ក្រុមហាម៉ាស​ប្រាប់​ថាបានប្រគល់សាកសព​ចំណាប់​ខ្មាំង​ទាំង​អស់​ ដែល​ខ្លួន​មាន

ក្រុមហាម៉ាសបាននិយាយកាលពីល្ងាចថ្ងៃពុធ​ទី​១៥​ខែតុលា​ឆ្នាំ​២០២៥​ថា ខ្លួនបានប្រគល់អដ្ឋិធាតុនៃចំណាប់ខ្មាំងអ៊ីស្រាអែលដែលបានស្លាប់ទាំងអស់ដែលខ្លួនអាចកំណត់ទីតាំងបាន បន្ទាប់ពីយោធាអ៊ីស្រាអែលបានបញ្ជាក់ថា កាកបាទក្រហមបានទទួលសាកសពពីរ​នាក់​បន្ថែមទៀតនៅក្នុង​តំបន់​ហ្គាហ្សា។ នេះ​បើ​យោង​តាម​ការ​ចុះ​ផ្សាយ​របស់​ទីភ្នាក់ងារ​ AFP។

ក្រោមកិច្ចព្រមព្រៀងឈប់បាញ់ដែលសម្របសម្រួលដោយប្រធានាធិបតីអាមេរិក លោក ដូណាល់ ត្រាំ មកទល់ពេលនេះ ក្រុមហាម៉ាសបានដោះលែង​ចំណាប់ខ្មាំង​២០​នាក់ដែលនៅរស់រានមានជីវិត ជាថ្នូរនឹងអ្នកទោសប៉ាឡេស្ទីនជិត ២ ០០០​នាក់ ដែលត្រូវបានដោះលែងពីការឃុំឃាំងរបស់អ៊ីស្រាអែល។

មុនពេលការដោះដូរ​នា​ថ្ងៃ​ពុធ ក្រុមហាម៉ាសបានប្រគល់សាកសពរបស់ចំណាប់ខ្មាំង​ចំនួន​៧​នាក់ក្នុងចំណោម​២៨​នាក់ ដែលបានស្លាប់បាត់ទៅហើយ ខណៈដែល​សាកសពទី​៨​ត្រូវបានប្រគល់មុននេះក្រោយមកត្រូវបានគេកំណត់ថា មិនមែនជារបស់ចំណាប់ខ្មាំងទេ។

នៅក្នុងសេចក្តីថ្លែងការណ៍មួយ កងពលតូច Ezzedine al-Qassam នៃ​ក្រុម​ប្រដាប់អាវុធរបស់ហាម៉ាស បាននិយាយថា ខ្លួនបាន«បំពេញតាម​ការប្តេជ្ញាចិត្ត» ចំពោះលក្ខខណ្ឌបទឈប់បាញ់​រួចរាល់​ហើយ។

ក្រុមនេះបានបន្ថែម​ថា «ក្រុមយើង​បានប្រគល់អ្នកទោសអ៊ីស្រាអែលដែលនៅរស់ទាំងអស់នៅក្នុងមន្ទីរឃុំឃាំងរបស់ខ្លួន ក៏ដូចជាសាកសពដែលខ្លួន​​អាច​កំណត់បាន។ ចំពោះសាកសពដែលនៅសេសសល់ វាទាមទារការខិតខំប្រឹងប្រែងច្រើន​ទៀត និងឧបករណ៍ពិសេសសម្រាប់ការទាញយក និងស្រង់ចេញ។ យើងកំពុងខិតខំប្រឹងប្រែងយ៉ាងខ្លាំង ដើម្បី​បិទ​បញ្ចប់​រឿង​នេះ»។

យោធាអ៊ីស្រាអែល បានបញ្ជាក់ថា «មឈូស​ចំនួន​ពីររបស់ចំណាប់ខ្មាំងដែលបានស្លាប់» ត្រូវបានផ្ទេរទៅគណៈកម្មាធិការអន្តរជាតិនៃកាកបាទក្រហម (ICRC) ហើយកំពុងត្រូវបានបញ្ជូនទៅ​ឲ្យ​កងកម្លាំងអ៊ីស្រាអែលនៅតំបន់ហ្គាហ្សា។

កងទ័ព និងទីភ្នាក់ងារសន្តិសុខរបស់អ៊ីស្រាអែល បានប្រកាស​នៅក្នុងសេចក្តីថ្លែងការណ៍រួមថា «ក្រុមហាម៉ាសត្រូវបានទាមទារដើម្បីរក្សាកិច្ចព្រមព្រៀង និងចាត់វិធានការចាំបាច់ដើម្បីបញ្ជូនចំណាប់ខ្មាំងទាំងអស់មកវិញ»។

បញ្ហានេះបានជំរុញ​ឲ្យ​មាន​សម្ពាធក្នុងស្រុកជា​ថ្មីលើលោកនាយករដ្ឋមន្ត្រី បេនចាមីន ណេតាន់យ៉ាហ៊ូ ដោយរដ្ឋមន្ត្រីសន្តិសុខជាតិស្តាំនិយម លោក Itamar Ben Gvir បានគំរាមបញ្ឈប់ជំនួយមនុស្សធម៌​ដល់តំបន់ហ្គាហ្សា ប្រសិនបើក្រុមហាម៉ាសបរាជ័យក្នុងការប្រគល់សាកសពទាហានអ៊ីស្រាអែលដែលនៅតែបាត់ខ្លួន។

ការផ្លាស់ប្តូរចំណាប់ខ្មាំង និងការសង្គ្រោះសាកសព បង្ហាញពីជំហានដ៏ផុយស្រួយមួយនៅក្នុងបទឈប់បាញ់ដែលកំពុងបន្ត ដែលភាគីទាំងពីរបានព្រមានថាអាចនឹងដួលរលំ ប្រសិនបើលក្ខខណ្ឌមិនត្រូវបានបំពេញ​ឲ្យ​ពេញលេញ៕

ដោយ៖ ឈាង