អ្នកផលិតមាតិកា និងសាធារណជន សរសើរអាជីវករខ្មែរមួយរូប ដែលប្តេជ្ញាមិននាំចូលទំនិញសៀម មកលក់បន្តជាដាច់ខាត

សាធារណជន និងអ្នកមានឥទ្ធិពលលើបណ្តាញទំនាក់ទំនងសង្គម បង្ហាញការកោតសរសើរជាខ្លាំង ដល់អាជីវករខ្មែរមួយរូប ដែលប្តេជ្ញាមិននាំចូលទំនិញចោរប្រវត្តិសាស្ត្រមកលក់បន្តជាដាច់ខាត។

ជាការកត់សម្គាល់ ក្រោយសៀមបង្ករូបភាព ក៏ដូចជាប្រើគ្រប់កលល្បិចដើម្បីលាបពណ៌ និងឈ្លានពានមាតុភូមិកម្ពុជា ពលរដ្ឋខ្មែរទាំងក្នុងស្រុក និងក្រៅស្រុក កាន់តែផុសផុលក្នុងការគាំទ្រផលិតផលខ្មែរ និងពហិការមិនប្រើផលិតផលសៀមទៀតនោះឡើយ។ ខណៈក្នុងចំណោមនោះ ម្ចាស់គណនីបណ្តាញសង្គមហ្វេសប៊ុកមួយឈ្មោះ cheanich mang បានបង្ហាញមនសិការជាតិជាបន្តបន្ទាប់ តាមរយៈវីដេអូនិយាយទាក់ទងនឹងការពហិការមិនប្រើផលិតផលសៀម និងណែនាំផលិតផលខ្មែរ។

មិនតែប៉ុណ្ណោះ អ្នកស្រីក៏បានណែនាំពីវិធីដែលមានអ្នកជំរុញឱ្យខ្លួនយកផលិតផលម៉ាក “ម៉ាម៉ា” មកលក់ ខណៈប្រើក្បាលកូដខ្មែរ ៨៨៤ និងបញ្ជាក់ថា ម៉ាម៉ា របស់ខ្មែរ ទាំងដែលឈ្មោះផលិតផលនេះ រាស្ត្រខ្មែរពេញមួយនគរ សុទ្ធតែបានជ្រាបហើយថាជារបស់អ្នកណា។

អ្នកស្រីបញ្ជាក់ថា ដាច់ខាត គឺមិនប្រើឬនាំចូលទំនិញសៀមមកលក់ទៀតទេ ព្រោះខ្លួនមិនអាចធ្វើដូចអ្នកដែលគិតតែលុយ បំភ្លេចរឿងជាតិនោះឡើយ។ ការប្តេជ្ញាចិត្តដែលបង្ហាញឱ្យឃើញច្បាស់តាមរយៈសកម្មភាពជាក់ស្តែងនេះ បានធ្វើឱ្យមហាជន ក៏ដូចជា អ្នកសិល្បៈ និងអ្នកមានឥទ្ធិពលលើបណ្តាញទំនាក់ទំនងសង្គមទាំងអស់ ចេញមកបង្ហាញការកោតសរសើរជាខ្លាំង។

ទន្ទឹមនឹងការបង្ហាញឆន្ទៈជនរួមជាតិខ្មែរដែរ លោក ឡី ថៃចាន់ តារាសម្តែង និងជាអ្នកផលិតមាតិកាកំប្លែងស្ងួត ក៏បានលើកឡើងពីផលិតផលខ្មែរមួយចំនួន ដែលជាវត្ថុធាតុដើមក្នុងស្រុក និងផលិតក្នុងស្រុក ដែលរួមមានទាំងគ្រឿងទេស និងម្សៅស៊ុប ដែលសាធារណជនមិនធ្លាប់បានដឹងថា ខ្មែរក៏មានផលិតផលក្នុងស្រុកប្រភេទនេះដែរ។