កូរ៉េ​ខាងជើង​ បង្ហាញ​មីស៊ីលផ្លោងអន្តរទ្វីប​ថ្មី​ក្នុង​ពិធី​ដង្ហែ​ខួប​៨០​ឆ្នាំរបស់បក្សកាន់អំណាច

ប្រទេសកូរ៉េខាងជើងបានប្រារព្ធខួបលើកទី ៨០ នៃគណបក្សពលករដែលកំពុងកាន់អំណាចរបស់ខ្លួនជាមួយនឹងក្បួនដង្ហែរយោធាដ៏ធំកាលពីយប់ថ្ងៃសុក្រ បង្ហាញពីមីស៊ីលផ្លោងអន្តរទ្វីប (ICBM) Hwasong-20 ដែលប្រព័ន្ធផ្សព្វផ្សាយរដ្ឋកូរ៉េខាងជើង KCNA ពិពណ៌នាថាជា «ប្រព័ន្ធអាវុធយុទ្ធសាស្ត្រនុយក្លេអ៊ែរខ្លាំងបំផុតរបស់ប្រទេស» ។

មេដឹកនាំកូរ់េខាងជើងលោក គីម ជុងអ៊ុន បានធ្វើជាអធិបតីក្នុងព្រឹត្តិការណ៍នៅទីក្រុងព្យុងយ៉ាង ដោយមានការចូលរួមពីភ្ញៀវបរទេសសំខាន់ៗ រួមមាននាយករដ្ឋមន្ត្រីចិនលោក Li Qiang អនុប្រធាន​ក្រុមប្រឹក្សា​សន្តិសុខ​រុស្ស៊ី លោក Dmitry Medvedev និងប្រធានបក្សកុម្មុយនិស្តវៀតណាម To Lam ។ ព្យុះយាត្រានេះមានការចូលរួមពីកងទ័ពរាប់ពាន់នាក់ និងសព្វាវុធទំនើបៗ ដែលបញ្ជាក់ពីភាពជាដៃគូយោធាដែលកំពុងកើនឡើងរបស់កូរ៉េខាងជើងជាមួយចិន និងរុស្ស៊ី។

បើទោះបីមិនទាន់មានព័ត៌មានលម្អិតអំពីមីស៊ីល Hwasong-20 ដែលជាផ្នែកមួយនៃអាវុធចម្ងាយឆ្ងាយរបស់កូរ៉េខាងជើង តែមីស៊ីលត្រូវបានគេជឿថា អាចទៅដល់ដីគោករបស់សហរដ្ឋអាមេរិកឯណោះ។

នៅក្នុងសុន្ទរកថារបស់លោក គីម បានសរសើរទាហានរបស់ប្រទេសចំពោះ «វីរភាព» របស់ពួកគេទាំងក្នុងប្រទេស និងក្រៅប្រទេស ដោយបង្ហាញពីការគាំទ្រជាបន្តបន្ទាប់របស់កូរ៉េខាងជើងដល់កងកម្លាំងរុស្ស៊ី។ ក្នុងអំឡុងពេលពិភាក្សាជាមួយលោក Medvedev លោក គីមបានបង្ហាញក្តីសង្ឃឹមក្នុងការពង្រឹងកិច្ចសហប្រតិបត្តិការជាយុទ្ធសាស្រ្តជាមួយទីក្រុងមូស្គូ ដោយគូសបញ្ជាក់ពី «ការជឿទុកចិត្ត និងការលះបង់» ទៅវិញទៅមករវាងប្រទេសទាំងពីរ។

ព្រឹត្តិការណ៍នេះបានបង្ហាញពីសារយ៉ាងច្បាស់ពីកូរ៉េខាងជើង ថាកូរ៉េខាងជើងចង់នៅជិតសម្ព័ន្ធមិត្តសង្គមនិយមរបស់ខ្លួនដូចជាចិន និងរុស្ស៊ី ហើយខ្លួនចង់បង្ហាញពីអំណាចយោធារបស់ខ្លួនទៅកាន់ពិភពលោក ទោះបីជាកំពុងប្រឈមមុខនឹងទណ្ឌកម្មអន្តរជាតិខ្លាំង និងភាពឯកោក៏ដោយ៕

អត្ថបទ៖ ប៊ុន សុភាព