អ៊ុយក្រែន​ព្រមាន​ពី​គ្រោះ​ថ្នាក់​នុយក្លេអ៊ែរ ក្រោយ​​រុស្ស៊ី​​កម្ទេច​ស្ថានីយ​ថាមពលរបស់​ខ្លួនអស់​២

រុស្ស៊ីបានបើកការវាយប្រហារដោយយន្តហោះគ្មានមនុស្សបើក និង​មីស៊ីល​ទ្រង់ទ្រាយ​​ធំពេញ​មួយយប់ ដោយវាយលុកស្ថានីយថាមពលដែលផ្គត់ផ្គង់​ឲ្យ​រោងចក្រនុយក្លេអ៊ែរចំនួនពីររបស់អ៊ុយក្រែន គឺ Khmelnytskyi និង​ Rivne ដែលបង្កើនការភ័យខ្លាចនៃគ្រោះថ្នាក់នុយក្លេអ៊ែរធ្ងន់ធ្ងរ។

រដ្ឋមន្ត្រីការបរទេសអ៊ុយក្រែន លោក Andrii Sybiha បាននិយាយថា មនុស្ស១២​នាក់ត្រូវបានសម្លាប់នៅក្នុងការវាយប្រហារ ដែលបានបំផ្លាញទីតាំងថាមពលផងដែរនៅក្នុងទីក្រុង​កៀវ​ តំបន់ Poltava និង​តំបន់ Kharkiv។ លោកបានចោទប្រកាន់ទីក្រុងមូស្គូពី «ចេតនាបង្កគ្រោះថ្នាក់ដល់សុវត្ថិភាពនុយក្លេអ៊ែរនៅអឺរ៉ុប» ហើយបានជំរុញ​ឲ្យប្រទេសមួយចំនួនដូចជា ចិន និងឥណ្ឌាដាក់សម្ពាធ​ឲ្យ​រុស្ស៊ីបញ្ឈប់​សកម្មភាព​បែប​​នេះ។

អ៊ុយក្រែន​បាន​ស្នើ​ឲ្យ​អង្គការ​ឃ្លាំ​មើល​នុយក្លេអ៊ែរ​របស់​អង្គការ​សហ​ប្រជាជាតិ​បើក​កិច្ច​ប្រជុំ​បន្ទាន់​មួយ​អំពី​ការ​វាយ​ប្រហារ​​របស់​រុស្ស៊ី។

នាយករដ្ឋមន្ត្រី​អ៊ុយក្រែន លោកស្រី Yulia Svyrydenko បាន​ឲ្យ​ដឹង​​ថា ក្រុមសង្គ្រោះបន្ទាន់កំពុងធ្វើការដើម្បីស្តារថាមពលឡើងវិញ ប៉ុន្តែតំបន់ជាច្រើននៅតែមិនមានអគ្គិសនី ឬទឹកប្រើប្រាស់។ រដ្ឋមន្ត្រីថាមពល លោកស្រី Svitlana Hrynchuk បានព្រមានថា ការដាច់ចរន្តអគ្គិសនីនឹងបន្ត​អូសបន្លាយ​​ជា​ច្រើន​ថ្ងៃ​ទៀត។

ក្រុមហ៊ុនថាមពលរដ្ឋ Tsentrenergo បាន​ប្រកាស​ថា រោងចក្ររបស់ខ្លួននៅក្នុងទីក្រុ​ង​កៀវ និង​តំបន់ Kharkiv បានឈប់ដំណើរការទាំងស្រុង បន្ទាប់ពីរងការវាយប្រហារ។

ប្រធានាធិបតី វ៉ូឡូឌីមៀរ ហ្សេលេនស្គី បានថ្កោលទោសការវាយប្រហារនេះ និងបានអំពាវនាវ​ឲ្យមានការដាក់ទណ្ឌកម្មកាន់តែចាស់ដៃ​លើ​ពាណិជ្ជកម្ម​ប្រេងរុស្ស៊ី ដោយនិយាយថា ទីក្រុងមូស្គូកំពុងព្យាយាម«ធ្វើ​ឲ្យ​ជីវិត​ប្រជាជន​អ៊ុយក្រែន​កាន់តែលំបាក​មុនរដូវរងាចូល​មក​ដល់»៕

ប្រែសម្រួល៖ ឈាង