ព័ត៌មានអន្ដរជាតិ

នាយករដ្ឋមន្ត្រីអ៊ីស្រាអែល ថា គោលដៅសង្គ្រាមអ៊ីរ៉ង់សម្រេចជាងពាក់កណ្តាល

បានផុស

៣ ខែ មុន

នៅ

ថ្ងៃអង្គារ ៣១ មីនា ២០២៦

ដោយ

នាយករដ្ឋមន្រ្តីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានលើកឡើងនៅថ្ងៃចន្ទថា សង្គ្រាមនៅអ៊ីរ៉ង់សម្រេចគោលដៅបានជាងពាក់កណ្តាលហើយ ដោយខ្លួនមិនបានកំណត់ពេលវេលាច្បាស់ថាពេលណាវានឹងបញ្ចប់នោះទេ។

យោងតាម CNA និង AFP ផ្សាយថ្ងៃទី៣១ ខែមីនា ឆ្នាំ២០២៦ លោក ណេតាន់យ៉ាហ៊ូ បានប្រាប់អ្នកផ្សាយព័ត៌មានអាមេរិក Newsmax ថា៖ «វាពិតជាហួសពីចំណុចកណ្តាលហើយ។ ប៉ុន្តែខ្ញុំមិនចង់កំណត់ពេលវេលាលើសង្រ្គាមនេះនោះទេ»។

លោក បន្ថែមថា៖ «ខ្ញុំចង់មានន័យថា សង្គ្រាមនេះជោគជ័យជាងពាក់កណ្តាលទាក់ទងនឹងបេសកកម្មហើយ វាមិនចាំបាច់ទាក់ទងនឹងពេលវេលានោះទេ»។

នាយករដ្ឋមន្រ្តីអ៊ីស្រាអែល លោក បេនចាមីន ណេតាន់យ៉ាហ៊ូ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា ប្រធានាធិបតីសហរដ្ឋអាមេរិក លោក ដូណាល់ ត្រាំ បានចាប់ផ្តើមសង្គ្រាមជាមួយ លោក ណេតាន់យ៉ាហ៊ូ នៅថ្ងៃទី ២៨ ខែកុម្ភៈ ដំបូងឡើយនិយាយថា ប្រតិបត្តិការនេះនឹងមានរយៈពេលពី ៤ទៅ ៦សប្តាហ៍ប៉ុណ្ណោះ។

លោក ណេតាន់យ៉ាហ៊ូ បន្ថែមថា៖ «សង្គ្រាមនេះបានសម្រេចគោលដៅ រួមទាំងសម្លាប់សមាជិកនៃកងឆ្មាំបដិវត្តន៍អ៊ីរ៉ង់រាប់ពាន់នាក់។ អ៊ីស្រាអែលនិងសហរដ្ឋអាមេរិកក៏ជិតដល់ទីបញ្ចប់នៃឧស្សាហកម្មអាវុធរបស់ពួកគេដែរ»។

លោក ណេតាន់យ៉ាហ៊ូ និង លោក ត្រាំ ចោទប្រកាន់ម្តងហើយម្តងទៀតថា អ៊ីរ៉ង់ជិតសម្រេចនូវការសាងសង់អាវុធនុយក្លេអ៊ែរ ហើយអះអាងទៀតថា ការប្រព្រឹត្តរបស់អ៊ីរ៉ង់ ក៏មានអង្គការឃ្លាំមើលនុយក្លេអ៊ែររបស់អង្គការសហប្រជាជាតិមិនគាំទ្រផងដែរ ប៉ុន្តែ វានៅតែកើតឡើង ទោះបីជា លោក ត្រាំ អះអាងថា ខ្លួនបានបំផ្លាញទីតាំងសំខាន់ៗកាលពីឆ្នាំមុនក៏ដោយ។

នាយករដ្ឋមន្រ្តីអ៊ីស្រាអែលរូបនេះ បានលើកឡើងទាំងមានទំនុកចិត្តថា «សាធារណរដ្ឋអ៊ីរ៉ង់នឹងដួលរលំពីខាងក្នុង»។

លោក ណេតាន់យ៉ាហ៊ូ បន្តថា៖ «ខ្ញុំគិតថារបបនេះនឹងដួលរលំពីខាងក្នុង។ ប៉ុន្តែនៅពេលនេះ អ្វីដែលយើងកំពុងបន្តគឺគ្រាន់តែធ្វើឱ្យសមត្ថភាពយោធា មីស៊ីល និងអាវុធនុយក្លេអ៊ែរពួកគេចុះខ្សោយ»៕

ប្រែសម្រួល៖ ណឺ មិនា