រញ្ជួយដីស្ងប់ តែប្រធានាធិបតីហ្វីលីពីន ចេញបញ្ជាជម្លៀសមនុស្សនិងបិទសាលារៀន

នៅព្រឹកថ្ងៃសុក្រទី១០ខែតុលាឆ្នាំ២០២៥ ប្រទេសហ្វីលីពីន បានជួបគ្រោះរញ្ជួយដីកម្រិតធ្ងន់ឈានដល់ការទាញសញ្ញាព្រមានរលកយក្សស៊ូណាមិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា ដ្បិតតែពេលនេះស្ថានការណ៍ធូរស្រាលនិងការព្រមានស៊ូណាមិត្រូវដកចេញវិញហើយក៏ពិតមែន ប៉ុន្តែប្រធានាធិបតីហ្វីលីពីន Ferdinand Marcos បានចេញបញ្ជាឲ្យជម្លៀសប្រជាជននៅតាមតំបន់ឆ្នេរសមុទ្រ នៅភាគកណ្តាលនិងខាងត្បូងប្រទេស ខណៈសាលារៀនមួយចំនួន ក៏ត្រូវបិទទ្វារផងដែរ។

តាមការផ្សាយរបស់ BBC, រញ្ជួយដីកម្រិត៧.៦រ៉ិចទ័រ បានវាយប្រហារកោះ Mindanao ភាគខាងត្បូងប្រទេសហ្វីលីពីន នាវេលាម៉ោង៩:៤៦នាទីព្រឹក ឈានដល់ការព្រមានអំពីរលកយក្សស៊ូណាមិកម្ពស់រហូតដល់៣ម៉ែត្រ ហើយឥទ្ធិពលរបស់វាក៏រាលដាលដល់ប្រទេសឥណ្ឌូណេស៊ី ឈានដល់ការព្រមានដូចគ្នា។

តាមរយៈបណ្តាញសង្គម Facebook, លោក Marcos បង្ហោះថា ត្រូវមានការជម្លៀសមនុស្សចេញពីតំបន់ឆ្នេរ ខណៈក្រុមស្វែងរកនិងជួយសង្គ្រោះ នឹងត្រូវដាក់ពង្រាយក្នុងពេលឆាប់ៗ។

ទន្ទឹមនោះ លោក​​ជំរុញ​ឲ្យ​ប្រជាពលរដ្ឋ​ទាំងអស់​នៅ​តាមតំបន់​ដែល​រងគ្រោះ ​ត្រូវរើ​ទៅ​កាន់​ទីទួលសុវត្ថិភាពនិង​នៅ​ឲ្យ​ឆ្ងាយ​ពីឆ្នេរ​រហូត​ដល់​អាជ្ញាធរ​ប្រកាស​ថា​វា​មាន​សុវត្ថិភាព។

នៅទីក្រុង Iloilo ភាគកណ្តាលប្រទេសហ្វីលីពីន សាលារៀនមួយចំនួនត្រូវផ្អាក ស្របពេលការងារនៅសាលាក្រុងក៏ត្រូវលុបចោលផងដែរ ដើម្បីអនុញ្ញាតឲ្យបុគ្គលិកទាំងឡាយ ទៅផ្ទះមើលក្រុមគ្រូសារនិងពិនិត្យផ្ទះសម្បែង។

សូមជម្រាបថា គ្រោះរញ្ជួយដីថ្ងៃសុក្រ កើតឡើងខណៈហ្វីលីពីន មិនទាន់ធូរស្បើយពីគ្រោះធម្មជាតិជាច្រើន ដែលបំផ្លិចបំផ្លាញផ្នែកខ្លះនៃប្រទេសនេះផង។ ជាក់ស្តែងកាលពីសប្តាហ៍មុន ការរញ្ជួយដីកម្រិត ៧រ៉ិចទ័រ បានវាយប្រហារទីក្រុងឆ្នេរសមុទ្រ Bogo ក្នុងខេត្ត Cebu ដោយសម្លាប់មនុស្ស ៧៤នាក់ និងរបួសជាង ៥០០នាក់៕

អត្ថបទ៖ សុខ សុវណ្ណ

ចុចអាន៖ ឥណ្ឌូណេស៊ី ក៏​ប្រកាស​សញ្ញា​ព្រមាន​ពី​រលក​យក្ស​ស៊ូណាមិ​ដែរ ក្រោយ​រញ្ជួយ​ដីដ៏​ខ្លាំង​នៅ​ហ្វីលីពីន