លោក ឡៃ ថៃចាន់ ដាស់តឿនសប្បុរសជនដែលចង់ជួយ ពេជ្រ ចរណៃ ត្រូវផ្ទៀងផ្ទាត់ជាមុន ព្រោះមានជនឆ្លៀតឱកាស

លោក ឡៃ ថៃចាន់ តារាសម្តែង និងជាអ្នកគុនល្បុក្កតោមួយរូប ដែលមហាជនទូទៅតែងស្គាល់តាមរយៈវីដេអូកំប្លុកកំប្លែងនោះ បានប្រាប់ឱ្យសប្បុរសជនទាំងឡាយ ដែលមានបំណងចង់បរិច្ចាគដើម្បីចែករំលែកទុក្ខកញ្ញា ពេជ្រ ចរណៃ ប្រុងប្រយ័ត្នចំពោះជនឆ្លៀតឱកាស។

សារដាស់តឿននេះ គឺក្រោយពេលមានជនខិលខូច ឆ្លៀតឱកាសកេងចំណេញក្រោមរូបភាពទុក្ខលំបាករបស់គ្រូគុនល្បុក្កតោ ពេជ្រ ចរណៃ ដែលត្រូវបានអគ្គិភ័យលេបត្របាក់ហាងរបស់ខ្លួន ខាតលុយមិនតិចម៉ឺនដុល្លារ។

ដោយមើលឃើញទង្វើកេងចំណេញលើទុក្ខអ្នកដទៃបែបនេះ លោក ឡៃ ថៃចាន់ បានចេញសារដាស់តឿនដល់សប្បុរសជនថា មុននឹងធ្វើការស្កេន QR code សូមមេត្តាផ្ទៀងផ្ទាត់ឈ្មោះជាមុន ចៀសវាងការចាញ់បោកជនឆ្លៀតឱកាស។

គួររំលឹកថា កាលពីរាត្រីថ្ងៃទី១៨ មិថុនា ហាងអាហារដ្ឋានរបស់កញ្ញា ពេជ្រ ចរណៃ ត្រូវបានឆេះខូចខាតសម្ភារៈទាំងស្រុង ខណៈមិនត្រឹមតែខាតបង់សម្ភារៈក្នុងហាងប៉ុណ្ណោះទេ កញ្ញាក៏ត្រូវមានកាតព្វកិច្ចរ៉ាប់រងជួសជុលសងម្ចាស់ហាងថែមទៀតផង។

យ៉ាងណា ក្នុងគ្រាដ៏សែនលំបាកនេះ លោក ឡៃ ថៃចាន់ ក្នុងនាមជាអ្នករួមអាជីព ក៏បានចេញមុខជួយកញ្ញាតាមរយៈការអំពាវនាវឱ្យមានការបរិច្ចាគ ដើម្បីជួយសម្រាលបន្ទុកកញ្ញាខ្លះៗ៕