អាមេរិកហៅអ៊ីស្រាអែល និងលីបង់ចូលតុចរចា

ក្រសួងការបរទេសអាមេរិកបានប្រកាសថា ខ្លួននឹងធ្វើជាម្ចាស់ផ្ទះរៀបចំកិច្ចប្រជុំមួយនៅសប្តាហ៍ក្រោយ ដើម្បី​ឲ្យ​ភាគីអ៊ីស្រាអែល និងលីបង់អង្គុយតុចរចាគ្នា។ នេះ​បើយោង​តាម​សារព័ត៌មាន France24 ចុះផ្សាយ​ថ្ងៃសុក្រ​ទី​១០​ខែមេសា​ឆ្នាំ​២០២៦។

ការប្រកាសនេះធ្វើឡើងចំពេលដែលពិភពលោកកំពុងបារម្ភយ៉ាងខ្លាំងថា ការវាយប្រហារយ៉ាងចាស់ដៃរបស់អ៊ីស្រាអែលទៅលើទឹកដីលីបង់ អាចនឹងធ្វើឲ្យ​កិច្ចព្រមព្រៀងឈប់បាញ់ដ៏ផុយស្រួយរវាងអាមេរិក និងអ៊ីរ៉ង់ ត្រូវរលាយសាបសូន្យទៅវិញ។ កាលពីថ្ងៃពុធកន្លងទៅ អ៊ីស្រាអែលបានបើកការវាយប្រហារតាមអាកាសយ៉ាងធ្ងន់ធ្ងរបំផុតលើលីបង់ បណ្តាលឲ្យមនុស្សរាប់រយនាក់បាត់បង់ជីវិត ដែលនេះបានធ្វើឲ្យ​បទឈប់បាញ់ដែលទើបតែមានអាយុមិនដល់៤៨​ម៉ោងផងនោះ ត្រូវរង្គោះរង្គើយ៉ាងខ្លាំង។

លោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានបង្គាប់ឲ្យ​រដ្ឋមន្ត្រីរបស់លោកស្វែងរកការចរចាដោយផ្ទាល់ជាមួយលីបង់ ដោយផ្ដោតសំខាន់លើការដកហូត​អាវុធពីក្រុមហេសបូឡា។ ប៉ុន្តែខាងមន្ត្រីរដ្ឋាភិបាលលីបង់បានឆ្លើយតបវិញថា បើចង់ចរចា លុះត្រាតែមានការឈប់បាញ់គ្នាជាមុនសិន។ ទន្ទឹមនឹងនេះ ស្ថានការណ៍នៅសមរភូមិកាន់តែឡើងកម្ដៅ ដោយក្រុមហេសបូឡាបានប្រកាសថា ពួកគេកំពុងវាយតបតជាមួយកងទ័ពថ្មើរជើងអ៊ីស្រាអែលនៅភាគខាងត្បូងលីបង់ ខណៈដែលមេទ័ពអ៊ីស្រាអែលបានចុះទៅសួរសុខទុក្ខកងទ័ពដល់ក្នុងដីលីបង់ និងអះអាងថាបានវាយកម្ទេចកម្លាំងសត្រូវយ៉ាងដំណំ។

ក្រៅពីបញ្ហានៅលីបង់ ជម្លោះពាក្យសម្តីក៏បានផ្ទុះឡើងក្នុងចំណោមអ្នកសម្របសម្រួលផងដែរ។ រដ្ឋមន្ត្រីការពារជាតិប៉ាគីស្ថានបានរិះគន់អ៊ីស្រាអែលយ៉ាងចាស់ដៃថាជា «បណ្តាសារបស់មនុស្សជាតិ» ដែលកំពុងបង្កសង្គ្រាមក្នុងពេលចរចា។ សម្តីនេះបានធ្វើឲ្យអ៊ីស្រាអែល​ក្ដៅ​ស្លឹក​ត្រចៀក​យ៉ាងខ្លាំង និងចាត់ទុកថាជាការប្រមាថដែលមិនអាចទទួលយកបាន។ បញ្ហានេះកាន់តែស្មុគស្មាញ ដោយសារប៉ាគីស្ថានមិនទទួលស្គាល់អ៊ីស្រាអែលជារដ្ឋ ហើយយល់ថាការឈប់បាញ់ត្រូវតែរួមបញ្ចូលទាំងលីបង់ផងដែរ ខណៈដែលអ៊ីស្រាអែលនៅតែទទូចថា លីបង់មិនស្ថិតក្នុងកិច្ចព្រមព្រៀងឈប់បាញ់ជាមួយអ៊ីរ៉ង់នោះទេ។

មេដឹកនាំពិភពលោកជាច្រើន រួមទាំងអធិការបតីអាល្លឺម៉ង់ លោក Friedrich Merz ក៏បានព្រមានដែរថា បើការបំផ្លិចបំផ្លាញនៅលីបង់នៅតែបន្ត ដំណើរការសន្តិភាពទាំងមូលនឹងត្រូវបរាជ័យជាមិនខាន។ ដោយឡែក លោកប្រធានាធិបតី ដូណាល់ ត្រាំ ក៏បានសម្តែងការមិនពេញចិត្តចំពោះអ៊ីរ៉ង់ ដោយចោទប្រកាន់ថា អ៊ីរ៉ង់មិនបានគោរពតាមកិច្ចព្រមព្រៀងក្នុងការបើកច្រកសមុទ្រ Hormuz ឲ្យបានល្អនោះទេ។ លោកបានព្រមានអ៊ីរ៉ង់កុំឲ្យព្យាយាមទាមទារកម្រៃពីកប៉ាល់ដែលឆ្លងកាត់ច្រកសមុទ្រដ៏សំខាន់នេះ ដែលជាសរសៃឈាមសេដ្ឋកិច្ចពិភពលោកសម្រាប់ដឹកជញ្ជូនប្រេង និងហ្គាស៕

ប្រែសម្រួល៖ ឈាង