ព្រឹទ្ធសភាថៃត្រៀមសម្រេចជោគវាសនានៃ MoU ជាមួយកម្ពុជា ស្ដី​ពីព្រំដែន​សមុទ្រ

គណៈកម្មាធិការព្រឹទ្ធសភាថៃ នឹងសម្រេចនា​ថ្ងៃអង្គារ៍​ថ្ងៃ​ទី​១៦​ធ្នូ​​​ថាតើត្រូវរក្សា ធ្វើវិសោធនកម្ម ឬលុបចោលអនុស្សរណៈយោគយល់ (MoU) ដែលបានចុះហត្ថលេខាជាមួយកម្ពុជាក្នុងឆ្នាំ​២០០១ ស្ដីពីព្រំដែនសមុទ្រត្រួតគ្នា។

យោង​តាម​បាងកក​ប៉ុស្តិ៍ សមាជិកព្រឹទ្ធសភា លោក Noppadon Inna ប្រធានគណៈកម្មាធិការពិនិត្យកិច្ចព្រមព្រៀងឆ្នាំ​២០០០ និង ២០០១ បាននិយាយថា គណៈកម្មាធិការបានបញ្ចប់ការសិក្សាអំពីកិច្ចព្រមព្រៀងឆ្នាំ​២០០១ ដែលត្រូវបានគេស្គាល់ជាទូទៅថាជា MoU ៤៤ ហើយនឹងកោះប្រជុំម្តងទៀតសម្រាប់ការពិភាក្សាសម្រេចចុងក្រោយ។

លោក Noppadon បានប្រាប់អ្នកសារព័ត៌មានថា «យើងបានពិនិត្យមើលគុណសម្បត្តិ និងគុណវិបត្តិលម្អិតរួចរាល់ហើយ»។ លោកបានបន្ថែមថា «ខ្ញុំនឹងស្នើសុំ​ឲ្យកិច្ចប្រជុំបោះឆ្នោតភ្លាមៗថាតើ MoU ៤៤ គួរតែបន្តមានប្រសិទ្ធភាព លុបចោល ឬធ្វើវិសោធនកម្ម»។

លោកបាន​បញ្ជាក់​ទៀត​ថា សមាជិកគណៈកម្មាធិការជាច្រើនយល់ឃើញថា កិច្ចព្រមព្រៀងនេះមានចំណុចខ្វះខាតយ៉ាងខ្លាំង ដោយកត់សម្គាល់ថា មានវឌ្ឍនភាពជាក់ស្តែងតិចតួចណាស់ត្រូវបានធ្វើឡើងចាប់តាំងពីវាចូលជាធរមានកាលពី​២៤​ឆ្នាំមុន។ លោក Noppadon បាន​និយាយ​​ថា «នៅពេលថ្លឹងថ្លែងពីគុណវិបត្តិធៀបនឹងអត្ថប្រយោជន៍ និន្នាការបង្ហាញថា មនុស្សជាច្រើនមិនចង់ឲ្យ MoU នេះបន្តទៀតទេ»។

សូម​ជម្រាប​ថា MoU ៤៤ ផ្តល់នូវក្របខណ្ឌសម្រាប់កិច្ចចរចាលើតំបន់ទាមទារត្រួតស៊ីគ្នា (OCA) ទំហំ​ប្រមាណ ២៦ ០០០​គីឡូម៉ែត្រក្រឡា នៅក្នុងឈូងសមុទ្រថៃដែលសម្បូរដោយ​ប្រភព​ថាមពល ដែលត្រូវបានប៉ាន់ប្រមាណថាមានធនធានធម្មជាតិតម្លៃរហូតដល់ ៣០០​ពាន់លានដុល្លារ៕

ប្រែសម្រួល៖ ឈាង