អាមេរិកប្រកាស​ឲ្យ​១០លានដុល្លារសម្រាប់ព័ត៌មានពីមេដឹកនាំកំពូលថ្មីរបស់អ៊ីរ៉ង់

ក្រសួងការបរទេស​អាមេរិក ​បានប្រកាសផ្តល់ប្រាក់រង្វាន់រហូតដល់​១០​លានដុល្លារ សម្រាប់ព័ត៌មានដែលនាំទៅដល់ការកំណត់អត្តសញ្ញាណ ឬទីតាំងរបស់មេដឹកនាំសំខាន់ៗរបស់អ៊ីរ៉ង់ រួមទាំងមេដឹកនាំកំពូលថ្មីគឺលោក Mojtaba Khamenei ផងដែរ។ នេះ​បើ​យោង​តាម​ទីភ្នាក់ងារ​ព័ត៌មាន Anadolu កាល​ពីថ្ងៃទី​​១៣​ខែ​មីនា​ឆ្នាំ​២០២៦។

តាមរយៈកម្មវិធីផ្តល់រង្វាន់សម្រាប់យុត្តិធម៌ (Rewards for Justice) ទីក្រុងវ៉ាស៊ីនតោនបានកំណត់គោលដៅលើបុគ្គល ដែល​បញ្ជានិងដឹកនាំ​កងកម្លាំង IRGC ដែលរងការចោទប្រកាន់ថាបានរៀបចំផែនការ និងវាយប្រហារនៅជុំវិញពិភពលោក។ បញ្ជីនេះក៏រួមមានលោក Ali Asghar Hejazi អនុប្រធានខុទ្ទកាល័យមេដឹកនាំកំពូល និងលោក Yahya Rahim Safavi ទីប្រឹក្សាយោធាជាន់ខ្ពស់ផងដែរ។

ការប្រកាសនេះបានធ្វើឡើងបន្ទាប់ពីលោក Pete Hegseth រដ្ឋមន្ត្រីការពារជាតិអាមេរិក បានលើកឡើងថា មេដឹកនាំកំពូលថ្មីរបស់អ៊ីរ៉ង់បានរងរបួស ខណៈដែលអាមេរិក និងអ៊ីស្រាអែល​បន្តការវាយប្រហារលើប្រទេសនេះ។ ភាពតានតឹងនៅមជ្ឈិមបូព៌ាបានផ្ទុះឡើងយ៉ាងខ្លាំង ចាប់តាំងពីការវាយប្រហាររួមគ្នារវាងអ៊ីស្រាអែល និងអាមេរិកកាលពីថ្ងៃទី២៨​ខែកុម្ភៈ ដែលបានសម្លាប់មនុស្សប្រហែល ១៣០០​នាក់ រួមទាំងអតីតមេដឹកនាំកំពូល Ali Khamenei។ ជាការសងសឹក ទីក្រុងតេហេរ៉ង់បានបាញ់បង្ហោះដ្រូន និងមីស៊ីលផ្ដោតលើអ៊ីស្រាអែល ហ្ស៊កដានី អ៊ីរ៉ាក់ និងបណ្តាប្រទេសនៅតំបន់ឈូងសមុទ្រ ដែលបណ្តាល​ឲ្យ​មានអ្នកស្លាប់ និងខូចខាតហេដ្ឋារចនាសម្ព័ន្ធស៊ីវិល ព្រមទាំងប៉ះពាល់ដល់ទីផ្សារសកល និងវិស័យអាកាសចរណ៍៕

ប្រែសម្រួល៖ ឈាង