អ៊ីស្រាអែល​ប្រាប់​ថា​បន្ត​​អនុវត្ត​បទ​ឈប់​បាញ់វិញ​ហើយ ​បន្ទាប់​ពី​ការ​វាយ​ប្រហារ​សម្លាប់​មនុស្ស​៤៥​នាក់​នៅ​ហ្គាហ្សា

បន្ទាប់ពីបានធ្វើការវាយប្រហារតាមអាកាស​ជា​ច្រើន​លើក​ប្រឆាំងនឹងគោលដៅរបស់ក្រុមហាម៉ាស ដោយ​ចោទ​ប្រកាន់​ថាក្រុមសកម្មប្រយុទ្ធ​នេះ​បានវាយប្រហារលើកងទ័ពអ៊ីស្រាអែល ដែលជាការកើនឡើងធ្ងន់ធ្ងរបំផុតចាប់តាំងពីបទឈប់បាញ់​ដែល​ទើប​ចាប់ផ្ដើម​រយៈពេល​៩​ថ្ងៃ អ៊ីស្រាអែលបាន​ប្រកាស​កាលពីល្ងាចថ្ងៃអាទិត្យ​ទី​១៩​ខែ​តុលា​ថា ខ្លួនបានបន្តការអនុវត្តបទឈប់បាញ់នៅតំបន់ហ្គាហ្សាឡើងវិញហើយ។

យោង​តាម​ AFP ទីភ្នាក់ងារការពារជនស៊ីវិលរបស់ហ្កាហ្សាដែលប្រតិបត្តិការនៅក្រោមអាជ្ញាធរហាម៉ាស បាននិយាយថា មនុស្សយ៉ាងហោចណាស់៤៥​នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែល។ មន្ទីរពេទ្យ​ចំនួន​​៤​​នៅ​ហ្គាហ្សា​ បាន​បញ្ជាក់​ពី​ចំនួន​អ្នក​ស្លាប់​ដូច​គ្នា​ទៅ​កាន់ AFP ដោយ​រាយការណ៍​​​​ថា​មាន​ទាំង​អ្នក​ស្លាប់​និង​អ្នក​រង​​របួស។

យោធាអ៊ីស្រាអែលបាន​លើក​ឡើង​ថា ខ្លួនកំពុងពិនិត្យមើលរបាយការណ៍នៃអ្នកស្លាប់ និងរបួស ប៉ុន្តែនៅក្នុងសេចក្តីថ្លែងការណ៍មួយកាលពីល្ងាចថ្ងៃអាទិត្យបានប្រកាសថា «ជាការឆ្លើយតបទៅនឹងការរំលោភលើកិច្ចព្រមព្រៀងបទឈប់បាញ់កាលពីដើមថ្ងៃនេះ IDF បានចាប់ផ្តើមការវាយប្រហារជាបន្តបន្ទាប់ប្រឆាំងនឹងគោលដៅភេរវកររបស់ក្រុមហាម៉ាសនៅតំបន់ហ្គាហ្សាស្ទ្រីបភាគខាងត្បូង»។

នៅក្នុងសេចក្តីថ្លែងការណ៍ដាច់ដោយឡែកមួយ កងទ័ពបាននិយាយថា ទាហានអ៊ីស្រាអែល​២​នាក់ត្រូវបានសម្លាប់នៅក្នុងការប្រយុទ្ធភាគខាងត្បូងតំបន់ហ្គាហ្សា ដោយការិយាល័យនាយករដ្ឋមន្ត្រីបានបញ្ជាក់ពីការស្លាប់បានកើតឡើងនៅ​ទីក្រុង Rafah។

មន្ត្រីសន្តិសុខម្នាក់បានប្រាប់ AFP ថា អ៊ីស្រាអែលនឹងផ្អាកការផ្តល់ជំនួយមនុស្សធម៌ចូលទៅក្នុងហ្គាហ្សា ដោយលើកឡើងពី«ការរំលោភបំពាន​​យ៉ាង​ព្រហើន​របស់ពួកហាម៉ាស»ចំពោះបទឈប់បាញ់។ កន្លងមក អ៊ីស្រាអែលបានផ្អាកការដឹកជញ្ជូនជំនួយជាច្រើនដងក្នុងអំឡុងសង្គ្រាម ដែលធ្វើឲ្យវិបត្តិមនុស្សធម៌របស់សហគមន៍កាន់តែអាក្រក់ទៅៗ ដែលអង្គការសហប្រជាជាតិបានពិពណ៌នាថា បង្កឲ្យមានទុរ្ភិក្សនៅភាគខាងជើងហ្គាហ្សា។

នាយករដ្ឋមន្ត្រី បេនចាមីន ណេតាន់យ៉ាហ៊ូ មុននេះ​បានប​ញ្ជា​ឲ្យ​កងកម្លាំងសន្តិសុខ ចាត់វិធានការយ៉ាងខ្លាំងក្លា ប្រឆាំងនឹងគោលដៅភេរវករ នៅតំបន់ហ្គាហ្សាស្ទ្រីប ដោយចោទប្រកាន់ក្រុមហាម៉ាស ពី​ការ​បំពានបទឈប់បាញ់។ រដ្ឋមន្ត្រីការពារជាតិ លោក Israel Katz បានព្រមានថា ក្រុមសកម្មប្រយុទ្ធ​ហាម៉ាស​នឹង«បង់ថ្លៃយ៉ាងធ្ងន់ធ្ងរសម្រាប់រាល់ការបាញ់ប្រហារ និងរាល់ការបំពានបទឈប់បាញ់» ដោយ​ប្ដេជ្ញា​ថា ការឆ្លើយតបរបស់អ៊ីស្រាអែលនឹង«រឹតតែ​ខ្លាំង​ក្លា​ឡើង»។

នៅ​ល្ងាច​ថ្ងៃអាទិត្យ យោធាអ៊ីស្រាអែលបានប្រកាសថា ខ្លួនបាន«ពង្រឹងបទឈប់បាញ់ឡើងវិញ» ដោយបន្ថែម​ថា ប្រតិបត្តិការនឹងបន្ត ប៉ុន្តែអ៊ីស្រាអែលនឹង«ឆ្លើយតបយ៉ាងម៉ឺងម៉ាត់ចំពោះការរំលោភលើវា»។

អំពើហិង្សាជាថ្មី​នេះ​បានធ្វើ​ឲ្យ​មានភាពមិនប្រាកដប្រជាចំពោះបទឈប់បាញ់​ ទោះ​ស្ថិត​ក្រោម​ការ​សម្រប​សម្រួល​​ពី​​​សហរដ្ឋអាមេរិក​ក៏​ដោយ៕

ដោយ៖ ឈាង