អ្នកដំណើរមួយយន្តហោះ ចេញដំណើរនៅឆ្នាំ២០២៦ ទៅដល់គោលដៅនៅឆ្នាំ២០២៥

ប្រហែលមិនមានមនុស្សច្រើនទេដែលជឿលើការធ្វើដំណើរវិលទៅអតីតកាល ប៉ុន្តែនេះជារឿងពិត ដោយអ្នកដំណើរមួយយន្តហោះ ចេញដំណើរក្នុងឆ្នាំ២០២៦ ប៉ុន្តែទៅដល់គោលដៅនៅឆ្នាំ២០២៥ ទៅវិញ។

តាមការផ្សាយរបស់ TTW, នោះគឺអ្នកដំណើរនៃជើងហោះហើរ CX880​ របស់ក្រុមហ៊ុនអាកាសចរណ៍ Cathay Pacific ដែលចេញដំណើរពីទីក្រុងហុងកុង នាវេលាម៉ោង១២:៣០នាទីរំលងអធ្រាត្រឈានដល់ថ្ងៃទី១ខែមករាឆ្នាំ២០២៦ ប៉ុន្តែយន្តហោះបានទៅដល់ទីក្រុង Los Angeles នៃសហរដ្ឋអាមេរិក នាវេលាម៉ោង៨:៥៥នាទីយប់ ថ្ងៃទី៣១ខែធ្នូឆ្នាំ២០២៥ទៅវិញ។

ស្តាប់ទៅដូចជាចម្លែក ប៉ុន្តែរឿងនេះគឺដោយសារតែភាពខុសគ្នានៃល្វែងម៉ោង រវាងហុងកុងនិងសហរដ្ឋអាមេរិក ពោលគឺពេលវេលានៅហុងកុង ដើរលឿនជាងនៅអាមេរិក។ 

យន្តហោះបានធ្វើដំណើរកាត់មហាសមុទ្រប៉ាស៊ីហ្វិក ដោយឆ្លងកាត់ខ្សែបន្ទាត់កាលបរិច្ឆេទអន្តរជាតិ (International Date Line) ដូច្នេះមានន័យថា អ្នកដំណើរមួយយន្តហោះនេះ បានធ្វើដំណើរត្រឡប់ទៅអតីតកាល ហើយមានឱកាសចូលរួមពិធីអបអរឆ្នាំថ្មីឆ្នាំសកលចំនួន២ដង។

យ៉ាងណា វាមិនមែនលើកដំបូងឡើយ ជាក់ស្តែងកាលពីឆ្នាំមុនករណីដូចគ្នានេះ ក៏កើតឡើងផងដែរ ដោយជើងហោះហើរដដែល បានចេញពីហុងកុងនៅថ្ងៃ១ខែមករា តែទៅដល់គោលដៅនៅថ្ងៃទី៣១ខែធ្នូ៕ 

អត្ថបទ៖ សុខ សុវណ្ណ