អាមេរិក និង អ៊ីរ៉ង់ ឈានដល់បង្កើតក្រុមការងារ​​កម្រិតបច្ចេកទេស​ចំនួន ៤

ប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានរាយការណ៍នៅថ្ងៃទី ២៣ ខែមិថុនា ថា កិច្ចចរចាថ្នាក់បច្ចេកទេសរវាងអ៊ីរ៉ង់ និងសហរដ្ឋអាមេរិកនៅក្នុងប្រទេសស្វីស បានបិទបញ្ចប់ហើយ ដោយភាគីទាំងសងខាងបានព្រមព្រៀងគ្នាកំណត់បង្កើតក្រុមការងារចរចាលើបញ្ហានុយក្លេអ៊ែរ និងទណ្ឌកម្មសេដ្ឋកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានរដ្ឋ IRNA ដោយផ្អែកលើការដកស្រង់សម្តីរបស់អនុរដ្ឋមន្ត្រីការបរទេស លោក Kazem Gharibabadi បានបញ្ជាក់ថា «ក្រុមអ្នកចរចាបាន សម្រេចចិត្តបង្កើតក្រុមការងារចំនួនបួនគឺ ៖ ក្រុមការងារលុបចោលទណ្ឌកម្ម, ក្រុមការងារកិច្ចការនុយក្លេអ៊ែរ, ក្រុមការងារស្តារឡើងវិញនិងអភិវឌ្ឍន៍សេដ្ឋកិច្ច, និងក្រុមការងារតាមដាន-អនុវត្តកិច្ចព្រមព្រៀង»។

ទោះជាយ៉ាងណាក៏ដោយ ដំណើរការការទូតនេះនៅតែមានភាពរកាំរកូស ដោយសារភាគីអ៊ីរ៉ង់ តាមរយៈអ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បានប្រាប់ទីភ្នាក់ងារសារព័ត៌មានផ្លូវការ IRNA កាលពីថ្ងៃចន្ទម្សិលមិញថា ទីក្រុងតេហេរ៉ង់មិនបានចរចាលើកម្មវិធីនុយក្លេអ៊ែររបស់ខ្លួនឡើយ ហើយក៏មិនបានទទួលយកការប្ដេជ្ញាចិត្តថ្មីណាមួយនៅក្នុងកិច្ចចរចាកាលពីថ្ងៃអាទិត្យ ជាមួយអាមេរិកនៅឡើយដែរ។

មិនតែប៉ុណ្ណោះ លោក Baghaei បានបញ្ជាក់បន្ថែមថា រាល់ការសម្រេចចិត្តទាក់ទងនឹងកម្មវិធីនុយក្លេអ៊ែរ និងការអនុញ្ញាតឲ្យក្រុមអធិការកិច្ច UN (IAEA) ចូលស្រុកវិញ ដាច់ខាតត្រូវតែឆ្លងកាត់ការអនុម័ត និងយល់ព្រមពីសភាជាតិ និងក្រុមប្រឹក្សាសន្តិសុខជាតិកំពូលរបស់អ៊ីរ៉ង់ជាមុនសិន ដែលនេះបង្ហាញថាការចរចានៅក្នុងរយៈពេល ៦០ថ្ងៃខាងមុខ នឹងត្រូវជួបការជជែកដេញដោលគ្នាយ៉ាងតានតឹងបំផុត។

គួរបញ្ជាក់ថា ក្រុមការងារចរចាដែលដឹកនាំដោយអនុប្រធានាធិបតីអាមេរិក លោក JD Vance និងប្រធានក្រុមចរចាអ៊ីរ៉ង់ លោក Mohammad Bagher Ghalibaf បានបើកកិច្ចពិភាក្សាកាលពីថ្ងៃអាទិត្យ ដែលនេះជាផ្នែកមួយនៃដំណាក់កាលចរចារយៈពេលពីរខែ ស្របតាមក្របខ័ណ្ឌនៃកិច្ចព្រមព្រៀងបឋមដែលបានព្រមព្រៀងគ្នាកាលពីសប្តាហ៍មុន៕

អត្ថបទ ៖ សាង ស្រីល័ក្ខ