ព័ត៌មានអន្ដរជាតិ

ត្រាំ ព្រមានថា បើហាម៉ាសបំពានបទឈប់បាញ់ អាមេរិកគ្មានជម្រើសមានតែលូកដៃចូល ហើយប្រល័យជីវិតពួកគេ

បានផុស

៨ ខែ មុន

នៅ

ថ្ងៃសុក្រ ១៧ តុលា ២០២៥

ដោយ

Chheang

លោកប្រធានាធិបតី ដូណាល់ ត្រាំ កាលពីថ្ងៃព្រហស្បតិ៍ទី១៦ខែតុលាបានព្រមានថា សហរដ្ឋអាមេរិក និងដៃគូរបស់ខ្លួន នឹងឆ្លើយតបដោយបង្ខំ ប្រសិនបើក្រុមហាម៉ាសនៅតែបន្តការសម្លាប់នៅក្នុងតំបន់ហ្គាហ្សា ដោយនិយាយថា សកម្មភាពបែបនេះ នឹងបំពានលើកិច្ចព្រមព្រៀងឈប់បាញ់ ដែលគាត់បានជួយសម្របសម្រួលជាមួយអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានបង្ហោះនៅលើប្រព័ន្ធផ្សព្វផ្សាយសង្គមថា «បើក្រុមហាម៉ាសបន្តសម្លាប់ប្រជាជននៅតំបន់ហ្គាហ្សា ដែលមិនមែនជាកិច្ចព្រមព្រៀង យើងនឹងគ្មានជម្រើសអ្វីក្រៅពីលូកដៃចូលទៅសម្លាប់ពួកគេ»។ យ៉ាងណាមិញ ក្រោយមកលោកបានប្រាប់អ្នកយកព័ត៌មានថា «មានគេនឹងចូលទៅ។ វាមិនមែនជាពួកយើង(អាមេរិក)ទេ… ពួកគេនឹងចាត់ការវាយ៉ាងងាយ ប៉ុន្តែក្រោមការគាំទ្ររបស់យើង»។

សេតវិមាន និងមន្ត្រីអាមេរិកបានទទូចម្តងហើយម្តងទៀតថា ពួកគេមិនមានគម្រោងដាក់ពង្រាយទ័ពជើងគោកអាមេរិកទៅកាន់តំបន់ហ្គាហ្សាទេ។ អនុប្រធានាធិបតី JD Vance បានរំលឹកឡើងវិញកាលពីថ្ងៃអាទិត្យថា រដ្ឋបាលលោក ត្រាំ មិនមានគម្រោងឈរជើងនៅហ្គាហ្សាឡើយ ខណៈពេលដែលនិយាយថា បុគ្គលិកអាមេរិកប្រហែល ២០០នាក់នឹងត្រូវដាក់ពង្រាយទៅកាន់ប្រទេសអ៊ីស្រាអែល ដើម្បីតាមដានលក្ខខណ្ឌបទឈប់បាញ់។

សុន្ទរកថារបស់លោកប្រធានាធិបតី ត្រាំ បានគូសបញ្ជាក់ពីភាពផុយស្រួយនៃបទឈប់បាញ់ ដែលទើបត្រូវបានប្រកាសតែប៉ុន្មានថ្ងៃមុននេះ។ អំពើហិង្សាបានបន្តកើតមាននៅក្នុងតំបន់ហ្គាហ្សា រួមទាំងការប៉ះទង្គិចគ្នារវាងក្រុមហាម៉ាស និងគូប្រជែងប៉ាឡេស្ទីន និងឧប្បត្តិហេតុដូចជា វីដេអូប្រហារជីវិតជាសាធារណៈដែលផ្សព្វផ្សាយនៅលើប្រព័ន្ធផ្សព្វផ្សាយសង្គមរបស់បុរស៦នាក់ដែលត្រូវបានចោទប្រកាន់ថាជាក្រុមចារកម្ម និងបះបោរ។

ការព្រមានរបស់លោក ត្រាំ បានកើតឡើងនៅពេលដែលអ្នកចរចាបានបន្តការងារ ដើម្បីអនុវត្តបទប្បញ្ញត្តិនៃកិច្ចព្រមព្រៀងស្តីពីចំណាប់ខ្មាំង និងការប្រគល់សាកសពមកវិញ។ ក្រុមហាម៉ាសបាននិយាយថា ខ្លួនមិនអាចស្វែងរកសាកសពបន្ថែម ដោយគ្មានឧបករណ៍ឯកទេសបានទេ ខណៈដែលមន្ត្រីអ៊ីស្រាអែលបានចោទប្រកាន់ថា ក្រុមនេះមិនបានផ្តល់សាកសពទាំងអស់ដូចដែលមានចែងក្នុងកិច្ចព្រមព្រៀង។

អ្នកនាំពាក្យសេតវិមានលោកស្រី Karoline Leavitt បានលើកឡើងថា បេសកជនជាន់ខ្ពស់អាមេរិកលោក Jared Kushner និងលោក Steve Witkoff កំពុង«ធ្វើការយ៉ាងសកម្ម»ជាមួយភាគីទាំងពីរ ដើម្បីធានាការអនុវត្ត រួមទាំងការសង្គ្រោះ និងការបញ្ជូនចំណាប់ខ្មាំង ក៏ដូចជាសាកសពអ្នកស្លាប់៕

ដោយ៖ ឈាង